Astanada jaŋadan salynyp jatqan tūrǧyn üiler az emes. Al baspanaly bolǧandardyŋ su jaŋa päterge eskı jihazdardy kırgıze qoiuy ekıtalai. Būl tūrǧyda Belarus, İtaliia jihazdarynyŋ aiy oŋynan tuyp tūr. Degenmen sūranysqa ie zamanaui jihaz jasap jatqan otandyq käsıporyndar da joq emes.
Eŋ bastysy – sapa
Käsıpker Mūrat Beiısbaevtyŋ jihaz biznesımen ainalysyp jürgenıne 3 jyl bolypty. Negızgı mamandyǧy – suretşı. Özı – käsıbi qolöner şeberı. Omby qalasyndaǧy Şoqan Uälihanov müsını men Astanadaǧy bırqatar müsın-eskertkışterdı jasauǧa atsalysqan. Qūrylys basynda da dizaindyq jūmystarmen ainalysqan Mūrat Jūmaǧūlūly bır kezderı meşıt kümbezın de jasaǧan körınedı. Al jihaz ısın şaǧyn şkaftan bastaǧan ol qazırgı uaqytta tūtynuşylardyŋ talǧamyna qarai tapsyrys boiynşa türlı zamanaui, sändı ärı sapaly üstelder men garderob, jatyn bölme men as üi jabdyqtaryn jasaidy. Jihaz materialdary Resei, Qytai jäne Türkiia elderınen tasymaldanady eken. Alaida şetelderden äkelınetın materialdyŋ eŋ qymbat türlerın ǧana alatynyn aitady käsıpker.
– Özım suretşı bolǧannan soŋ bırınşı kezekte jihazdyŋ dizainyna basa män beremın. Jasaǧan dünielerımızdıŋ artyqşylyǧy materialdy oiyp bederlegennen görı oǧan arnaiy oiu-örnektı japsyryp, ony qymbat syrlarmen boiap, jihazdyŋ sapasymen qatar, ädemılıgın de qatty qadaǧalaimyz. Bızdıŋ jūmysymyzdyŋ jürıp jatqany da osy sapaǧa jūmys jasaitynymyzda bolar. Äitpese, būl salada käsıbın döŋgeletıp jürgenderdıŋ bırşamasy bankrotqa ūşyrap jatyr, – deidı Mūrat Beiısbaev. – Halyqaralyq jihaz körmelerıne de ünemı qatysyp tūramyn. Mysaly, Qytaidyŋ Şanhai, Guanchjou qalalarynda boldym. Sol körmelerde körgen-tüigenımdı täjıribe jüzınde ıske asyryp, önımderımızge Qazaqstanda joq dünielerdı engızuge tyrysamyz. Sonymen qatar ölşem bırlıkke de erekşe män berıp, tıptı millimetrıne deiın qate jıbermeudı eskeremız. Şkaftyŋ bekıtıletın jerlerı köbıne bıraz uaqyttan keiın oiylyp, synyp jatady. Öitkenı ony bekıtetın arzan qūraldardyŋ eŋ tömengı baǧasy 2 teŋge bolsa, taǧanyndaǧy tört būryşyna bar bolǧany 8 teŋge jūmsalady. Al bız mūndai arzanqol qūraldardy mülde qoldanbaimyz. Būl 2 teŋgelıktıŋ ornyna bız 100 teŋge tūratyn sapaly qūraldy ornatamyz. Sonda 8 teŋge men 400 teŋgenıŋ aiyrmaşylyǧyn özıŋız de baǧamdap körıŋız.
3 jylǧa deiın kepıldık berıletın jihaz baǧasy tūtynuşylardyŋ sūranysyna qarai 100 myŋ teŋgeden bastalady eken. Qazırgı uaqytta satylym tek Astanamen şektelmei, elımızdıŋ bırqatar qalalarynan da tapsyrystyŋ tüsıp jatqanyn aitady mamandar. Jalpy, käsıporynda atalmyş salanyŋ jılıgın şaǧyp, maiyn ışken 20 maman jūmyspen qamtylypty.
– Būl jūmys özıme qatty ūnaidy. Bar ynta-şyntammen ısteimın. Alaida mūndai qyruar jūmysty men jalǧyz jürgızıp jatqan joqpyn. Mūny otbasylyq käsıp dep aituǧa da bolady. Öitkenı qaramaǧymdaǧy jūmysşylardyŋ köpşılıgı – özımnıŋ tuysqandarym. Auyldaǧy tuǧan aǧalarym men ınılerımdı şaqyrtyp aldym. Olardyŋ arasynda käsıbi jihaz jasau şeberlerı de bar. Aǧa-ınılerımnıŋ de qolönerge būrynnan ebı bar-tūǧyn. Qazır olar būl salada äbden şyŋdalyp aldy. Jalpy, būl öner bızge ata-babamyzdan darysa kerek. Estuımızşe, kezınde atalarymyz tūrmysqa qajettı zattardy süiekten, aǧaştan oiyp jasaǧan desedı, – deidı biznesmen söz arasynda.
Käsıbım – näsıbım
Jihaz jasauşylar 500 şarşy metr bolatyn seh pen osyndai kölemdegı qoimany jäne 100 şarşy metrlık sauda ortalyǧyndaǧy butiktı jalǧa alyp otyr. Jalǧa aludyŋ ai saiynǧy şyǧyny 2 mln teŋgege jetıp jyǧylatyn körınedı.
Sehta Germaniia men Avstriianyŋ zamanaui tehnikalary qoiylǧan. Osynyŋ arqasynda käsıporynnyŋ būrynǧyǧa qaraǧanda jihaz jasaudaǧy mümkındıgı edäuır artqan. Qazır otandyq önım şetelden äkelınetın jihazdardan eş kem emes.
Degenmen älı de stanoktardyŋ jetıspeitının aitady käsıporyn basşysy.
– Basynda sändegışterdı gipsten qatyryp jasaitynbyz. Alaida onyŋ sapasy bız oilaǧandai bolmai şyqty. Sondyqtan aǧaştan jasalǧan daiyn materialdy satyp alyp jatyrmyz. Al ony özımızde jasaiyq desek, stanoktarymyz oǧan arnalmaǧandyqtan, kışkentai būiymnyŋ özıne 3-4 saǧat uaqyt ketıp qalady. Būl uaqytta bız qyruar şarua bıtıremız. Degenmen, aldaǧy uaqytta osyndai ūsaq-tüiekterdı de jasaudy qolǧa almaqpyz. Ol üşın taǧy da qymbat stanoktardy aluymyz kerek. Bıraq ondai būiymdardy oiatyn stanoktar 180 myŋ dollar tūrady. Oǧan äzırge qarjy jaǧy qolbailau bolyp tūr. Osyndai qūral-jabdyqtar alyp, seh salu üşın «Biznestıŋ jol kartasy – 2020» siiaqty memlekettık baǧdarlama boiynşa «Damu» qory men «Atameken» ūlttyq käsıpkerler palatasy arqyly jeŋıldetılgen nesie alsaq dep josparlap otyrmyz, – deidı «Ekskliuziv Damu» JŞS direktory M.Beiısbaev.
Alǧan betten qaitpaityn azamat zaman aǧymynan da qalys qalmai, ǧalamtordyŋ da qyr-syryn meŋgerıp alypty. Äleumettık jelıler arqyly biznesınıŋ jarnamasyn özı jasaidy eken. «Būryn jarnama mamanyna ai saiyn 70 myŋ teŋge töleitınmın. Endı özım de maşyqtanyp aldym. Qazır oǧan artyq şyǧyn şyǧarmaimyn. Jalpy, instagramm jelısı arqyly tapsyrystar köp tüsedı» deidı ol. Adal eŋbegın näsıp etıp otyrǧan käsıpkerge tasy örge domalai bersın dep tıledık.
