JOLDASBEKOVTIŊ JARQYN JOLY
Künı keşe ǧana Alatau bauraiyna jaiǧasqan äsem qalanyŋ tuǧan künı barşa sän-saltanatymen toilandy. Osy künı myŋjyldyq şahardyŋ örkendeuıne üles qosqan bırqatar adam «Almaty qalasynyŋ qūrmettı azamaty» ataǧyna ie boldy. Olardyŋ arasynda qoǧam jäne memleket qairatkerı, ǧalym, Ūlttyq Ǧylym akademiiasynyŋ akademigı Myrzatai Joldasbekov te bar.
Myrzatai aǧa 2000 jyldan berı Astana tūrǧyny. Sol jyly elordadaǧy L.Gumilev atyndaǧy Euraziia ūlttyq universitetınıŋ rektory qyzmetıne taǧaiyndalǧan ǧalym sodan berı bırneşe qyzmet auystyrsa da, sonyŋ barlyǧynda jürıp, Astana märtebesınıŋ artuyna, ataǧynyŋ asqaqtauyna zor eŋbek sıŋırdı. Özı basşy bolǧan joǧary oqu ornynyŋ qaq törıne ejelden örkeniettı el ekenımızdı däleldeitın Kültegın eskertkışınıŋ köşırmesın ornatqyzǧanyn aitpaǧanda, qazırgı ūrpaqty Abylai hannyŋ altyn zerlı qamqa tonymen, Qazdauysty Qazybek bidıŋ şapanymen, Baluan Şolaqtyŋ beldıgımen, taǧy basqa ata-babalarymyzdan mūra bolyp qalǧan qūndy jädıgerlermen qauyştyrdy.
Aǧanyŋ eŋbegı eskerılıp, Astana qalasy mäslihatynyŋ şeşımımen oǧan 2007 jyly tabysty memlekettık jäne qoǧamdyq qyzmetı, Qazaqstannyŋ elordasy – Astana qalasynyŋ qalyptasuy men damuyna qosqan ülesı üşın «Astana qalasynyŋ qūrmettı azamaty» ataǧy da berılgen bolatyn. Söz retı kelgende, ǧalym özı tuǧan Jambyl oblysynyŋ qūrmettı azamaty ekenın de aita keteiık.
Myrzatai Joldasbekov qazır de qyzmetten qol üzbei, Qazaq Ūlttyq öner universitetı janyndaǧy Qorqyt atyndaǧy ǧylymi-zertteu institutyna basşylyq etıp otyr. Professor M.Joldasbekovtıŋ jetekşılıgımen institut talai jūmystardyŋ basyn qaiyrdy. Aǧanyŋ ǧalymdyǧy, jazuşylyǧy, kompozitorlyǧy elge aian. Körkem ädebiettegı näzık janr sanalatyn dramaturgiiaǧa da at ızın salyp tūrady. Onyŋ aiqyn körınısı – kezınde Astanada aǧanyŋ qalamynan tuǧan «Ūlbike» pesasy qoiyldy. Ūlttyq öner universitetınde de Ūlttyq dästürler teatrynyŋ qūryluyna, ol öner ūjymynyŋ «Alpamys batyr» qoiylymyn sahnalanuyna Myrzatai Joldasbekov mol eŋbek sıŋırdı.
Al ǧalymdyq jolyna oralsaq, ol basqaratyn institut «Dästürlı qazaq önerı» antologiiasynyŋ 25 tomdyǧyn, «Aqyndar aitysynyŋ» 7 tomdyq taŋdamaly jinaǧyn şyǧarudy maqsat etıp, olardyŋ keibırı jüzege asty. Qazaq mädenietı tarihyna jäne şeşendık önerge, halyq aqyndarynyŋ şyǧarmalaryna, jyraulyq önerge, jyrşy-termeşılerge, änşı-kompozitorlarǧa, dästürlı änşıler men küişılerdıŋ şyǧarmaşylyǧyna arnap tom-tom eŋbekterdı şyǧaru jūmysy da jalǧasuda.
Alaqandai ǧana Aqtöbe auylynan bastalyp, Astanaǧa jetelep äkelgen jarqyn jolyŋyz jalǧasa bersın!
Amanǧali QALJANOV