Jürek auruynyŋ sebepterı qandai? Onyŋ alǧaşqy belgılerı qalai bılınedı?

Elımızde jürek-qan tamyrlary aurularynan ölım körsetkışı bırınşı orynda. Tek Astana qalasynda osy syrqattyŋ auyr türı boiynşa esepke alynǧandardyŋ qatary 47 606 adamdy qūraidy.

Jürek-qan tamyrlary aurularynyŋ jiılep ketuıne bailanysty Düniejüzılık densaulyq saqtau ūiymy 29 qyrküiektı – Jürek künı dep belgılegen edı. Ondaǧy maqsat – jūrtşylyqty keudesındegı jalǧyz jüregın aialauǧa, qandai da bır özgerıster bolsa, der kezınde därıgerge qaraluǧa şaqyru.

Osy künge orai Astana qalasy da «Jürektı saqta» atty aksiia ötkızdı. Qalalyq äkımdıktıŋ qoldauymen Densaulyq saqtau basqarmasy jäne «Salauatty ömır saltyn saqtau ortalyǧy» JŞS ūiymdastyrǧan şarada elordalyqtar bılıktı kardiologtar men endokrinolog mamannyŋ tegın keŋesıne jügınıp, qan qūramyndaǧy holesterin men qant deŋgeiın anyqtatyp, qan qysymyn ölşetuge mümkındık aldy.

«Mechta» sauda ortalyǧynda ötken aksiiaǧa adam köp jinaldy. Äsırese, kardiologtardyŋ aldynda kezek köp. Därıgermen tıldesuge äreŋ mümkındık aldyq. Özın №1 qalalyq auruhananyŋ därıgerımın dep tanystyrǧan kardiolog Küläş Qūlmūhanova bügınde adamdar jürek auruyna jiı şaldyǧatynyn aitty. «Jürek auruyna kınälı – eŋ äuelı adamdardyŋ özderı. Küigelektık, dūrys tamaqtanbau, araq pen temekıge üiırsektık, qozǧalystyŋ azdyǧy jürektıŋ özgerıske ūşyrauyna äkeledı. Būl aurudyŋ alǧaşqy belgılerı – jürek tūsynyŋ şanşyp, tamyr soǧysynyŋ jiı soǧuy. Alaida adamdardyŋ köbı oǧan uaqytşa jaǧdai dep qaraidy da, män bere bermeidı. Eger entıgıp, aiaǧyŋyzda ısık paida bolsa, bırden därıgerge körınu qajet» deidı kardiolog.

Därıgerdıŋ aldynda otyrǧan jas jıgıttı sözge tarttyq. Orda būzar jastaǧy azamat üşınşı qabatqa entıgıp äreŋ köterıletının aityp jatyr. Därıger tamyr soǧysyn tyŋdap, qan qysymyn ölşep edı, jüregı jiı soǧatyn bolyp şyqty. Būl da belgılı bır aurulardyŋ alǧaşqy belgısı.

Odan keiın qaralǧan egde tartqan er kısı köpten qan qysymy köterıletının jetkızdı. «Öte uaiymşylmyn. Uaiymdaǧan saiyn «davleniem» köterılıp, jüregım qatty soǧady» deidı. Kardiolog ol pasientke maily, quyrylǧan tamaqty şekteu kerektıgın, aşuşaŋdyq, küigelektık pen küizelıstıŋ bärı jürekke salmaq tüsırıp, aurudy asqyndyratynyn aityp, sabyrly boluǧa şaqyrdy.

Astana qalasy Salauatty ömır salty ortalyǧynyŋ üilestıruşısı Qanat Hamzinnıŋ aituynşa, «Jürektı saqtaŋyz» aksiiasynyŋ maqsaty jürek-qan tamyrlary auruyna jūrtşylyqtyŋ köŋılın audartyp, syrqatty erte bastan anyqtap, emdeu ekendıgın jetkızdı. Aldaǧy uaqytta da osyndai aksiialar jalǧasyn tappaq.

Qymbat TOQTAMŪRAT