Memleket basşysy Nūrsūltan Nazarbaev keşe Almatydaǧy The Ritz Carlton qonaqüiınde resmi aşylǧan XV Euraziia media forumynyŋ qatysuşylaryna joldaǧan qūttyqtau hatynda osyndai pıkırın bıldırdı. «Jedel özgerıp jatqan ǧalamda BAQ ärtürlı janjaldardyŋ otyn ürleuşıge ainalumen qatar, jahandyq tejeuşılık jäne halyqaralyq şielenıstı toqtatuşylyq rölın de atqara alady. Jurnalistikanyŋ jauapkerşılıgı osy jerden körınıs tabady» delıngen qūttyqtau hatta.
Elbasynyŋ pıkırınşe, bügıngı auditoriia täuelsız blogerler men äleumettık jelılerdegı balamaly aqparat közderın jiı paidalanatyndyqtan, klassikalyq jurnalistika senım daǧdarysyna ūşyraidy. «Būl – klassikalyq jurnalistikaǧa töngen syn-qaterdıŋ bırı. Alaida dästürlı BAQ-tardyŋ bäsekelestık artyqşylyǧy ärqaşan käsıbilıkke jäne sapaly kontentke negızdeledı. Būl jerde tek qana şynaiy jäne qoljetımdı aqparat pen jalǧan habarlardy tekseru arqyly auditoriiany özıne tartuǧa, BAQ-tyŋ obektivtı aqparat közı retındegı bedelın nyǧaituǧa bolady. Ol üşın aqparatqa degen aşyq qoljetımdılıktı damytyp, üzdıksız dialog jürgızıp otyrǧan jön. Jurnalist mamandyǧy qai uaqytta bolsyn qoǧamǧa adal qyzmet etudı jüzege asyrudyŋ jäne joǧary etikalyq qasietterdıŋ jiyntyǧy bolyp qaluy tiıs» degen Nūrsūltan Nazarbaev. Aita ketelık, Elbasynyŋ hatyn forumda Aqparat jäne kommunikasiialar ministrı Däuren Abaev oqyp berdı. Ol öz sözınde alqaly jiynnyŋ juyrda ǧana Astanada ötken ekonomikalyq forummen bailanysyp jatqanyna toqtaldy. Būl kezdeisoqtyq emes. Öitkenı media forumda talqylanatyn mäseleler küllı dünie jüzın alaŋdatyp otyr. Mūndai pıkırge XV Euraziia media forumynyŋ ūiymdastyru alqasynyŋ töraiymy Dariǧa Nazarbaeva da qosylatynyn atap öttı.
Ǧalamtordy aram niettıler de paidalanady
D.Nazarbaeva XV Euraziia media forumynyŋ resmi aşyluynda söilegen sözınde 16 jyl būryn alǧaşqy basqosu ötkennen berı älemde ǧalamat özgerısterdıŋ bolǧanyn aitty. «2002 jyly Almatyda bız alǧaşqy forumdy ötkızgende iPhone da, iPad ta, tıptı Facebook, Instagram, WhatsApp bolǧan joq. Būl jaŋalyqtar bızdıŋ ömırımızge qazır etene enıp kettı. «Peidjer» degen söz ūmytylyp, disk, telefondy eskı kinodan ǧana köretın boldyq. Teledidardyŋ jäşıgı sūiyq kristaldy ekranǧa ainaldy. Noutbuktardyŋ kün saiyn qanşama türlerı şyǧyp jatyr. Smartfondy qaltamyzǧa salyp jüretın künge jettık. Ǧalamtordyŋ ızdeu jüiesı arqyly kez kelgen aqparatty lezde tabamyz. Eŋ bastysy, älemdegı mediatūtynu da özgerdı. Jaŋa media jaǧdaiynda özın suda jüzgen balyqtai erkın sezınetın buyn düniege keldı» dedı D.Nazarbaeva.
Dariǧa Nūrsūltanqyzynyŋ pıkırınşe, ökınışke qarai, atalǧan innovasiialardyŋ barlyǧy älemdegı üzdıksız jürıp jatqan soǧystardy toqtatuǧa yqpal ete almai keledı. Halyqaralyq ahual şielenısıp tūrǧanda qarapaiym halyq saiasatkerler men BAQ ökılderınen jauapkerşılıktıŋ jaŋa deŋgeiıne köterıluıne ümıttenedı. «Öitkenı jahantordyŋ osynşa qoljetımdılıgı tek talantty adamdarǧa ǧana emes, aram niettılerge de mümkındık berude. Aqparattyq soǧystardyŋ közge körınbeitın jauyngerlerınen, jalǧan jaŋalyq taratuşylardan ülken qauıp tönude. Bıreuler menıŋ būl sözımdı qūptamauy mümkın. Endeşe, būl taqyryp forumnyŋ şeŋberınde qyzu talqyǧa tüsetını anyq» dep atap öttı Dariǧa Nūrsūltanqyzy.
Qyzu pıkırtalas alaŋy
Jyl saiyn būl forumǧa 60 elden 500-den asa delegat jinalady. Biylǧy on besınşı bas-
qosuda «Halyqaralyq qatynastardaǧy evoliusiia», «Europalyq Odaqtyŋ evoliusiiasy», «Aqparattyq tehnologiialar evoliusiiasy», «Qoǧamdaǧy senım evoliusiiasy», «Qorşaǧan ortanyŋ evoliusiiasy», «Media evoliusiiasy», «Qūndylyqtar evoliusiiasy» degen taqyryptarda qyzu pıkırtalastar örbıdı. Alqaly jiynǧa qatysuşylardyŋ qatarynda İtaliianyŋ eks-premer-ministrı, senator Matteo Rensi, EQYŪ-nyŋ BAQ bostandyǧy boiynşa ökılı Arlem Dezir, amerikalyq saiasi tehnologiia mamany, Barak Obamanyŋ prezidenttık nauqanynda keŋesşı bolǧan Rodjer Fisk, Gürjıstannyŋ būrynǧy Bılım ministrı Hatiia Dekanoidze, reseilık jurnalist Sofiko Şevardnadze, «Figaro» gazetınıŋ şoluşysy Reno Jirar bar. Aitarlyǧy sol, forum qonaqtary bır kün boiy jurnalisterge şeberlık därısın ötkızdı.
