Biyl jyldyŋ basynan bastap Astanadaǧy Mansap ortalyǧyna 2 830 jastar ötınım qaldyrǧan. Jūmysqa ornalastyru şaralarymen 1194 adam qamtylyp, onyŋ ışınde 785 azamat jūmysqa ornalastyrylǧan. Nätijesınde 112 maman tūraqty jūmysqa ornalasty, dep habarlaidy astana-akshamy.kz Astana qalasynyŋ kommunikasiialar qyzmetıne sılteme jasap.
Būl turaly bügın Astana qalasynyŋ kommunikasiialar qyzmetınde jastardy jūmyspen qamtu: alǧaşqy jūmys orny, jastar täjıribesı jäne ūrpaqtar kelısımşarty turaly ötken brifingte Astana qalasynyŋ «Eŋbek mobildılıgı ortalyǧy» QMM direktory Oljas Omar aitty.
-673 jas maman jeŋıldetılgen jūmys oryndyryna jıberıldı, onyŋ ışınde 114 maman «Jastar täjıribesı» baǧdarlamasy boiynşa memleket tarapynan qoldau alsa, 23 maman «Alǧaşqy jūmys orny» baǧdarlamasymen, 60 maman äleumettık jūmys oryndaryna, 476 maman qoǧamdyq jūmystarǧa ornalystyrylǧan. Jūmyssyz azamattardy jūmyspen qamtu jäne jūmysqa ornalastyru Astana qalasynyŋ «Eŋbek mobildılıgı ortalyǧy» KMM basty mındetterınıŋ bırı bolyp sanalady, – deidı spiker.
Astana qalasynyŋ «Eŋbek mobildılıgı ortalyǧy» QMM direktory jastardy jūmysqa ornalastyru maqsatynda ıske asyp jatqan alǧaşqy jūmys orny, jastar täjıribesı jäne ūrpaqtar kelısımşarty syndy üş baǧdarlamaǧa toqtaldy.
Alǧaşqy jūmys orny – alǧaş jūmys ızdep jürgen jūmyssyzdarǧa jūmys ornyn jäne qajettı eŋbek daǧdylaryn beruge baǧyttalǧan joba. Jobanyŋ şarttary boiynşa kepıldendırılgen jalaqy – 30 AEK (110 760 teŋge) qūraidy. Praktikadan ötu merzımı eŋbek ötılıne esepteledı. Mekemede tūraqty jūmysqa ornalasu mümkındıgı artady, ūzaqtyǧy 18 ai. Talap mamandyq boiynşa jūmys täjıribesınıŋ bolmauy, jasy 35 jastan aspauy tiıs.
Jastar täjıribesı (praktikasy) – kolledjder men joǧary oqu oryndarynyŋ tülekterıne mamandyǧy boiynşa bastapqy jūmys täjıribesın alu üşın arnalǧan. Jūmysqa ornalasuǧa qoiylatyn talaptar: universitet nemese kolledj diplomynyŋ 5 jyldan aspauy, käsıbi täjıribenıŋ bolmauy, jasy 35 jastan aspauy tiıs. Kepıldendırılgen jalaqy – 30 AEK (110 760 teŋge) qūraidy. Praktikadan ötu merzımı eŋbek ötılıne esepteledı. Jastarǧa tūraqty jūmysqa ornalasuǧa mümkındıgı artady.
Ūrpaqtar kelısımşarty – zeinetkerlık jasqa tolǧan jūmys ıstep jürgen qyzmetkerdı keiınnen auystyra otyryp, oqu oryndarynyŋ tülekterın jūmysqa ornalastyruǧa arnalǧan. Būl baǧdarlama şarty boiynşa jūmysqa ornalasatyn mamannyŋ universitet nemese kolledj diplomynyŋ 3 jyldan aspauy, jasy 35 jastan aspauy tiıs. Kepıldı jalaqy – 30 AEK (110 760 teŋge) qūraidy. Praktikadan ötu merzımı eŋbek ötılıne esepteledı. Mekemede tūraqty jūmysqa ornalasu mümkındıgı artady, ūzaqtyǧy 6 ai.
Sonymen qatar käsıpkerlık belsendılıktı arttyruǧa baǧyttalǧan ıs-şaralar aiasynda «Elektrondyq eŋbek birjasy» arqyly 158 jas, «Bastau Business» käsıpornynda 220 jas käsıpkerlık negızderıne onlain oqytudan öttı. 2023 jyldan bastap jastarǧa arnalǧan jeŋıldetılgen nesieleu baǧdarlamasy jüzege asyryluda. Şaǧyn nesie 21 men 35 jas aralyǧyndaǧy jas käsıpkerlerdı qoldauǧa baǧyttalǧan. Baǧdarlamaǧa jūmys ısteitın jastardyŋ ökılderı qatysa alady.
