Tūrmaǧanbet KENJEBAEV
Köktem taŋy, kökjiek mūnartady,
Qol būlǧaidy alysta ūlar tauy!..
Altyn şaşy tögılıp iyǧyna
Asqar şyŋǧa iegın kün artady.
Köktem taŋy…
Terbetıp tau samaly,
Emırenıp Ana – Jer busanady!..
Kümıs küige toltyryp sai-salany
Jyrşy būlaq syŋǧyrlap än salady.
Köktem taŋy…
Tırşılık tamyry – nūr,
Talpynady aşpaq bop qauyzyn gül…
Jyluymen jıbıtıp jer jüregın
Qyzuymen oiatqan Nauryz – būl!..
Köktem taŋy…
Tabiǧat ǧajap qandai!..
Dalaǧa şyq, säuleşım, qarap qalmai…
Qaz-qaz basqan qaraşy myna ömırge
Bır qūdıret qaitadan jaratqandai!..
Köktem keldı, qūt keldı, ömır keldı,
Baqyt keldı, baq keldı, sezım keldı!..
Arnasynan asardai alas ūrar –
Aqqu qūsy oralǧan köŋıl kölı!..
Köktem keldı, jyl keldı berekelı,
Qyzyl gülmen kömkerıp keŋ ölkenı.
Qūtty bolsyn, halaiyq, jaŋa jylyŋ,
Qarsy alaiyq Nauryz – merekenı!..
Äset AMANJOLOV
Este qalar būl köktem nesımenen,
Bar mūŋymdy keledı keşıp öleŋ!
Sol jaǧynda keudemnıŋ bır uys et,
Tulaidy kep ümıt qyp nesıbeden.
Jalǧyzsyrap jabyqsa jetım jelık,
Jüdetedı auyr oi etımdı emıp.
Küdık, Ümıt sanamda teŋelıptı,
Köktemdegı kün men tün sekıldenıp.
Sezım syilap töbemde kün küledı,
Osy köktem özgerter mümkın menı.
Boi tazartar jaŋbyrdyŋ jauary anyq,
Köŋıl būlty keudemde kürkıredı.
Taŋǧajaiyp tättı ömır bastalarda,
Kez qylmasyn taǧdyrym tas qamalǧa.
Qoimasa eken būl köktem men ūnatqan,
Arulardy ǧaşyq qyp basqa janǧa.
Bılegıne taǧatyn bılezık en,
Baqyt tabar jan bar ma bır özınen.
Tolǧan aidai tabyntar talai aru,
Toŋy jıbıp, mūz qatqan mınezınen.
Taǧy könbei yrqyma qyŋyr ūl – mūŋ,
Teŋselttı kep tıregın tūǧyrymnyŋ.
Keler, keter köktemı jyldarymnyŋ,
Qalai öter köktemı ǧūmyrymnyŋ…
Erkeǧali BEISENOV
Ūly künde tauyp mezgıl bır retın,
Atqarǧandai qasiettı mındetın.
Jaratylys nūryn bölıp Jaratqan,
Jylyna bır teŋelgen sät Kün men Tün.
Jan baiytyp jūrttyŋ jyly lebızı,
Izgı jolda sairap jatty el ızı.
Oryndadyq naqyştaryn Nauryzdyŋ,
Salt-dästürge bai ūltpyz ǧoi, negızı.
Aqqa tiıp aǧaiynnyŋ auyzy,
Artty bır kün Nauryz köje maŋyzy…
Boiyndaǧy närın bergen aiamai,
Tabiǧattyŋ adamǧa joq qaryzy!
Asyl jandar qysqy sürden as qamdar,
Bel alady berekelı bastaular.
Jaqsylyqtar jiyntyǧy äz-Nauryz,
Jamandyqty ötken jylǧa tastaŋdar!
Kün-ernımen aspan jerdı süiedı,
Kemseŋdeidı būlt-saqaldy iegı…
Jandy-jansyz qūbylysty qamtyǧan,
Merekelık ūǧym – tügel kielı!
Jūldyz TOIBEK
Aq qaryn syryp Aqpannyŋ,
Syldyrlap būlaq aqqan kün.
Kün menen Tün teŋesıp,
Tabiǧat tülep jatqan kün.
Äinekten üige üt kırıp,
Jettıŋ be, köktem küttırıp.
Mūsylman qauym qarsy aldy,
Äz-Nauryzyn tık tūryp.
Jyradan syldyr su aǧyp,
Qūstardan şyqty şu anyq.
Köktemge aman jetkenge,
Qartyŋ da tūr quanyp.
Eldıŋ jetıp auzy aqqa,
Mal ūzady tau jaqqa.
Balalar da bas qoidy,
Nauryz köje, bauyrsaqqa.
Hoş aitysyp, Qar – qyzyŋ,
Jettı jainap Nauryzym.
Halqymyzǧa qūt kelıp,
Arta bersın däm-tūzyŋ!
Bastauy bop Ūly ıstıŋ,
Alaşqa jettı Ūlys kün.
Jarşysy özıŋ jahanda,
Tatulyq pen yrystyŋ.
Dinara MÄLIK
Köktem kep kök maisasyn tösegen be,
Gülder öleŋ oqyp tūr köşelerde!
Jiyrma tört jyl jüregım
jaiqalǧaly,
Qanşa köktem qaldy eken peşenemde?!
Köktem kep kögertken be ainalany,
Qyz-ǧūmyr qyr basynda oilanady.
Köbelek-köŋıl qūrǧyr alyp-ūşyp,
Köktemnıŋ būrymyna bailanady.
Gül-älem şymyldyǧyn aşqany ma,
Körkemdık, qonyp aldy aspanyma.
Tünnıŋ ǧana isı şyǧuşy edı-au,
Künnıŋ isı sıŋıptı şaştaryma!
Şynymen, qanat bıtıp ūşqanym ba?
Ǧaşyq bop qalsam qaitem,
qas-qaǧymda?
Är säulesın keudeme qūiyp tūrmyn,
Aiyrbastap ala almai basqa mūŋǧa.
Köktem kep kök maisasyn tösegen be,
Gülder öleŋ oqyp tūr köşelerde.
Älıbek ŞEGEBAI
Köktem keldı,
Köktemmenen jyr keldı
«Bolamyn» dep özıŋmenen bırge endı.
Taŋ atqanşa taǧdyr jaily syrlasyp
Eske alystyq ötken-ketken künderdı.
Talai-talai tün azabyn şekkenbız,
Mūratqa da bırge jürıp jetkenbız.
«Küibeŋ tırlık» ortamyzǧa ot salyp,
Qaibır jyly ekı jaqqa ketkenbız.
Tūtqynyna ainaldyryp tünek – mūŋ,
Özımdı de, sezımdı de jüdettım.
Anda-sanda kelıp-ketıp tūratyn,
Amandyǧyn bılu üşın jürektıŋ.
Öleŋ kelıp,
Ömırım de özgerdı,
Körmei qalǧan köŋılıme köz berdı.
«Endı tastap ketpeşı» dep ötındım,
«Ketpeimın» dep ol da maǧan söz berdı.
Jürmeitūǧyn tuysqandyq, tanystyq,
Ömır ǧoi būl – ärı salqyn, ärı ystyq.
Köŋılımnıŋ ketken edı küzınde
Endı, mıne, köktem bolyp tabystyq.
Öleŋ kelıp,
Qūşaǧymdy aştyrdy,
Baqytymnyŋ baspaldaǧyn bastyrdy.
Jüregıme qonaqtaǧan aq qūsym –
Saǧynyştyŋ janarynda jas tūrdy!
