Қайырымдылық жасау – имандылықтың бір белгісі. Адамгершілікті жоғары қоятын біздің қоғамда қайырымдылық жасау өмір заңына айналған. Айлардың сұлтаны саналатын Ораза кезінде жүзеге асып жатқан сондай бір жарқын шараның бірі – жетім-жесірлер мен кембағал жандарға көмектесу.
Қадір түні қарсаңында Л.Н.Гумилев атындағы Еуразия ұлттық университетінің ректоры, ҚР ҰҒА академигі, Астана қаласы мәслихатының депутаты Ерлан Сыдықовтың қолдауымен Астана қаласындағы №14 сайлау округы аумағында көпшілікке тағылым боларлық қайырымдылық шарасы өтті. «Ата дәстүрімізден келе жатқан ізгі амал, сауапты қадамның қашанда өмірде алар орны ерекше, соны ұстанып, өміршең ету – бізге парыз» деген халық қалаулысы қала тұрғыны, ДЦП сырқатына шалдыққан Оралханова Нүрзия Еркінжанқызына қаржылай және заттай көмек қолын созды.
Нүрзия Еркінжанқызы 2005 жылы 22 ақпанда дүниеге келген. Туғаннан кейін арада 3 ай уақыт өтпей ДЦП сырқатына шалдыққан ол қазіргі таңда көп балалы отбасында тұрып жатыр. Ал анасы Зейнегүл Тоғжанова бес баланы пәтер жалдап тәрбиелеуде.
Қамкөңіл баламен жүздесуде халық қалаулысының көмекшісі Заңғар Орманша ректор атынан ең ізгі тілектерін білдіріп, салтанатты түрде сыйлықтар тапсырды. Қаржы-қаражат, киім-кешек, кітаптар берілді.
Нүрзия халық қалаулысының берген сыйлықтарына дән риза болып, шынайы алғысын білдірді. Шаттанғанын көрсеңіз! Жүздесу соңында сыйлыққа ие болған балақай мәз болып, ән салды. Қазақтың салты бойынша арнайы келген қонаққа дастарқан жайып, ризашылықтарын білдірді.«Бар жақсылық – балаларға» демекші, ел ертеңін тізгіндейтін ұрпаққа қамқорлық жасау, демеу көрсету – азаматтықтың жарқын көрінісі.
