Жуырда «Бауыржан» қайырымдылық қорының ұйымдастыруымен «Қазақстандағы қайырымдылық: бизнес және қайырымдылық» атты ІV халықаралық ғылыми-тәжірибелік конференция болып өтті. Онда қайырымдылық пен корпоративтік әлеуметтік жауапкершілік (КӘЖ) дегенді біз қалай түсініп жүрміз, шағын, орта немесе ірі бизнес өкілдерінің КӘЖ мәселелеріне көзқарасы қалай деген секілді сауалдарға жауап ізделді.
Жиынды «Нұр Отан» ХДП Төрағасының Бірінші орынбасары Бауыржан Байбек пен «Алтын Қыран» халықаралық қайырымдылық қорының Президенті Исламбек Салжанов ашып берген. Одан әрі Парламент Мәжілісінің депутаты Айгүл Соловьева, «Сандж» зерттеу орталығының директоры Жанар Жандосова, Украинадан келген ұжымдық әлеуметтік жауапкершілік пен тұрақты дамуды стратегиялық жоспарлау маманы Ростислав Куринько, «The Brookfield Group» холдингінің төрағасы Джейк Хейман мен ЮНИСЕФ ұйымының өкілдері қызу талқы алаңына айналдырды.
Шара барысында «КӘЖ көшбасшылары» атты фотоэкспозиция ұйымдастырылған. Осының аясында «Бауыржан» қайырымдылық қорының «Қайырымдылық қорын қалай ашып, оны қалай табысты қылуға болады?» атты кітабының тұсаукесер рәсімі де өтті.
Конференцияға Парламент Мәжілісінің депутаты, Халық Қаһарманы, генерал-лейтенант Бақытжан Ертаев та келіп қатысқан. Оның бұл күнде ауған соғысына қатысушылар мен Қарулы күштерде қызмет еткен ардагер азаматтардың құқын қорғап, жастарды патриоттық рухқа баулитын «Ер Батыр» атты патриоттық қор құрып, «Батыр» атты республикалық қоғамдық-патриоттық журналдың алғашқы нөмірін жарыққа шығарып үлгергені мәлім болды.
Еркежан СӘТІМБЕК
