Қайырымдылық көрсетті
Мүмкіндігі шектеулі жандар қоғам назарынан шет қалмайды. Соның бір көрінісіндей, жақында Астанадағы «Медхауз Казахстан» жауапкершілігі шектеулі серіктестігі елорданың Алматы ауданында тұратын бір топ мүгедекті Ораза айт мерекесімен құттықтап, сыйлықтар тарту етті.
«Қайырымдылық жасасаң, қайырын өзің көресің» деген сөзді басшылыққа ала отырып, «Медхауз Казахстан» ЖШС директоры Самат Исабаев аталмыш аудан аумағындағы 50 мүгедекке балдақ, таяқ және тағы басқа қажетті заттар сыйлады.
Өздеріне аса қажетті заттарға қол жеткізіп, мереке қарсаңында қуанышқа бөленген мүмкіндігі шектеулі жандар демеушіге шын ықылас білдіріп, алғыстарын жаудырды.
– Денсаулығыма байланысты таяқтың көмегінсіз жүре алмаймын. Бұрынғы таяғым ескіріп, жаңасын сатып алуға зейнетақымнан ақша артылмай жүр еді. Ораза айт қарсаңында көптен бергі ойым орындалып, қатты қуанып қалдым. Бәрімізге осындай шаттық сыйлаған демеуші азаматтарға, сонымен бірге Алматы ауданының жалғызілікті зейнеткерлер мен мүгедектерге үйде әлеуметтік қызмет көрсететін №2 бөлімшесінің ұжымына мың алғыс, – деді Қәртай аға Сәтімбеков.
Қамшының сабындай қысқа ғұмырда аялы алақан мен жан жылуын аңсаған жандарға қол ұшын бергенге не жетсін, шіркін! Ендеше, айлардың сұлтаны қасиетті Рамазанда ғана емес, күнделікті тірлікте қайырымды іс жасап, өзгелерге мерекелік көңіл-күй сыйлауды естен шығармайық, ағайын!
Гүлбаршын
МАМЫРАЙЫМОВА