Астана қаласының Қазақстан халқы ассамблеясы Алғыс айту күніне орайластырып достықты дәріптеген шара өткізді.
Елордамызда Достық үйінің болмауына байланысты осы күнге дейін этномәдени орталықтарының жұмысын бір жерден үйлестіріп, бір жерде бас қосуына мүмкіндік болмаған еді. Қала әкімдігінің қолдауымен «Маржан» бизнес орталығы орналасқан ғимараттың бір қабаты этномәдени орталықтарына бөлінді. Олардың шығармашылық ұжымдарына арналған кең залы да бар. Алдағы жазда өтетін ЭКСПО-2017 көрмесі қарсаңында біздің этномәдени орталықтарының күшімен қойылатын бірнеше концерттік бағдарламамыз жоспарланып отыр. Қазір костюмдерге тапсырыс беріп, дайындыққа кірісіп те кеттік» деді елордалық Ассамблея хатшылығының меңгерушісі Ләззат Құсайынова. Қалалық мәслихат депутаты Зейнулла Шибкенов ассамблея мүшелерін жаңа қонысымен құттықтап, жұмыстарына сәттілік тіледі.
Осында орын тепкен 11 этномәдени бірлестіктер «достық дастарханын» жайды. Әрбір мәдени орталықтардың өкілдері ұлттық ас мәзірін дайындап, баршасы бір дастархан басында жиналды.
Астаналық ассамблеяның қадірлі ақсақалы, «Вайнах» шешен-ингуш мәдени орталығының жетекшісі Салман Героев өз сөзінде қазақ халқына ықыласын білдірді.
– Алғыс айту күні өткен жылы алғаш рет Елбасының бастамасымен, мейірімділіктің, бүкіл қазақстандықтардың бір-біріне деген достығының жарқын мерекесі ретінде жария етілген болатын. Қазақ жеріне, қазақ халқына ерекше алғысты этностардың бірі – шешен-ингуштер. Сталиндік қуғын-сүргін кезінде біздерге пана болып, жер ауып келген халық аман қалды. Сол себепті сол ауыр күндерді ризашылықпен де еске аламыз. Қазақстан бүгінде достық мекеніне айналып отыр. Мәдени орталықтар ашып, өз тарихымызды, мәдениетімізді білуге бар мүмкіндік жасалып, қазақ жерінде қазақ халқының арқасында жасап жатырмыз, – деді.
Украин мәдени орталығының жетекшісі Тамара Ширмер де осы тілекке қосылып, қоғамдық келісім мен бірліктің арқасында қол жеткен жетістіктерін баяндады.
Бір қабатқа түгел орналасқан этномәдени бірлестіктерінің арасында құрылғанына биыл 10 жыл толып отырған өзбек ағайындардың орталығы да бар. Шерзод Пулатов жақында өткізген шығыс шайыры Әлішер Науаидің мұрасына арналған кеш туралы баяндап берді. Осы кеште қазақ, өзбек, орыс тілдерінде ақынның ғазалдарын оқыған студент жастар руханиятқа бойлап, екі елден келген қоғам қайраткерлерінің сұхбаты кешке мән бергенін қуана жеткізді.
Елордалық ассамблея жұмысын жандандырып, жаңа серпін берген оқиға Алғыс айту күні өтті. Оның өнегесі мен сыйластық үлгісі халықты топтастыратынына тағы да көзіміз жетті.
Айгүл УАЙСОВА
