Қалалық мәслихаттың заңдылық, құқық тәртібі және қоғаммен жұмыс мәселелері жөніндегі тұрақты комиссиясының мүшелері Ішкі істер департаментінде болып, елордадағы қоғамдық тәртіп сақшыларының жұмысымен танысты.
Н.Мещеряковтың төрағалық етуімен өткен көшпелі мәжілісте халық қалаулылары алдымен Астана қаласы Ішкі істер департаментінің бастығы, полиция генерал-майоры Амантай Әубәкіровті ел тәуелсіздігінің 22 жылдығы қарсаңында егемен еліміз бен еңселі елордамызды дамытуға қосқан үлесі үшін ҚР Президенті атынан алған мемлекеттік наградасымен құттықтады. Депутат Сапар Ахметов болса, «Нұр Отан» партиясы Төрағасының бірінші орынбасары Б.Байбектің атынан Алғыс хат тапсырды.
Одан әрі департамент бастығының орынбасары, полиция полковнигі Б.Есенбай елордада қоғамдық тәртіпті нығайту және қылмыстылықтың алдын алуды күшейту бойынша жүргізіліп жатқан жұмыстарға тоқталды.
Елбасы өзінің жыл сайынғы Қазақстан халқына Жолдауында осы мәселеге ерекше көңіл бөліп келеді. Бұл ретте аталмыш департамент Мемлекет басшысы жүктеген міндеттерді барынша сапалы әрі жедел жүзеге асыру бағытында бас қалада тәртіп пен тазалық орнатуға барынша маңыз беруде. Сала қызметкерлері қоғамдық тәртіпті сақтауда, азаматтардың конституциялық құқығы мен бостандығын қорғауда барлық күш-жігерлерін салып жүр. Әңгімені осыдан бастаған орынбасар бүгінгі таңда атқарылып жатқан шаралардың барлығы «ЭКСПО-2017» халықаралық мамандандырылған көрмесіне дайындық және оны өткізуге орай қалада қауіпсіздікті қамтамасыз етуге бағытталғанын жеткізді. Расында, қазіргі таңда қалада тәртіп бұзушылықтардың алдын алу мақсатында атқарылып жатқан жұмыс аз емес. Соның ішінде, ұсақ бұзақылықтар, қоғамдық орында ішімдік ішу, темекі шегу, шемішке шағу, қоқыс тастау, көпшілік орындарды бүлдіру, өзгелердің тыныштығын бұзу сынды факторлармен күрес күшейтілген. Көшелерде орнатылған бейнекамералардың осындай заң бұзушыларды анықтауға пайдасы зор. Өткен жылдың қорытындысы бойынша 43 мың тәртіп бұзушылық анықталса, бүгінгі таңда олардың саны 53 мыңнан асып отыр, оның 355-іне қамауға алу түрінде әкімшілік шара қолданылған. Сондай-ақ, жергілікті атқарушы органдармен бірлесе отырып, өз аумақтарын абаттандырмаған ұйымдар, атап айтсақ, 89 ПИК жетекшісі, 67 мердігер ұйым мен 202 құрылыс нысаны жауапкершілікке тартылды.
Дамыған қоғам барлық жерде тәртіп орнатудан басталатынын ескере келе, баяндамашы осы салада кадрлардың тұрақтамайтындығын, әсіресе, учаскелік инспекторлардың жеткіліксіздігін айта келе, құқық қорғау органдары қызметкерлерін әлеуметтік қолдау мәселесін көтерді. Сонымен бірге әмбебап полицейлердің жұмысына да тоқталды.
Сырттан ағылушылар қатарының көбеюіне байланысты қылмыстың өсуі, тұрғылықты жері жоқ, көше кезіп, тілемшілікке салынған адамдар арасындағы құқық бұзушылықтардың алдын алу жұмыстарының жеткіліксіздігі халық қалаулыларын бей-жай қалдыра алмады. Сонымен қатар, депутаттар жаңадан салынған тұрғын үй кешендері аумағына бейнебақылау камераларын орнату және тұрғын үй кешендерін салу кезінде жерасты паркингтерін қарастыруды ұсынды.
