Астанада ҚР Мәдениет және спорт министрлігі, Қазақстан халқы Ассамблеясы және Қазақстан театрлары ассоциациясының қолдауымен «ЭКСПО-2017» халықаралық мамандандырылған көрмесі аясында Қазақстан ұлттық (этникалық) театрларының IV республикалық фестивалі өтті. Бес күнге созылған фестивальге астаналық театрлармен қатар еліміздің түкпір-түкпірінен келген өнер ұжымдары қатысты.
Фестивальдің жабылу салтанатында әртүрлі аталымдарда топ жарған мәдени ошақтар мен жекелеген өнерпаздар марапатталды. «Жастар» театры көрермендердің назарына Ә.Кекілбайұлының «Нартәукел» спектаклін ұсынған еді. Бұл қойылымды сахналаған аталмыш театрдың көркемдік жетекшісі Нұрқанат Жақыпбай «Тарихи тақырыптағы режиссерлік шешім үшін» аталымында жеңімпаз атанса, басты рөлді сомдаған белгілі актер Әділ Ахметов «Үздік ер адам бейнесі» аталымының жүлдесін иеленді.
«Қазылар алқасына театр саласындағы белді, беделді адамдар жиналды. Әрине, олардың әрқайсысының талғамы да, танымы да бөлек. Сондықтан әр аталым бойынша жеңімпаздарды анықтау қиынға соқты. Десек те, бір жағдайда бәріміз бірауыздан шешімге келдік. Тарихи тақырыпты Нұрқанат Жақыпбай сияқты ешкім аша алған жоқ» деген қазылар алқасының төрағасы Талғат Теменов сөзін Қадыр ақынның «Талантты бағалаңдар тірісінде» өлеңінің жолдарымен тұздықтады.
Л. Толстойдың «Анна Каренина» спектаклінде басты рөлді сомдаған «Үздік әйел бейнесі» аталымында М. Горький атындағы мемлекеттік академиялық орыс драма театрының актрисасы Светлана Фортуна (суретте) топ жарды.
Республикалық мемлекеттік академиялық корей музыкалық театры көрсеткен Цой Ен Гынның «Патшайым болу оңай ма?» қойылымы үздік спектакль атанды. Сондай-ақ, «Режиссерлік ізденіс үшін», «Үздік сценография», «Екінші пландағы үздік ер адам бейнесі», «Екінші пландағы үздік әйел бейнесі», «Үміт», «Үздік актерлік ансамбль» аталымдарындағы жүлделер иелерін тапты. Шараның соңы ұлттық театрлар әртістерінің концертіне ұласты.
Бұл фестиваль Қ.Қуанышбаев атындағы мемлекеттік академиялық қазақ музыкалық драма театры үшін де табысты болды. Қаллекиліктердің «Аққудың көз жасы» лирикалық драмасын тамашалаған Лондондағы Айтматов академиясының басшысы Рахима Абдувалиева осы өнер ұжымын аталмыш қойылыммен Англия астанасының сахнасына шақырды.
Аманғали ҚАЛЖАНОВ
