Кеше Астана қаласындағы «ЭКСПО конгресс-орталығында» телекөпір өткізіліп, ол Индустрияландыру картасы жобаларын таныстыру мен
«Алтын сапа», «Парыз» сыйлықтарының жеңімпаздарын марапаттау рәсіміне арналды. Шараға Қазақстан Республикасының Президенті
Нұрсұлтан Назарбаев қатысты.
Телекөпір аясында еліміздің барлық өңірінен 11 тікелей көрсетілім беріліп, Мемлекет басшысының назарына Индустрияландыру картасының ең маңызды нысандары ұсынылды.
– Индустрияландырудың ең маңызды жобаларын іске қосу жыл сайынғы игі дәстүрге айналды. Біз бүгін металлургия, өнеркәсіп, құрылыс материалдары, машина жасау, көлік және логистика
салалары бойынша 25 жобаның іске асырылуын бастадық, – деді Президент.
Елбасы өзінің сөзінде сондай-ақ, индустрияландыру бағытын ауқымды еткеніміз дұрыс болғанын, оның уақыт талабына сай екенін атап өтті.
– Бүкіл еліміз бойынша бір мыңнан астам жаңа өндіріс іске қосылып, 100 мыңнан астам тұрақты жұмыс орындары ашылды. Біз бүгін «Giessenhaus» жауапкершілігі шектеулі серіктестігінің қалайы қоспасын шығаратын, келешекте автомобиль дискілерін жасайтын жобасын іске қостық. Бұл жұмыстарға POSKO, «Евразхолдинг», Tenaris, «Полиметалл» сияқты өз саласының көшбасшысы саналатын белгілі трансұлттық компаниялар тартылып жатыр, – деді Мемлекет басшысы.
Президент өндірістік кооперация және автомобиль құрастыру саласындағы ынтымақтастық мәселелерін айта келіп, еліміздің автозауыттарында электромобильдер құрастырудың басталғанына тоқталды.
– Қазіргі таңда Қазақстанда 18 белгілі брендке тиесілі автокөлік құралдарының түрлі модельдері жинақталуда. Біз оларды Қытайға, Ресейге, Тәжікстанға, Өзбекстанға және басқа да елдерге экспорттап жатырмыз, – деді Елбасы.
Нұрсұлтан Назарбаев шикізаттық емес сектордағы өндіріс көлемін арттыруға және оның ел экономикасындағы маңыздылығына ерекше тоқталды.
– Химия өнеркәсібі саласында «Еврохим» трансұлттық компаниясы күрделі тыңайтқыштар шығару жөніндегі зауыттың құрылысын бастады. 14 фармацевтикалық кәсіпорында халықаралық ДжиЭмПи стандарттары енгізілді. Бүгін «Химфарм» акционерлік қоғамы «Польфарма» ірі фармацевтикалық компаниясымен бірлесе жүзеге асыратын тағы бір жобаның іске асырылуы басталды. Құрылыс саласында негізгі құрылыс материалдары бойынша импортқа тәуелділікті жойдық. Heidelberg, KNAUF, Basf, Sika және басқа да шетелдік компаниялардың қатысуымен 180-нен астам жоба іске асырылды, – деді Мемлекет басшысы.
Елбасы бұдан әрі экономиканы әртараптандыру үшін инфрақұрылымды дамытудың маңызы зор екенін айта келіп, «Нұрлы жол» бағдарламасы аясында Еуразия мультимодель көлік дәлізінің іске қосылғанын және «Батыс
Еуропа – Батыс Қытай» халықаралық көлік дәлізі құрылысының аяқталғанын тілге тиек етті.
– Осы жылдар ішінде 2 мың
шақырым темір жол, 5 мың шақырым автомобиль жолы салынды. Теңіз және әуе айлақтарына қайта жөндеу жұмыстары жүргізілді. Құрық портында теміржолға және автомобильге арналған паром кешені іске қосылды. «Қорғас – Шығыс қақпасы» арнайы экономикалық аймағы және Ляньюньган теңіз порты жобаларын жүзеге асыру нәтижесінде Азия-Еуропа
бағытында Қазақстан арқылы жөнелтілетін контейнерлік жүк тасымалының көлемі жыл сайын еселеніп келеді. Бұл 2020 жылға қарай еліміздің тасымалдаудан түсетін табысын 5 миллиард долларға дейін арттыруға мүмкіндік береді, – деді Мемлекет басшысы.
Нұрсұлтан Назарбаев халықаралық «ЭКСПО-2017»
мамандандырылған көрмесінің табысты өткенін атап өтіп, Үкіметке көрмеде көрсетілген баламалы және жаңартылатын энергия көздері саласындағы ғылыми жетістіктерді тәжірибеге енгізіп, қолдану үшін жүйелі жұмыс жүргізуді тапсырды.
– ЭКСПО аумағында «Астана» халықаралық қаржы орталығы, «Жасыл» технологиялар мен инвестицияларды дамыту жөніндегі халықаралық
орталық, ІТ-стартаптар халықаралық технопаркі құрылатын болады. Олардың уақтылы іске қосылып, толық жұмыс істеуін қамтамасыз ету керек, – деді Н. Назарбаев.
Мемлекет басшысы «Цифрлық Қазақстан» мемлекеттік бағдарламасы аясында 4.0. Индустриясының технологияларын енгізіп, бұл салада индустриялық тұрғыдан
дамыған елдермен және
ЕАЭО-ға мүше мемлекеттермен ынтымақтастықты нығайту қажет екенін мәлімдеді. Бұған қоса, Елбасы цифрлық технологиялар саласындағы заманауи машықтарды меңгерген мамандарды дайындаудың маңызды екенін атап көрсетті.
Нұрсұлтан Назарбаев елімізде көптеген трансұлттық компаниялар мен стра-
тегиялық инвесторлар табысты жұмыс істеп жатқанын айтты. Осыған орай, Мемлекет басшысы Үкіметке шет елдерге шығарылған капиталды елге қайтару үшін мүмкіндік туғызу, қазақстандық тауарларды
экспорттық нарықтарда ілгерілету жөнінде шаралар қабылдауды, сондай-ақ кәсіпкерлікті дамытуға және бизнес ортаны жақсартуға ерекше мән беруді тапсырды.
