Әлемде 70-інші және Қазақстанда алғаш рет падел спорты іске қосылды. Орталықтың салтанатты ашылуына Астана қаласы әкімінің орынбасары Есет Байкен, Испанияның Қазақстандағы Төтенше және өкілетті елшісі Хорхе Урбиола Лопес де Монтенегро, Ресей падел федерациясының президенті Антон Бернацкий, бокстан Лондон Олимпиадасының чемпионы Серік Сәпиев қатысты.
«Баршаңызды еліміздегі алғашқы падел орталығының ашылуымен құттықтаймын. Мемлекет басшысы Қасым-Жомарт Тоқаев әрдайым бұқаралық спорттың дамуына көңіл бөлуде. Падел орталығының ашылуы елордамыздың 25 жылдығымен тұспа-тұс келіп отыр. Аталмыш спортпен қала тұрғындары шұғылдануы арқылы тек қана елімізде ғана емес, әлемдік деңгейдегі көшбасшылардың біріне айналады деп сенемін» деді Есет Байкен.
Падел орталығы Қабанбай батыр даңғылындағы 47/1-үйде, үстел теннисі орталығы ғимаратының артында орналасқан. Падел федерациясының бас хатшысы Арслан Әбілғазин бұл спорт түрі жас таңдамайтынын айтады.
«Бұқаралық және балалар спортын дамыту мақсатында елімізге жаңа спорт түрі – паделді әкелуді жөн көрдік. Жарты жылдан астам уақытта әртүрлі қиындыққа қарамастан, Астана қаласында алғашқы 4 падел кортын орнаттық. Біз бұл корттарды Испаниядан жасатып әкелдік. Бұл спорттың ерекшелігі, жас таңдамайды. Кез келген адам 1-2 ойнағаннан кейін-ақ үйреніп кетеді. Осы орайда еліміздегі алғашқы бапкерлерді Ресейде дайындап, 1 жаттықтырушыны Испаниядан әкелдік. Біздің мақсатымыз – паделді ел ішінде танымал спорт түріне айналдыру. Алдағы уақытта Алматы қаласында және облыс орталықтарында падел орталығын ашуды жоспарлап отырмыз» деген ойымен бөлісті ол.
Паделдің барлық құралы үстел теннисі орталығында сатылады. Кортта ойнаудың 1 сағаты шамамен 6-7 мың (бапкермен 10 мың) теңгені құрайды.
