«ҮМІТ» АНЫҚТАҒАН ҮЗДІКТЕР
Жұмыспен қамту және әлеуметтік бағдарламалар басқармасының қолдауымен мүмкіндігі шектеулі балаларды өмірге бейімдеу мақсатында «Үміт» атты арбамен билеу сайысы өтті.
Тағдырдың жазуымен арбаға таңылғандардың тамаша өнерінің бірі – арбадағы би (wheelchair dancing) деп аталады. Өнердің бұл түрі өткен ғасырдың алпысыншы жылдары алғаш рет Англияда пайда болып, Еуропаға тараған еді. Бүгінде мүмкіндігі шектеулі жандардың жігерін де, талантын да ұштаған қос доңғалақ үстіндегі би елордалықтарға да жат емес.
– Жас бишілеріміз екі ай бойына тынымсыз даярлықтан өтті. Соның арқасында Софья Климова, Марат Сейтімов, Алтыншаш Мұқатаева, Мұхтар Дәурен есімді бишілеріміз үздік өнерімен марапатқа ие болды, – дейді «Аяла» қоғамдық бірлестігінің жетекшісі Салтанат Мусина.
«Жалпы, ерекше сайысқа қатысқандардың бәрі – жеңімпаз. Өйткені, олар бойындағы үрейді үмітке жеңдіріп, әдемілікке ұмтылған жан-дүниесі арқылы өздерінің қатар-құрбыларына үлгі бола білді» дейді ұйымдастырушылар.
Айгүл УАЙСОВА