Жақында Тұңғыш Президент – Елбасы Нұрсұлтан Назарбаевтың «Штрихи к портрету» деректі фильміне берген сұхбатына негізделіп жазылған жаңа кітап жарыққа шығады. Бұл туралы Елбасының баспасөз хатшысы Айдос Үкібай мәлімдеді. «Алдағы күндері Елбасының «Штрихи к портрету» деректі фильміне берген сұхбаты негізінде кітап жарыққа шығады. Кітапқа жобаның телевизиялық нұсқасында көрсетілмеген материалдар енгізілген» деп жазды ол Twitter-дегі парақшасында.
Кітаптың авторы – Нұрсұлтан Назарбаевтан сұхбат алған журналист Айгүл Әділова. «Штрихи к портрету» – Нұрсұлтан Назарбаевтың өмірі мен қызметіне арналған көп бөлімді деректі фильм. Фильм Елбасының эксклюзивті сұхбаты негізінде түсірілген. Бірінші бөлім 1 желтоқсан – Қазақстанның Тұңғыш Президенті күні көрермен назарына ұсынылды.
«Нұрсұлтан Назарбаев Мемлекет басшысы қызметін атқарған кезде әлемнің 75 еліне ресми сапармен барып, шетел президенттерімен және үкімет басшыларымен 1500-ден аса кездесулер өткізген. Телевизиялық сұхбатқа енгізілмей қалған әңгіменің біразы осы кітапта айтылады. Сұхбатта Нұрсұлтан Назарбаев үлкен саясаттың шымылдығының арғы жағындағы құпиялармен бөлісіп, тәуелсіз елді қалыптастыру жолындағы мәселелерді ашық әңгімелейді. «Штрихи к портрету» жақында «Меломан» дүкендер желісінде сатыла бастайды. Тәуелсіз елдің тарихын тереңірек танып-білгісі келетін әр қазақстандықтың үйінде осы кітап болуға тиіс деп ойлаймын» деп жазды Айгүл Әділова кітап туралы.
