ЖӘРМЕҢКЕ ЖАЛҒАСУДА
Өткен демалыста «Қазақстан» спорт сарайы аумағында еліміздің 4 өңірінен келген тауар өндірушілердің кезекті жәрмеңкесі өтті.
Онда Ақмола, Қызылорда, Атырау, Батыс Қазақстан облыстарының тауар өндірушілері астаналықтарға 600 тонна азық-түлік өнімін ұсынды. Қала базарындағы бағадан 10-15 пайызға төмен бағамен ұсынылған азық-түлік өнімдері сапасымен де тартымды болды.
Мәселен, жылқы етінің 1 келісі – 1500 теңге, сиыр етінің 1 келісі 1250 теңге тұрады. Алып келген азық-түлік өнімінің түрлері де әртүрлі. Ет және сүт өнімдері, көкөніс пен жеміс-жидектер, күнбағыс майы, үн-жарма, түрлі дақылдар мен балық сияқты тағам өнімдерінің 35-тен астам түрі ұсынылды. Дәстүр бойынша қала тұрғындары мен қонақтары өңірлік шығармашылық ұжымдардың концерттік бағдарламасын тамашалады.
Келесі демалыстағы кезекті жәрмеңкеге Атырау, Ақтөбе, Оңтүстік-Қазақстан және Қостанай облыстарының тауар өндірушілері келеді.