Елорданың Қорғаныс істері жөніндегі департаменті әскерден оралған жас жауынгерлерді салтанатты түрде қарсы алу іс-шарасын ұйымдастырды.
Пойыздың Алматыдан Астанаға келуінің өзі де ерекше болды. Перронда Қарулы күштер мен Ауған соғысы ардагерлері, «Жас сарбаз» республикалық әскери-патриоттық қозғалысының тәрбиеленушілері, сарбаздардың ата-аналары, туыстары мен достары жиналды.
Запасқа шыққан әскери қызметшілерді әскери оркестрдің әуенімен сүйемелдеп қарсы алған теміржол бойы нағыз мерекелік алаңға айналды. Түр-тұлғасын ерекшелеп тұратын көгілдір берет киген десантшыларға балалар қызыға қарады.
– Қарулы күштердің бөлімшелерінде шымыр және жан-жақты жақсы дайындалған жастарды жинаймыз. Бұл – олардың келешегіне жақсы жолдама. Армия мектебінен өткен адамның жұмысқа орналасуда да өзіндік артықшылығы барына нық сенімдімін, – деді Астана қаласы Қорғаныс істері жөніндегі департаменті бастығының орынбасары, майор Артур Қасқарауов. Ол сондай-ақ сарбаздарға сәттілік тілеп, патриот балаларды тәрбиелеген ата-аналарына алғысын білдірді.
