Бозбалаларды әскери-патриоттық бағытта тәрбиелеу мақсатында елордада орналасқан №68655 әскери бөлімінде «Жаужүрек мың бала» әскери-патриоттық ойындар ұйымдастырылды.
Қалалық Жастар саясаты мәселелері басқармасының ұйытқысымен өткен ойынға 18 команда қатысты. Астаналық жоғары оқу орындары, колледж бен мектеп құрама командалары 8 сайыстан сүрінбей өтті. Жігіттер әскери эстафета мен кросқа қатысып, жартылай автоматты винтовкадан оқ атты. «АК» автоматын бөлшектеп, кейін оны қайта жинады. Қанатты өткел арқылы бөгеттен, ал бөгет астынан еңбектеп қақпанға өтті. Ең мықтылары гранатаны нысанаға лақтырып, бөгет жолына дейін жетті.
Әскери-патриоттық ойындардың жеңімпаздарын басқарма басшысы Асхат Оралов марапаттады. Ойын қорытындысы бойынша I орын иегері Қазақстан технология және бизнес университеті, II орын – кәсіби-техникалық колледж, ал III орын политехникалық колледжге бұйырды. Одан бөлек, 8 байқаудың әрқайсысынан үздік атанған сарбаз бағалы сыйлықтармен марапатталды.
Жастар саясаты мәселелері басқармасының басшысы Асхат Ораловтың пікірінше, әскери жарыстардың жастардың патриоттық рухын оятудағы рөлі зор.
Гүлдана Талғатқызы
