ЖАЗ ЫСТЫҒЫНДА – ЖАҒАЖАЙДА
«Шомылушылар есіл суының санитарлық жағдайынан қорықпауына болады» деп сендіреді мамандар
Елордалықтардың дені Есілге шомылып, шілденің аптабында жағажайда тыныстағанды тәуір көреді. Осындайда демалушыларға ең қолайлы орын – Орталық саябақтағы жағажай екені белгілі. Биылғы жаз аптабымен шомылу маусымын қыздыра түскендей. Алайда, өзен суы санитарлық талаптарға қаншалықты сай? Осыны білмек үшін әуелі Астана қаласы бойынша Тұтынушылар құқығын қорғау департаментінің коммуналдық нысандарды бақылау бөлімінің басшысы Қарлығаш Әбдішеваға хабарласқан едік.
– Елорданы екі бөліп жатқан Есіл өзенінің 50 шақырымдай бөлігінің санитарлық жағдайы толығымен біздің қадағалауымызда деп айтуға болады. Ағынды су өзін-өзі тазалайды деп айтсақ та, Есілдің суы лайланып, ластанатын кезі ерте көктемнің басына келеді. Қар еріп, жылғалардан аққан қызыл су Есілдің арнасына құйылғанда судың құрамының санитарлық көрсеткіштерінде қалыпты жағдайдан ауытқушылықтар болады. Алайда, жер дегдігенде, ағынды сумен өзеннің арнасы тазарып, суы табиғи қалпына келеді.
Шомылу маусымы басталғалы да судың санитарлық жағдайын ұдайы тексеріп отырмыз. Жалпы, бекітілген тәртіп бойынша шомылатын кезеңнің басында жыл сайын кемінде екі рет химиялық және микробиологиялық көрсеткіштер бойынша химиялық-микробиологиялық тексеруден өткізу қажет. Шомылу кезеңінде жағажайдағы су айына екі рет химиялық-микробиологиялық тексеруден өткізіледі (сынама кемінде екі жерден алынады). Су шомылу аймағынан бір километр жоғары ара қашықтықтағы ағыннан және шомылу аймағының екі жағынан 0,1-1,0 километр ара қашықтықтағы судан, сондай-ақ шомылу аймағының шекарасынан алынады, – дейді Қарлығаш Әбдішева. Маманның айтуынша, жаз басталғалы бері өзен суынан отыздан астам сынама алыныпты. Барлық микробиологиялық, санитарлық, химиялық, вирусологиялық, паразитологиялық көрсеткіштер бойынша тексеруден өткізілді. Оның қорытындысы бойынша, Есілдің суы барлық талаптарға сай деп айтуға болады.
Алайда, мәселенің бір ұшы суда малту кезіндегі қауіпсіздікке келіп тіреледі. Қалалық жағажайда қайғылы жағдайларға жол бермес үшін құтқарушылар күндіз-түні кезекшілік етеді. Елордалық Төтенше жағдайлар департаментінің қызметкерлері қауіпсіздік ережелерін насихаттап, тиісті ақпараттармен қамтиды. Шомылуға тыйым салынған жерлерде тыйым салу белгілері орнатып, оны қадағалау жұмысы да осы ведомствоның міндеті.
– Суда құтқару қызметі адамдардың өмірін қорғау жұмыстарымен қатар, табиғи, техногендік сипаттағы апаттардың салдарын жою, суға кеткен адамдарды іздестіру қызметтерін атқарады. Маусым басталғалы бері суға батқан 17 адамды құтқардық, – дейді қалалық ТЖД Судағы құтқару қызметінің басшысы Ермек Әлібеков.
Расында да, шомылуға арналған, көлемі үш жүз метрге созылып жатқан қалалық жағажайдың жағасы ойпауыт емес, табанында ой-шұқыры жоқ тегіс келген. Шомылуға арналған судың шегі қалтқы-белгілермен айқындалған. Айдынының түбі балдырлардан, бұтақтардан, үшкір тастардан ада. Жағасына жұмсақ құм төселген, күннен тасалайтын қалқандар, жататын орындар мен орындықтар, себезгілер, киім ауыстыруға арналған кабиналар, әжетханалар, ауыз су бұрқақтарымен жабдықталған жағажайдың жайы жанға жайлы деп айтуға болады. Алайда, кейбір жандар осындай жан-жақты жағдай жасалмаған, оңаша жерде түсеміз деп су түбіне тартылып кетіп, қайғылы жағдайға душар боп жататыны жасырын емес. Сондықтан да мамандар тек белгіленген жерлерде ғана малтуға кеңес береді.