ЖҰМЫССЫЗДЫҚҚА ЖОЛ ЖОҚ
Екі қолға бір күрек іздеген жастар 9 шілде күні «Конгресс-холл» сарайына жиналды. Астана қаласы әкімдігінің қолдауымен ұйымдастырылған бос жұмыс орындар жәрмеңкесіне 150-ден аса компания қатысты.
«Жұмыссыз жүрген елордалықтардың үштен бірі – 20 мен 29 жас аралығындағылар. Бүгін оларға зор мүмкіндік берілді. Бұл компаниялар 500-дей бос жұмыс орнын ұсынып жатыр. Шет тілі пәнінің мұғалімі, инженер, қызмет көрсету саласының мамандықтары үлкен сұранысқа ие» дейді «Астана жастары» коммуналдық мекемесінің бөлім басшысы Аида Санат.
«BI-group» компаниясының өкілі Назгүл Сүтемгенованың айтуынша, жұмыс сұрап баратын жастардың жартысынан көбі – сәулет-құрылыс факультетінің түлектері. «Әсіресе, Л.Гумилев атындағы Еуразия ұлттық университетін бітірушілер бізге жиі келеді. Біздің компания – ірі инвестициялық холдинг және Қазақстанның жылжымайтын мүлік нарығындағы танымал көшбасшы болғандықтан, бұл талпыныстарын жақсы түсінеміз. Таңнан бері 2-3 сағат ішінде 100-ден аса жас өз түйіндемелерін тастап кетті» дейді компания маманы. Шынында да, басқа үстелдерге қарағанда, осы кәсіпорынның төңірегін жағалаушылар көп. Солардың бірі – Дастан Талғатұлы. Ол Еуразия ұлттық университетінің ақпараттық технологиялар факультетін биыл бітіріпті. Бұған дейін «Қазақстан темір жолы», Сыртқы істер министрлігінде өндірістік тәжірибеден өткен екен. Бүгінгі жәрмеңкеден өзі қалаған қызмет түрін табуға үмітті.
Көлік механигі, жүргізуші сияқты жұмыстар да – тапшы мамандықтар қатарында.
№4 автобус паркінен келіп отырған Гүлмира Нұрғалина осыны айтты. «Қала ішінде қатынайтын автобустар мен мектеп автобустарының жүргізушісі, электрик, тегістеуші, медбикелер керек қазір бізге. Біліктілікті арттыру курстарында тегін оқытамыз. Айлық жалақылары 100 мың теңгеден жоғары» дейді ол.
Ботакөз МАРАТҚЫЗЫ