АХМАТОВАНЫҢ ӘЛЕМІ
Ақын Анна Ахматова туралы баршамыздың хабарымыз бар. Ал суретші Райкүл Ахматова есімін естігендеріңіз бар ма? Жуырда Астана қаласының мемлекеттік мұрағатында ТМД-ның құрылғанына 25 жыл толуына орай көрме ұйымдастырылды.
Онда Бішкек қаласының мемлекеттік мұрағаты қорынан алынған құжаттар мен фотосуреттермен қатар, ЮНЕСКО жүлдесінің иегері, Қырғыз Республикасының еңбек сіңірген мәдениет қайраткері Райкүл Ахматованың жұмыстары жұртшылық назарына ұсынылды.
Көрмеге Қазақстан мен Қырғыз Республикасы араларында әртүрлі хронологиялық кезеңдердегі тарихи қарым-қатынасты қамтитын фотоқұжаттар қойылған. Атап айтсақ, 1992 жылғы Бішкек қаласындағы Орталық Азия елдерінің және Қазақстанның мемлекет басшыларының кездесуі, 2001 жылғы Қырғыз Республикасының астанасына
Қазақстан Президенті Нұрсұлтан Назарбаевтың сапары бейнеленген.
Суретші Райкүл Ахматованың шығармашылығын сөз етсек, елордадағы көрмеге оның 70-тен астам туындысы қойылды. Оның 20-дан астамы картиналар болса, 50-і – кәдесыйлар. Картиналардың арасында «Бокелей атамның жастық шағы», «Балалық шағымның кітабы», «Пасха аралына арнау», «Мегаполис ырғақтары», «Динамикалық тепе-теңдік», «Қысқы соната» сынды суреттердің бояуы көз тартады. Суретші өз шығармашылығында кәдімгі киіз бен жібекті де қолданады. Көрмеге жиналған аталмыш техникада орындалған жұмыстарды да тамашалады.
Көрменің ашылуында сөз алған Астана қалалық мемлекеттік мұрағатының директоры Балқия Баймағамбетова аталмыш көрме халықаралық деңгейдегі екінші шара екенін айтып, алғашқысы «Астана – Еуразия жүрегі» атауымен Омбыда ұйымдастырылғанын еске салып өтті. Сондай-ақ, Бішкек қаласының мемлекеттік мұрағатының директоры Жұмабай Бечеков пен Райкүл Ахматова сөйлеп, екі елдің бауырластығы, туысқандығы жөнінде әңгіме өрбітті.
Аманғали ҚАЛЖАНОВ