Елордада тұрғындар үшін маңызды міндеттерді қамтитын «20 нақты бастама» қолға алынды. Соның 16-қадамы «Жол апаты кезіндегі кісі өлімін 30 пайызға, апаттық жағдайды 40 пайызға төмендетуді көздейді. Ол бойынша жол қозғалысы сызбасын өзгерту, айыппұл жүйесін оңтайландыру, жеке автокөлікті пайдалану қарқынын және апатты жағдай тудыратын орындардың жылдамдық қозғалысын төмендету қарастырылған.
Естеріңізде болса, Астана агломерациясының орнықты дамуы жөніндегі кеңес отырысында 15 жоба таныстырылған болатын. Соның бірі – «Қауіпсіз көлік» жобасы. «Жалпы жол» қауіпсіз жол қозғалысы қауымдастығы ұсынған жоба биліктің назарын аудара отырып, жолдағы қауіпсіздікті арттыруды көздейді.
Айта кетейік, Арсен Шакуов басқаратын ұйым 2013 жылы құрылған. Содан бері еліміздің әрбір өңірінде өтетін жол қозғалысына қатысты барлық мәселелердің бел ортасынан табылып жүр.
Safety Car Astana
Бұл арнаулы автокөлік жол қозғалысы қауіпсіздігін мониторинг жүргізу арқылы қадағалайды, жолдағы құқықбұзушылықты анықтап, қала ішіндегі қауіпті көшелерге талдау жүргізеді. Бағдарлама аясында көлік жүргізушілерінің мәдениетін көтеруге назар аударылып отыр. Арсен Шакуовтың айтуынша, қауіпсіз және тұрақты көлік инфрақұрылымын дамытуда әрі экологиялық ахуалды жақсартуда әрбір тұрғынның қоғамдық көліктерді пайдаланғаны тиімді.
Арсен Шакуов, «Қауіпсіз көлік» жобасының жетекшісі: – Біз ұсынған жоба Астана қаласы бойынша жол қозғалысы мәселелерін зерттеуге мүмкіндік береді. Онда барлық бағыт бойынша жол-көлік ережесін бақылау қолға алынады. Біздің мақсат – жол-көлік қозғалысы ережесінің бұзылуын анықтау және осы мәселені түбегейлі шешудің жолын қарастыру бойынша қала әкімдігіне ұсыныстар беру.
Қараңғыда көрін!
Соңғы уақытта балалардың қатысуымен болатын жол-көлік апаттары жиі тіркеледі. Ресми деректер жол-көлік оқиғасы кезінде көбінде зардап шегетін жас балалар екенін айтады. Бұл жоба аясында осы мәселелерді шешудің жолдары қарастырылған. Мәселен,
«Мектепке қарай қауіпсіз жол» және «Үйге қарай қауіпсіз жол» деп аталатын жобаларда балалардың үйден мектепке, мектептен үйге қайтуы кезінде олардың қауіпсіздігіне тікелей көңіл бөлінбек. Ол бойынша әрбір мектептің Қауіпсіздік паспорты жасақталады.
Сондай-ақ, жаяу жүргіншілер жолындағы қауіпсіздікті шешудің бір жолы – балаларды жарығы бар білезікпен қамтамасыз ету. Барлық қаржылық институттарды, сақтандырушы компаниялар мен басқа да ұйымдарды осы әлеуметтік жобаға тарта отырып, жарығы бар білезіктерді Астана қаласының оқушыларына тегін таратуды ұйымдастыру қолға алынбақ.
Educations Pack
Бұл – мектепке дейінгі және мектеп жасындағы балаларға арналған жоба.
«Жол қозғалысы ережелерін үйрету мен оқытудың жаңа әдістемесін қамтиды. Көлік қауіпсіздігін тұрақты дамыту – салауатты өмір салтының кепілі. Осы орайда «Kiss and Go» жобасы да қолға алынбақ. Оқушыларды автобусқа отырғызу және түсіру кезіндегі қауіпсіздікке назар аударамыз» дейді Арсен Шакуов.
Сонымен қатар, елордалық полицейлермен тікелей қарымқатынас жолға қойылып, олардың қатысуымен сауаттылықты арттыратын семинарлар ұйымдастыру, апат кезінде алғашқы көмек көрсету жолдарын меңгерту жүзеге асатын болады.
Сайып келгенде, мұның бәрі Астана стратегиясымен үндеседі. Қала тұрғындарының қауіпсіздігі – биліктің назарында. Ендеше, осындай әлеуметтік жобалардың жүзеге асуы нәтижесін береді дейді сала мамандары.
Гүлмира Аймағанбет
