Қазір мемлекеттік органдар көбінесе мәселе ушығып бара жатқаннан кейін, басқаша айтқанда, «болары болған соң» барып қимылдайды. Мәселенің алдын алу үшін тиісті түсіндірме жұмыстарын жүргізу жоқтың қасы. Жауапты мекемелер осы жағын ойлай қоймайды. Сондықтан халыққа қажет ақпарат уақытында жетпейді. Астана қаласы мәслихатының мемлекеттік ақпараттық саясатты іске асыруға арналған қоғамдық тыңдауында мәслихат депутаты Мирас Шекенов осындай орынды пікір айтты.
Мысал үшін ол көмірге, қоғамдық көліктегі жаңа жолақы жүйесіне қатысты халықтың түсініспеушілігін келтірді. Бұл тұрғыдан тиісті басқармалар ақпаратты тарату жағынан олқылық жіберіп алғанын жеткізді. Ақпараттық саясат талқыланған жиында өзге депутаттар да назар аударатын жағдайларды атап көрсетті. Негізгі баяндаманы жасаған қалалық Қоғамдық даму істері басқармасының басшысы Данияр Есин осы бағытта атқарылып отырған жұмыстармен таныстырды.
Оның айтуынша, мемлекеттік ақпараттық саясатты үйлестіру және оны тиімді түрде іске асыру үшін қаладағы барлық басқарма басшыларының бірінші орынбасарларынан құралған жұмыс тобы құрылды. Қалалық басқармаларда БАҚ-пен жұмыс істейтін жауапты қызметкерлер бекітілді. Мемлекеттік саясаттың негізгі бағыттарын насихаттау бойынша 18 жеке медиа-жоспар әзірленді. Резонансты жағдайлар туындағанда үш сағаттың ішінде әрекет ету механизмі енгізілді. Жедел ақпарат алмасу мақсатында чат-мессенджерлер құрылды. Әлеуметтік мәселелер негізінен iKomek орталығына келіп түскен өтініштер мен хабарламалар арқылы шешіледі. Радиолар халыққа қажет, пайдалы ақпаратты жедел таратуға сеп болуда.
«Зерттеу нәтижелеріне жүгінсек, Қазақстан халқының 70 пайызы әлеуметтік желілерді қолданып, 30 пайызы оларға немқұрайлы қарайды. Бұл жағынан Астана көш бастап тұр, астаналықтардың 88 пайызы желіні қолданады. Осыған байланысты жергілікті атқарушы органдарының жаңалықтарын танымал әлеуметтік желілерде тарату жұмысын жүргізіп отырмыз» деді Д.Есин.
Қазір Астанада 367 бұқаралық ақпарат құралы тіркелгенін, оның 259-ы тұрақты түрде жұмыс істеп тұрғанын (баспа құралдары – 208, электронды құралдар – 51), 18 телеарна мен 12 радио ақпарат таратып отырғанын жеткізген баяндамашы маңызды мемлекеттік бағдарламалардан астаналықтарды ақпараттандыру деңгейі жоғары екенін айтты. Атап айтқанда, Президенттің бес әлеуметтік бастамасы бойынша ақпараттандыру деңгейі 78,4 %, «100 нақты қадам» Ұлт жоспары бойынша 72,8 %, «Рухани жаңғыру» бағдарламасы бойынша 71%, «Нұрлы жол» мемлекеттік инфрақұрылымды дамыту бағдарламасы бойынша 70,9 % құрайды.
Бірқатар басқарма басшысы халықты ақпараттандыру жұмысы бойынша есеп бергеннен кейін құрамына «Астана ақшамы» және «Вечерняя Астана» газеттері мен «Elorda.info» сайты кіретін «Elorda Aqparat» ЖШС директоры Қайсар Жұмабайұлы қос газет материалдары негізінде Астананың 20 жылдығына тарту ретінде қазақ және орыс тілдерінде шығатын кітаптар әзірленіп жатқанын, онда елорданың бастауынан осы күндерге дейінгі шежіресі қамтылатынын айта келе, басылымдардың бағыттарымен таныстырды. Газеттердегі «Депутат дауысы» және «Вестник депутата» беттерін қазіргідей екі айда бір емес, айына бір немесе екі реттен шығару ұсынысын айтты.
Мәслихат депутаты Қарақат Абден өзінің зерттеуінше, әлеуметтік желіде көбінесе тұрғын үй-коммуналдық шаруашылық, көлік, білім мәселелері бойынша арыз-шағымдар түсетінін жеткізді. Басқармалар тиісті жұмыстарды жүргізгенімен, халықтың бұл жұмыстардан хабары аз болып жатқанын, жастар әртүрлі мәселелер бойынша ақпарат таба алмаған соң өзіне көп сұрақ қоятынын айтты. «Википедияда» Астана туралы мәлімет беретін ресми парақша жоқтығын, бар болса орыс тілінде ғана екенін және әртүрлі, бір-біріне сәйкес келмейтін ақпараттарды ғана қамтығанын айтқан депутат елорданы әлемдік деңгейде насихаттау, бас қалаға туристерді тарту мақсатында осы олқылықты толтыру керектігіне назар аударды. Оның пікірінше, тиісті парақша орыс тілімен қатар қазақ, ағылшын, түрік және өзге тілдерде де болуы керек.
