ارداگەرلەر مەن جاستار كەزدەستى
ەلدىڭ تۋىن كوتەرىپ, تاۋەلسىزدىك تالاپتارىن ورىنداۋ ىسىنە باتىل بەتبۇرىس جاساعان بۇگىنگى تاڭدا ادامزاتتىق يگىلىكتەردى, حالقىمىزدىڭ عاسىرلار بويى ارمانداعان مادەني-رۋحاني مۇراعاتتارى مەن ۇلتتىق ءتالىم-تاربيە سالاسىنداعى, ءبىلىم جۇيەسىندەگى ىزدەنىستەرىن كورسەتۋ ارقىلى جاستاردىڭ بويىندا ۇلتتىق سانانى قالىپتاستىرۋ – باستى مىندەت. وتانشىلدىق تاربيەدە اسىرەسە ۇلى وتان سوعىسىندا ەرلىك كورسەتىپ, جەڭىسكە ۇلەس قوسقان اكە-اتالاردىڭ ءرولى ايرىقشا.
وسى ماقساتتا جەڭىستىڭ 78 جىلدىعىنا وراي ەلورداداعى كاسىپتىك-تەحنيكالىق كوللەدجدە «جاستارعا پاتريوتتىق تاربيە بەرۋ» تاقىرىبىندا سالتاناتتى ءىس-شارا ءوتتى.
ەسىل اۋدانى جاستارىنا پاتريوتتىق تاربيە بەرۋ جونىندەگى كوميسسيا ۇيىمداستىرعان ءىس-شاراعا قاتىسۋشىلار اراسىندا اۋعان سوعىسى ارداگەرلەرى مەن تىل ەڭبەككەرلەرى سالمان گەروەۆ, رىستى اتىعاەۆا, تالعات سولتىباەۆ, رافايل ابلاكوۆ جانە كوللەدج ستۋدەنتتەرى بولدى.
كەزدەسۋگە كەلگەن ءجاسوسپىرىمدەر ارداگەرلەردىڭ عيبراتتى دا قىزىقتى اڭگىمەلەرىن ىقىلاسپەن تىڭدادى. جيىندا سونداي-اق مەرەكەلىك كونتسەرت ۇيىمداستىرىلىپ, ارداگەرلەرگە سىي-سياپات تابىستالدى. اعا ۇرپاق وكىلدەرى اقىل-كەڭەسىن ايتتى. سونداي-اق پاتريوتتىق تاقىرىپتا سۇراق-جاۋاپ ۆيكتوريناسى ۇيىمداستىرىلدى.
ەڭ باستىسى, ارداگەرلەر مەن جاسوسپىرىمدەردىڭ كەزدەسۋىندە وتاندىق ءپاتريوتيزمنىڭ ۇرپاقتان-ۇرپاققا جالعاسىپ جاتقانى اڭعارىلدى.
جاستارعا پاتريوتتىق تاربيە بەرۋ ىسىندەگى جەتەكشى ءرول استانا قالاسىنىڭ ارداگەرلەر ۇيىمدارىنا تيەسىلى. ۇيىم جاستاردىڭ رۋحاني قۇندىلىقتارىن قالىپتاستىرۋعا, مادەني-تاريحي داستۇرلەر مەن ۇرپاقتار اراسىنداعى ساباقتاستىقتى ساقتاۋعا باعىتتالعان ۇلكەن جۇمىس جۇرگىزۋدە.
ورىك يمانعوجينا,
ەسىل اۋدانىنىڭ ەڭبەك ارداگەرى