1966 جىلدىڭ اقپان ايىندا تسەلينوگراد قالاسىنىڭ تىڭ يگەرۋشىلەر سارايىندا ۆاسحنيل-ءدىڭ كوشپەلى سەسسياسى ۇيىمداستىرىلدى. وسىندا وداقتىڭ قيىر-قيىرىنان جينالعان عالىمدار مەن تىڭ يگەرۋشى ديقاندارعا الماتىدان گاسترولدىك ساپارمەن كەلگەن قازاقستاننىڭ ونەر شەبەرلەرى كونتسەرت قويدى.
سول كۇنى قازاق كسر حالىق ءارتىسى, ساحنا شەبەرى عاريفوللا قۇرمانعاليەۆتى جۇرت اسا ءبىر ىستىق سەزىممەن قۋانا قارسى الدى. كوپ كوڭىلىنە وراي عارەكەڭ دە ايانىپ قالعان جوق. «ناق-ناق», «كوك ايداي» اندەرىن جەلدىرتە, شالقىتا ورىنداعان كۇمىس كومەي ءانشىنى تىڭ ديقاندارى ساعىنىپ قالسا كەرەك, قول سوعىپ, قوشەمەتتەپ, ۇزاق ۋاقىت ساحنادان جىبەرمەي قويدى. ول دا كوپتىڭ قالاۋى بويىنشا حالىق ءانى «ون التى قىز» بەن مۇحيتتىڭ ءانى «زاۋرەش», «اينامكوزدى», تاعى باسقا دا اندەردى مىڭ قۇبىلتا شىرقادى.
عارەكەڭنەن كەيىن جينالعاندار وپەرا جانە بالەت تەاترىنىڭ ءسوليسى, اتاقتى ءانشى, كسرو حالىق ءارتىسى ەرمەك سەركەباەۆتىڭ ساحناعا شىعۋىن تاعاتسىزدانا كۇتتى. مىنە, ول ساحنا ورتاسىندا. اسىرەسە باريتون داۋىستى وپەرا كوريفەيى ورىنداعان ءماديدىڭ «قاراكەسەگى» مەن حالىق ءانى «سۇرشاقىزدى» جۇرت ەرەكشە ءسۇيسىنىپ تىڭدادى. كوپشىلىكتىڭ وزىنە دەگەن اسقان قۇرمەتىن جاقسى تۇسىنگەن ءانشى دە اندەرىن اسا ءبىر تولقىعان شابىتپەن قۇيقىلجىتا, تەبىرەنە شىرقادى. ونەر شەبەرلەرىنىڭ كونتسەرتى زور ىقىلاسپەن تىڭدالدى.
عازيزا يساحان
