استانادا تەرروريزمگە قارسى ورتالىقتىڭ كەزەكتى وتىرىسى ءوتتى. وعان وسى ورتالىقتىڭ قۇرامىنا كىرەتىن مەملەكەتتىك ورگانداردىڭ, سونداي-اق باس پروكۋراتۋرانىڭ وكىلدەرى قاتىستى.
سوڭعى ۋاقىتتا قازاقستاندا «جالعان تەرروريزم» دەپ اتالاتىن كورىنىستەر ايتارلىقتاي ارتىپ, 2021 جىلمەن سالىستىرعاندا ءۇش ەسەگە ءوسىپ وتىر.
ينتەرنەت جەلىسى ارقىلى تارالاتىن ءانونيمدى حابارلامالارعا ەرەكشە نازار اۋدارىلادى. وسىنداي فاكتىلەرگە قارسى ءىس-قيمىل شارالارىن جەتىلدىرۋ ماقساتىنداعى وتىرىستا ۆەدومستۆوارالىق ءىس-شارالار جوسپارى ازىرلەنىپ, ماقۇلداندى. ورتا مەرزىمدى پەرسپەكتيۆادا حالىقارالىق جانە ۆەدومستۆوارالىق ءوزارا ءىس-قيمىلدى دامىتۋ, ماتەريالدىق-تەحنيكالىق جانە كادرلىق قامتاماسىز ەتۋدى نىعايتۋ, سونداي-اق وسى سالاداعى قۇقىقتىق نورمالاردى جەتىلدىرۋ بويىنشا جۇيەلى شارالار كەشەنىن ىسكە اسىرۋ كوزدەلدى. ءتيىستى ۆەدومستۆولاردىڭ وكىلدەرى قوعامدىق ساناعا مانيپۋلياتسيا جاساۋ مەن ازاماتتاردى لاڭكەستىك شابۋىلدار, سونداي-اق ەلدەگى جاعدايدى تۇراقسىزداندىرۋ قاۋپىمەن قورقىتۋدىڭ بارلىق ارەكەتتەرى قاتاڭ تۇردە توقتاتىلاتىنىن تىلگە تيەك ەتتى. سونىمەن قاتار, وتىرىستا تەرروريزمگە قارسى ءىس-قيمىل جونىندەگى جەدەل ىزدەستىرۋ قىزمەتىنىڭ مىندەتتەرىن شەشۋ اياسىندا ارنايى جانە قۇقىق قورعاۋ ورگاندارىنىڭ ءوزارا ءىس-قيمىل ماسەلەلەرى قارالدى. كەڭەسكە قاتىسۋشىلار جەدەل ءىس-شارالاردى وتكىزۋگە, تەرروريستىك قىلمىستاردى انىقتاۋ, جولىن كەسۋ, اشۋ جانە تەرگەۋ بويىنشا اقپارات جانە پراكتيكالىق تاجىريبە الماسۋ تەتىكتەرىن جەتىلدىرۋگە تارتىلعان باسشىلار مەن لاۋازىمدى تۇلعالاردىڭ بىلىكتىلىگىن ۇدايى ارتتىرۋ قاجەتتىگىن اتاپ ءوتتى.
سەرىك ايداروۆ,
ەۇۋ-ءدىڭ ستۋدەنتى
