نۇرا اۋدانى اكىمدىگىنىڭ قىزمەتكەرلەرى اۋماقتى ارالاۋ كەزىندە بوس جاتقان جەرلەرگە قوقىس توگۋگە بەتتەگەن كاماز كولىگىن بايقاپ قالادى. كولىكتىڭ سوڭىنان ىلەسىپ, رۇقسات ەتىلمەگەن جەرگە قۇرىلىس قالدىقتارىن توككەنىن كوزبەن كورىپ, فاكتىنى تىركەپ, تابيعات قورعاۋ پوليتسياسىنا جىبەرەدى.
كەيىنىرەك جۇك كولىگىنىڭ كىمگە تيەسىلى ەكەنى انىقتالىپ, زاڭ بۇزعان كاسىپكەرگە اكىمشىلىك ايىپپۇل سالىندى. ول كىناسىن تولىق مويىنداپ, ءوز ەسەبىنەن 30 كولىك جۇكتىڭ جالداۋ اقىسىن تولەپ, 700 توننا ستيحيالىق ءۇيىندىنى ارنايى پوليگونعا شىعاردى. نۇرا اۋدانى اكىمىنىڭ ورىنباسارى رۋسلان ورالوۆ اۋدان اۋماعىندا زاڭسىز قوقىس توگىلگەن 8 نەگىزگى ورىن انىقتالعانىن ايتادى.
«جۇيەلى تەكسەرۋلەر ناتيجەسىندە قالانى لاستايتىن جوسىقسىز كاسىپكەرلەردىڭ ءبىرى انىقتالدى. مىسالى, ءبىر كۇن بۇرىن ءبىزدىڭ قىزمەتكەرلەرىمىز وسى ۋچاسكەلەردى ارالاپ شىققان ەدى. ول كەزدە قوقىستىڭ كولەمى مۇنداي ۇلكەن ەمەس-ءتىن. سويتسەك, زاڭسىز قوقىس توگىپ جۇرگەن كاسىپكەرلەردىڭ تەك تۇندە كەلەتىنىن بىلدىك. اۋدان بويىنشا وسى باعىتتاعى جۇمىستى جالعاستىرامىز» دەدى ول.
استانادا قۇرىلىستاعى جانە باسقا دا ءىرى قالدىقتاردى قايتا وڭدەيتىن 2 پوليگون بار. باسقا ۋچاسكەلەرگە قوقىس توككەندەر زاڭ بويىنشا جازالانادى.
