استانا قالاسىنىڭ اكىمى جەڭىس قاسىمبەك ۇركەر ەلدى مەكەنىنىڭ تۇرعىندارىمەن كەزدەسۋدە كوتەرىلگەن ماسەلەلەر تۋرالى ايتتى.
«ۇركەر ەلدى مەكەنىنىڭ بەلسەندى تۇرعىندارىمەن كەزدەستىم. بۇل ەلدى مەكەندە ەڭ الدىمەن كارىز جانە ەلەكترمەن جابدىقتاۋ جەلىسىنىڭ ماسەلەلەرى شەشىلۋى قاجەت. قازىر وسى باعىتتا جۇمىس جۇرگىزىپ جاتىرمىز» دەدى شاhار باسشىسى تۇرعىندارمەن كەزدەسۋىندە.
سول سياقتى كەزدەسۋدە تۇرعىندار جول, تروتۋار, الەۋمەتتىك نىساندار, ايالدامالار سالۋ, اباتتاندىرۋ, جارىقتاندىرۋ سەكىلدى وزگە دە ماسەلەلەردى كوتەردى.
– مەكتەپ ماسەلەسى وزەكتى كۇيىندە قالىپ وتىر. ۇركەر ەلدى مەكەنىندە ەكى مەكتەپتىڭ قۇرىلىسىن جۇرگىزىپ جاتىرمىز. ونىڭ ءبىرى – ءبىر اۋىسىمدى, 900 ورىنعا ارنالعان, ەكىنشىسى – ءبىر اۋىسىمدى, 2000 وقۋشى ورنى. اتالعان مەكتەپتەردى 2024 جىلى قولدانىسقا بەرۋ كوزدەلگەن. بيىل دەنە شىنىقتىرۋ-ساۋىقتىرۋ كەشەنى سالىنىپ, پايدالانۋعا بەرىلەدى. كوتەرىلگەن ماسەلەلەردى شەشۋ بويىنشا ورىنداۋ كەستەسىن ازىرلەيمىز. جۇمىس كەزەڭ-كەزەڭىمەن جۇرگىزىلەدى, – دەدى جەڭىس قاسىمبەك.
