ساباقتاستىق جولىمەن ەلىمىزدە جاڭا پرەزيدەنتتىڭ سايلانۋى, استانا قالاسىنىڭ نۇر-سۇلتان بولىپ قايتا اتالۋى, جاستار جىلىنىڭ ايشىقتارى… 2019 جىل ەلدىڭ ەسىندە وسىنداي ەلەۋلى وقيعالارمەن قالدى. شىندىعىندا, سول جىلى ەرەكشە اتاپ وتۋگە تۇرارلىق وقيعالار از بولمادى. سولاردىڭ ءبىرشاماسىن جيناقتاپ كوردىك.
تۇڭعىش پرەزيدەنت وكىلەتتىگىن توقتاتتى
19 ناۋرىزدا ەلباسى نۇرسۇلتان نازارباەۆ قازاقستان حالقىنا ۇندەۋ جولداپ, پرەزيدەنت رەتىندەگى وكىلەتتىگىن توقتاتۋ تۋرالى شەشىم قابىلداعانىن مالىمدەدى. «ءاربىر ۇرپاقتىڭ اتقاراتىن ءوز مىندەتتەرى بار. مەن جانە مەنىڭ زامانداستارىم ەلىمىز ءۇشىن قولدان كەلگەننىڭ ءبارىن جاسادىق. ونىڭ ناتيجەلەرى وزدەرىڭىزگە بەلگىلى. الەم وزگەرىپ, جاڭا بۋىن كەلەدى. بۇل – تابيعي پروتسەسس. ولار ءوز زامانىنىڭ پروبلەمالارىن شەشەتىن بولادى. سونداي-اق ەلىمىزدى ودان ءارى وركەندەتۋ ءۇشىن بار كۇش-جىگەرىن جۇمىلدىرۋعا ءتيىس» دەدى ەلباسى. كونستيتۋتسيا بويىنشا سايلاۋ وتكەنگە دەيىن مەملەكەت باسشىسى قىزمەتىنە پارلامەنت سەناتىنىڭ توراعاسى قاسىم-جومارت توقاەۆ كىرىستى.
وزبەكستانداعى قازاقستان جىلى
ءساۋىر ايىندا تاشكەنتتە وزبەكستانداعى قازاقستان جىلى اشىلدى. ونىڭ اشىلۋ سالتاناتىنا قوس ەل پرەزيدەنتتەرى قاتىستى. «ءبىزدى ءتىلىمىزدىڭ بىرلىگى, ءدىنىمىز, ورتاق تاريحىمىز بەن ءبىرتۇتاس تاعدىرىمىز بىرىكتىرەدى. حالىقتارىمىز – ورتالىق ازياداعى ەجەلگى ءارى ۇلى وركەنيەتتىڭ مۇراگەرى. ءبىز ءداستۇرىمىزدى, بابالارىمىزدىڭ قۇندىلىقتارى مەن مادەني-تاريحي مۇرالارىن ساقتاپ قالدىق. سونىمەن قاتار, كوپتەگەن قيىن سىناقتاردى باستان وتكەردىك» دەدى قازاقستان پرەزيدەنتى قاسىم-جومارت توقاەۆ ءوزىنىڭ سويلەگەن سوزىندە.
استانا قالاسى نۇر-سۇلتان دەپ اتالدى
20 ناۋرىزدا پارلامەنت پالاتالارىنىڭ بىرلەسكەن وتىرىسىندا استانا قالاسىن نۇر-سۇلتان قالاسى دەپ قايتا اتاۋ تۋرالى قازاقستان پرەزيدەنتى
قاسىم-جومارت توقاەۆتىڭ ۇسىنىسىن ءماجىلىس جانە سەنات دەپۋتاتتارى ءبىراۋىزدان قولدادى. مەملەكەت باسشىسى ءوز سوزىندە ەلباسىنىڭ ەلەۋلى ەڭبەگىن ەسكەرۋ كەرەكتىگىن اتاپ ءوتىپ, مۇنداي ۇسىنىستى قازاقستان تاۋەلسىزدىگىنىڭ 25 جىلدىعى تۇسىندا دا پارلامەنت دەپۋتاتتارى ايتقانىن ەسكە سالدى. سول كۇنى ەلوردا ءماسليحاتىنىڭ دەپۋتاتتارى دا بۇل ۇسىنىستى ماقۇلدادى. ال 23 ناۋرىزدا مەملەكەت باسشىسى ءتيىستى جارلىققا قول قويدى.
جاستاردىڭ جول كارتاسى
جىل باسىندا «نۇر الەم» سفەراسىندا وتكەن جاستار فورۋمىندا ەلباسى نۇرسۇلتان نازارباەۆ جاستار جىلىن رەسمي تۇردە اشىپ بەردى. «جاستار – ەلىمىزدىڭ قازىرگى الەمدەگى باسەكەگە قابىلەتتىلىگىنىڭ نەگىزگى فاكتورى. قازاقستاننىڭ بولاشاعى سىزدەرگە, سىزدەردىڭ بىلىمدەرىڭىزگە, كۇش-جىگەرلەرىڭىز بەن پاتريوتتىق سەزىمدەرىڭىزگە بايلانىستى» دەدى ول فورۋمداعى سوزىندە.
قازاقستاندا جاستار جىلىن وتكىزۋدىڭ «جول كارتاسى» قابىلدانىپ, بۇل قۇجاتتا جاستاردى الەۋمەتتىك قولداۋدىڭ ناقتى شارالارى قاراستىرىلدى. ەلوردادا اتالمىش كارتاعا 101 جوبا ەنگىزىلدى. سوعان سايكەس جاستارعا بايلانىستى ەڭ وزەكتى دەگەن 11 باعىت بويىنشا 600-دەن استام شارا وتكىزۋ جوسپارلاندى. سونىڭ ءبىرى – جۇمىس ىستەيتىن جاستارعا باسپانا بەرۋ. سول جىلى باس قالادا ولارعا بەس جىل مەرزىمىنە, ساتىپ الۋ قۇقىعىنسىز 1050 جالدامالى پاتەر بەرىلدى.
توقاەۆ جەڭىسكە جەتتى
9 ماۋسىمدا وتكەن كەزەكتەن تىس پرەزيدەنتتىك سايلاۋدا قاسىم-
جومارت توقاەۆقا 6,5 ملن قازاقستاندىق نەمەسە سايلاۋشىلاردىڭ 70,76 پايىزى داۋىس بەرىپ, ول قازاقستان پرەزيدەنتى بولىپ سايلاندى. ورتالىق سايلاۋ كوميسسياسىنىڭ مالىمەتىنشە, جالپى تىزىمدەگى 11 947 995 ادامنىڭ 77,4 پايىزى ەلىمىزدەگى 9920 جانە شەتەلدەگى 48 سايلاۋ ۋچاسكەسىنە كەلىپ, ءوز تاڭداۋىن جاسادى. سايلاۋ پروتسەسىنە باقىلاۋشى رەتىندە ءارتۇرلى شەتەلدىك ۇيىمدار تاراپىنان 1013 ادام قاتىستى. رەسپۋبليكالىق ماڭىزى بار ءۇش قالانىڭ ىشىنەن نۇر-سۇلتان كوش باستاپ, سايلاۋشىلاردىڭ 68,9 پايىزى داۋىس بەرگەن.
جاڭا پرەزيدەنتتىڭ العاشقى جولداۋى
2 قىركۇيەك كۇنى مەملەكەت باسشىسى قاسىم-جومارت توقاەۆ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا العاشقى جولداۋىن جولدادى. وندا پرەزيدەنت تاۋەلسىزدىك جەتىستىكتەرىن ەسەلەپ, ەلىمىزدى دامۋدىڭ جاڭا ساپالى كەزەڭىنە شىعارۋ كەرەكتىگىن اتاپ ءوتتى. بۇعان ەلباسى ساياساتىنىڭ ساباقتاستىعىن ساقتاپ, جۇيەلى رەفورمالار جۇرگىزۋ ارقىلى قول جەتكىزە الاتىنىمىزدى ايتتى. «زامان تالابىنا ساي ءتيىمدى مەملەكەت», «ازاماتتاردىڭ قۇقىقتارى مەن قاۋىپسىزدىگىن قامتاماسىز ەتۋ», «قارقىندى دامىعان جانە ينكليۋزيۆتى ەكونوميكا», «الەۋمەتتىك جاڭعىرۋدىڭ جاڭا كەزەڭى», «قۋاتتى وڭىرلەر – قۋاتتى ەل» تاراۋلارىندا ەلىمىزدىڭ الداعى دامۋ باعىتتارىن ايقىندادى. سونىڭ ىشىندە «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ ورتاق مىندەت ەكەنىن اتاپ ءوتتى. ازاماتتىق قوعامدى دامىتۋدىڭ 2025 جىلعا دەيىنگى تۇجىرىمداماسىن ازىرلەپ, قابىلداۋدى تاپسىردى.
باس قالادا باس قوستى
4-6 قىركۇيەك كۇندەرى نۇر-سۇلتان قالاسىندا ازيا جازۋشىلارىنىڭ ءى فورۋمى ءوتتى. ايتۋلى جيىننىڭ اشىلۋىنا مەملەكەت باسشىسى قاسىم-جومارت توقاەۆ قاتىسىپ, ەلىمىزدە العاش ءوتىپ وتىرعان ازيا قالامگەرلەرى فورۋمىنىڭ جۇمىسىنا ساتتىلىك تىلەدى.
– بۇگىندە ءتول ادەبيەتىمىزدىڭ كوكجيەگى كەڭەيىپ, الەم ادەبيەتىنىڭ دامۋ كوشىنە قوسىلدى. قازاق قالامگەرلەرىنىڭ تۋىندىلارى ارقىلى دۇنيە ءجۇزى جۇرتشىلىعى ۇلتتىق رۋحانياتىمىزدى تانىپ بىلۋدە. قازاقستاندىق 30 جازۋشى مەن 31 اقىننىڭ شىعارمالارى بىرىككەن ۇلتتار ۇيىمىنىڭ 6 تىلىنە اۋدارىلىپ, جارىققا شىققالى وتىر. وسى تۋىندىلار 5 قۇرلىقتاعى 90-نان استام ەلگە, ياعني ەكى جارىم ميلليارد وقىرمانعا تارايدى. ازيا قالامگەرلەرى فورۋمى شىعارماشىل قاۋىمنىڭ ماڭىزدى ديالوگ الاڭىنا اينالۋى كەرەك. بۇل ماڭىزدى شارا ازيا ەلدەرىندە تۇراقتى تۇردە ءوتۋى قاجەت دەپ سانايمىن. ادامزاتتى تولعاندىرعان كۇردەلى ماسەلەلەر ءدال وسىنداي الاڭداردا ورتاعا سالىنۋى ءتيىس. ازيانى بۇكىلالەمدىك رۋحاني دامۋ ورتالىعى رەتىندە دامىتۋ ايرىقشا ماڭىزدى. سوندىقتان ادەبي ۇدەرىستەردى جاڭعىرتۋ ءۇشىن جاعداي جاساۋ – باستى مىندەتتەردىڭ ءبىرى. وسى ماقساتتا «ازيا الىبى» حالىقارالىق ادەبي سىيلىعىن تاعايىنداعان ءجون, – دەدى قاسىم-جومارت توقاەۆ.
سول كۇنى ەلورداداعى اباي كوشەسىنىڭ بويىنان قالامگەرلەر اللەياسى اشىلدى.
پىكىرلەسۋ الاڭىنا اينالدى
مەملەكەت باسشىسىنىڭ جارلىعىمەن ۇلتتىق قوعامدىق سەنىم كەڭەسى قۇرىلدى. «ۇلتتىق كەڭەس مۇشەلەرى, بەلگىلى قوعام قايراتكەرلەرى ەلىمىزدى جاڭعىرتۋ ىسىنە ەلەۋلى ۇلەس قوسادى دەپ سەنەمىن. بۇل – وتە ماڭىزدى مىندەت» دەدى بۇل تۋرالى پرەزيدەنت قاسىم-جومارت توقاەۆ. حالىق پەن بيلىكتىڭ ديالوگ الاڭىنا اينالعان كەڭەس قۇرامى 42 ادامنان جاساقتالدى.
7 اقپان – استانا قالاسى اكىمدىگى مەن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ «استانا – ادالدىق الاڭى» بىرلەسكەن جوباسى ىسكە قوسىلدى.
19 ناۋرىز – قازاقستاننىڭ تۇڭعىش پرەزيدەنتى نۇرسۇلتان نازارباەۆ ءوز وكىلەتتىگىن توقتاتۋ جونىندە ۇندەۋىن جاريالادى. كونستيتۋتسيالىق زاڭدىلىققا بايلانىستى پرەزيدەنت مىندەتى سەنات توراعاسى قاسىم-جومارت توقاەۆقا ءوتتى.
23 ناۋرىز – مەملەكەت باسشىسى قاسىم-جومارت توقاەۆ استانا قالاسىنىڭ اتاۋىن نۇر-سۇلتان قالاسى دەپ قايتا اتاۋ تۋرالى جارلىققا قول قويدى.
10 مامىر – استانانىڭ 20 جىلدىعىنا وراي ەلوردانىڭ شىعارماشىلىق ۇجىمدارى «استانادان اق تىلەك» اتتى مەرەكەلىك باعدارلامامەن ەل ايماقتارىنا اتتاندى.
27 اقپان – Nur Otan پارتياسىنىڭ 20 جىلدىعىنا ارنالعان سەزدە پارتيانىڭ «باقۋاتتى قوعام: ونجىلدىقتىڭ 10 ماقساتى» اتتى 2030 جىلعا دەيىنگى جاڭا باعدارلاماسى قابىلداندى.
20 ناۋرىز – مەملەكەت باسشىسى قاسىم-جومارت توقاەۆتىڭ جارلىعىمەن قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆقا «حالىق قاھارمانى» اتاعى بەرىلىپ, «التىن جۇلدىز» بەن «وتان» وردەنى تاپسىرىلدى.
16 مامىر – «شابىتتاندىراتىن وركەندەۋ: ادامدار, قالالار, ەكونوميكالار» تاقىرىبىمەن ءحىى استانا ەكونوميكالىق فورۋمى ءوتتى.
27 مامىر – نۇر-سۇلتان قالاسىنىڭ اكىمدىگى «ەكولوگيا جانە جاسىل ەكونوميكا كوشباسشىسى» ۇلتتىق كونكۋرستىڭ «ەكو-اكيمات» نوميناتسياسىندا جەڭىمپاز اتاندى.
12 ماۋسىم – قازاقستان پرەزيدەنتى قاسىم-جومارت توقاەۆتى ۇلىقتاۋ ءراسىمى ءوتتى.
24 ماۋسىم – ارىس قالاسىنداعى اسكەري ءبولىم اۋماعىندا الاپات جارىلىس بولدى. ءۇش ادام قازا تاۋىپ, 70-كە جۋىق ادام زارداپ شەكتى.
26 ماۋسىم – مەملەكەت باسشىسى قاسىم-جومارت توقاەۆ ومىرلىك قيىن جاعدايدا قالعان ازاماتتاردىڭ بورىش جۇكتەمەسىن ازايتۋ جونىندەگى جارلىققا قول قويدى.
9 قازان – نۇر-سۇلتان قالاسىندا ورتا ازيادا تۇڭعىش رەت «اقىلدى قالالار, اقىلدى دەستيناتسيالار» تاقىرىبىمەن بۇۇ-نىڭ بۇكىلالەمدىك تۋريستىك ۇيىمىنىڭ ءVىىى جاھاندىق ءسامميتى ءوتتى. جيىندا تۇراقتى دامۋ پرينتسيپتەرى نەگىزىندە قالالاردا ءتۋريزمدى دامىتۋ قارقىنىن ۇدەتۋ ماسەلەلەرى تالقىلاندى.
26 قاراشا – «استانا» فۋتبول كومانداسى ۋەفا ەۋروپا ليگاسى تۋرنيرىندە اتاقتى «مانچەستەر يۋنايتەد» كومانداسىن 2:1 ەسەبىمەن جەڭدى.
15 جەلتوقسان – ەلوردادا جازۋشىلار ءۇيى اشىلدى. جاڭا عيمارات قالا اكىمدىگىنىڭ قولداۋىمەن پايدالانۋعا بەرىلدى.
28 جەلتوقسان – الماتىدان نۇر-سۇلتان قالاسىنا ۇشىپ شىققان ۇشاق اپاتقا ۇشىراپ, 93 جولاۋشى مەن 5 ەكيپاج مۇشەسىنىڭ قازا بولعانىنا بايلانىستى ەلىمىزدە ازا تۇتۋ كۇنى جاريالاندى.
