التاي كولگىنوۆ,
نۇر-سۇلتان قالاسىنىڭ اكىمى,
Nur Otan پارتياسى نۇر-سۇلتان قالالىق فيليالىنىڭ توراعاسى
Nur Otan پارتياسىنىڭ 2025 جىلعا دەيىن ەسەپتەلگەن «وزگەرىستەر جولى: اركىمگە لايىقتى ءومىر!» سايلاۋالدى باعدارلاماسى – ەلباسى, پارتيا توراعاسى نۇرسۇلتان نازارباەۆتىڭ رەفورمالارى باعىتىنىڭ جالعاسى. سونىڭ ىشىندە ەلوردانى دامىتۋ جوسپارى نەگىزگى 13 باسىم باعىتتى قامتيدى. پارتيا باسقارۋشىلىق تاجىريبەگە جانە قويىلعان مىندەتتەردى ءتيىمدى شەشۋگە مۇمكىندىك بەرەتىن ماڭىزدى كادرلىق رەسۋرستارعا يە.
مەملەكەت باسشىسى قاسىم-جومارت توقاەۆ اتاپ وتكەندەي, پارتيا باعدارلاماسى ەلدىڭ الەۋمەتتىك ىلگەرىلەۋىنە جانە حالىقتىڭ ءال-اۋقاتىن ارتتىرۋعا باعىتتالعان ءتيىمدى, ناقتى شارالار كەشەنىن ۇسىنادى. باعدارلاما قازاقستاندىق قوعام ءومىرىنىڭ بارلىق سالالارىن قامتيدى.
بۇگىندە ەلوردادا پارتيانىڭ سايلاۋالدى باعدارلاماسىنا سايكەس ءتۇرلى سالالاردا اۋقىمدى جۇمىستار جۇرگىزىلىپ جاتىر.
«وزگەرىستەر جولى: اركىمگە لايىقتى ءومىر» باعدارلاماسىنىڭ ىشىنە 13 نەگىزگى باسىم باعىت كىردى. بۇل – قولجەتىمدى تۇرعىن ءۇي, ۇلەستىك قۇرىلىس, ءبىلىم بەرۋ, دەنساۋلىق ساقتاۋ, تۇرعىن الاپتاردى دامىتۋ, قوعامدىق كەڭىستىكتەر, گازداندىرۋ, جولدار, نوسەر كارىزدەرى جانە تازارتۋ قۇرىلىستارى, ەكولوگيا, شاعىن جانە ورتا بيزنەس, بۇقارالىق سپورتتى دامىتۋ جانە باسقالار.
50 مىڭ الەۋمەتتىك پاتەر سالىنادى
تۇرعىن ءۇي ماسەلەسى – پارتيانىڭ سايلاۋالدى باعدارلاماسىنىڭ باسىم باعىتتارىنىڭ ءبىرى. وتكەن جىلى, پاندەمياعا قاراماستان, ەلوردادا 3 ملن شارشى مەتردەن استام تۇرعىن ءۇي سالىندى, ونىڭ 80 پايىزى – جەكە ينۆەستيتسيالار. مەملەكەت باسشىسى جەڭىلدىكتى تۇرعىن ءۇي كولەمىن ۇلعايتۋ ماسەلەسىن ەرەكشە باقىلاۋدا ۇستاپ وتىر. مىسالى, ەگەر 2018 جىلى – 1100 الەۋمەتتىك پاتەر, 2019 جىلى 2900 جەڭىلدىكتى پاتەر سالىنسا, 2020 جىلى 7 مىڭنان استام الەۋمەتتىك پاتەر سالىندى. بۇل كورسەتكىش بيىل 10 مىڭ جەڭىلدىكتى پاتەرگە دەيىن ۇلعايتىلدى.
پارتيانىڭ سايلاۋالدى باعدارلاماسىنا سايكەس, 2021-2025 جىلدار ارالىعىندا جىل سايىن 10 مىڭ الەۋمەتتىك پاتەر سالۋ جوسپارلانۋدا. 4 جىل ىشىندە ەلوردا اكىمدىگى شامامەن 40 مىڭ جەڭىلدىكتى پاتەر سالادى. ياعني بەس جىل ىشىندە – 2021-2025 جىلدار كەزەڭىندە 50 مىڭ الەۋمەتتىك پاتەر بوي كوتەرەدى. بۇدان باسقا, 125 تۇرعىن ءۇي كەشەنى مەن 150 ءليفتىنى جوندەۋ, 300-دەن استام وتباسىنى اپاتتى ۇيلەردەن جاڭا قاۋىپسىز تۇرعىن ءۇي كەشەندەرىنە كوشىرۋ جوسپارلانۋدا.
ەلوردادا ەلباسىنىڭ باستاماسىمەن قولعا الىنعان «جۇمىس ىستەيتىن جاستارعا ارنالعان جالعا بەرىلەتىن تۇرعىن ءۇي» باعدارلاماسى جالعاساتىن بولادى. تاۋەلسىزدىكتىڭ 30 جىلدىعىندا ەلوردادا «Elorda Jastary» ارنايى تۇرعىن ءۇي باعدارلاماسى ىسكە قوسىلدى. بۇل باعدارلاما جاستارعا, سونىڭ ىشىندە تۇرعىن ءۇي جەلىسى بويىنشا جان-جاقتى قولداۋ كورسەتۋگە باعىتتالعان. «Elorda Jastary» باعدارلاماسىندا ءبىلىم بەرۋ, جۇمىسپەن قامتۋ, بوس ۋاقىتتى وتكىزۋ جانە ت. ب. باعىتتار قامتىلعان. تۇرعىن ءۇي سەرتيفيكاتىنىڭ سوماسى 1 ميلليوننان 1,5 ميلليون تەڭگەگە دەيىن ۇلعايتىلدى. «شاڭىراق» (5-10-20) تۇرعىن ءۇي سەرتيفيكاتىن الۋشىلاردىڭ ساناتىن كەڭەيتۋگە باستاماشىلىق جاسالدى.
سوزىلمالى قۇرىلىستار جونىندە شەشىم بار
جاڭا الەۋمەتتىك پاتەرلەر سالۋ, تۇرعىن ءۇي كەشەندەرىن جوندەۋ جانە اپاتتى ۇيلەردى سۇرۋدەن بولەك, پروبلەمالى نىسانداردىڭ قۇرىلىسىن اياقتاۋ بويىنشا دا اۋقىمدى جۇمىستار جۇرگىزىلۋدە. سوڭعى ەكى جىلدا ەلوردادا پروبلەمالى قۇرىلىس نىساندارىنىڭ سانى ەكى ەسەدەن استام قىسقاردى. 2019-2020 جىلدارى ەلوردادا 33 كوپپاتەرلى تۇرعىن ءۇي كەشەنىنىڭ قۇرىلىسى اياقتالىپ, پايدالانۋعا بەرىلدى. بەس مىڭنان استام ۇلەسكەر وتباسى كوپتەن كۇتكەن پاتەرلەرىنە كىردى.
2021 جىلى تاعى دا 7 مىڭنان استام وتباسى ءوز باسپانالارىنا كىرۋ باقىتىنا يە بولادى. بۇل – 57 ءۇي. ونىڭ 24-ءى بويىنشا قۇرىلىس-مونتاجداۋ جۇمىستارى اياقتالدى. 2022-2023 جىلدارى ۇزاق تۇرىپ قالعان باسقا كوپقاباتتى ۇيلەردى اياقتاۋ جوسپارلانۋدا. ءاربىر ۇزاق قۇرىلىس بويىنشا قادامدىق ءىس-شارالار جوسپارى بار. پارتيانىڭ سايلاۋالدى باعدارلاماسىنىڭ باعىتتارى ءىس جۇزىندە بارلىق ازاماتتارعا قامقورلىق كورسەتىپ, ولاردىڭ ءومىر سۇرۋىنە قولايلى جاعداي تۋعىزعانىن كورسەتەدى.
ەلوردا تولىعىمەن گازداندىرىلادى
پارتيانىڭ سايلاۋالدى باعدارلاماسىندا قالانى گازداندىرۋ باعىتىنا ەرەكشە كوڭىل بولىنگەن. ءومىر ءسۇرۋ ساپاسىن ارتتىرۋ ءۇشىن قالادا گازداندىرۋ بويىنشا جۇمىستار جۇرگىزىلۋدە: وتكەن جىلىتۋ ماۋسىمىنان باستاپ بىرقاتار تۇرعىن ءۇي الاپتارى گازعا كەزەڭ-كەزەڭىمەن قوسىلدى.
ەلوردانى گازداندىرۋ – ەلباسىنىڭ ستراتەگيالىق جوباسى. ول 2023 جىلى اياقتالادى دەپ جوسپارلانۋدا.
قازىرگى ۋاقىتتا الماتى جانە سارىارقا اۋداندارىندا 645 كم گاز تاراتۋ جەلىلەرى سالىندى. ماسەلەن, «كوكتال-1», «كوكتال-2», «جەلەزنودوروجنىي» تۇرعىن الاپتارىنىڭ, 150 مىڭنان استام ادام تۇراتىن «اگروقالاشىقتىڭ» ءبىر بولىگىنىڭ تۇرعىندارىندا جىلىتۋ ماۋسىمىنا قوسىلۋ مۇمكىندىگى وتكەن جىلدان باستاپ پايدا بولدى.
وسى كۇزدە «وڭتۇستىك-شىعىس», «پرومىشلەننىي», «اگروقالاشىق» (قوسىلماعان بولىگى) ەلدى مەكەندەرى تۇرعىندارى گازعا قوسىلۋ مۇمكىندىگىن الادى. سونداي-اق «قازترانسگاز ايماق» اق «كۇيگەنجار», «ميچۋرين», «ينتەرناتسيونالنىي» ەلدى مەكەندەرىندە گازبەن جابدىقتاۋ جەلىلەرىنىڭ قۇرىلىسىن جۇرگىزۋدە. ولاردى جىل سوڭىنا دەيىن گازبەن قامتاماسىز ەتۋ جوسپارلانۋدا.
گازداندىرۋ بارىسى – مەملەكەت باسشىسىنىڭ باقىلاۋىندا. وسى باعىتتا جىلۋ-ەلەكتر ورتالىقتارىن جاڭعىرتۋ بويىنشا جۇمىستار جۇرگىزىلۋدە: اعىمداعى جىلدىڭ سوڭىنا دەيىن قالعان سۋ جىلىتۋ قازاندىقتارى گازعا اۋىستىرىلادى. 3-جەو بويىنشا جوباعا تۇزەتۋ ەنگىزىلدى. قۇرىلىس-مونتاجداۋ جۇمىستارى, سونىڭ ىشىندە سۋ جىلىتۋ قازاندىعى دا قايتا جاڭعىرتىلدى.
قالاداعى حالىق سانىنىڭ ءوسۋىن ەسكەرە وتىرىپ, كارىز-تازارتۋ قۇرىلىستارىنىڭ (كوس-2) ۇزدىكسىز جۇمىس ىستەۋى جانە قالانى قوسىمشا اۋىز سۋ كولەمىمەن قامتاماسىز ەتۋ ءۇشىن ينفراقۇرىلىمدى الدىن الا دايىنداۋ قاجەت. وسىلايشا ەلوردادا سول جاعالاۋعا 17 كم سۋ تارتقىشى بار سورعى-سۇزگى ستانساسى قۇرىلىسى بويىنشا جوبانى ىسكە اسىرۋ باستالدى.
سورعى-سۇزگى ستانساسى قالانىڭ سول جاعالاۋىنداعى بولاشاق قۇرىلىس اۋداندارىن جانە مىڭجىلدىق اللەياسىن اۋىز سۋمەن قامتاماسىز ەتۋگە مۇمكىندىك بەرەدى. بۇل بۇكىل قالانىڭ سۋمەن جابدىقتاۋ قۋاتىن ارتتىرادى.
نوسەر كارىزدەرى جانە تازارتقىش قۇرىلىستارى
قولدانىستاعى نوسەر كارىزدەرىنىڭ قۋاتى جەتكىلىكسىز ەكەنىن ەسكەرە وتىرىپ, جاڭا نوسەر كارىزدەرىن سالۋ, كوللەكتورلاردى كەڭەيتۋ بويىنشا جۇيەلى جۇمىستار جۇرگىزىلۋدە. مىسالى, الماتى اۋدانىندا (ش.قالداياقوۆ كوشەسى) سورعى ستانسالارى بار نوسەر كوللەكتورىنىڭ قۇرىلىسى جۇرگىزىلۋدە.
جاڭا تەمىرجول ۆوكزالى اۋدانى جىل سايىن ينفراقۇرىلىمعا, ينجەنەرلىك جەلىلەرگە (سۋ, ەلەكتر, كارىز جانە ت. ب.) جۇكتەمە ارتىپ كەلە جاتقان جاڭا قۇرىلىستاردىڭ اۋدانىنا جاتادى. مۇندا نوسەر كارىزىنىڭ قۇرىلىسى جۇرگىزىلەدى. سونداي-اق ۇلى دالا داڭعىلىندا ورنالاسقان نوسەر كارىزىنىڭ پروبلەمالى ۋچاسكەسى اياقتالادى. ونى 2023 جىلى اياقتاۋ جوسپارلانىپ وتىر.
شەت ايماقتار شاعىن اۋداندارعا اينالادى
پارتيانىڭ سايلاۋالدى باعدارلاماسىنا سايكەس, تۇرعىن الاپتاردى دامىتۋعا ەرەكشە كوڭىل بولىنەدى. ەلوردانىڭ اباتتاندىرىلعان اۋداندارى مەن شەت ايماقتارىنىڭ تەڭسىزدىگىن جويۋ ءۇشىن جۇيەلى جۇمىس جۇرگىزىلۋدە. قالادا 16 تۇرعىن الاپ بار. ەلوردانىڭ ءاربىر ءتورتىنشى تۇرعىنى تۇرعىن الاپتا تۇرادى.
ءار تۇرعىن الابىندا بىرقاتار باعىت بويىنشا جۇمىستار جۇرگىزىلۋدە: گازداندىرۋ, الەۋمەتتىك نىساندار مەن جولدار سالۋ, ينجەنەرلىك ينفراقۇرىلىم, اۋلالار مەن قوعامدىق كەڭىستىكتەردى اباتتاندىرۋ, جارىقتاندىرۋ, كوگالداندىرۋ جانە باسقالار. وسىلايشا تۇرعىن الاپتاردا 13,5 كم ينجەنەرلىك جەلىلەر, بەس شاقىرىمنان استام كارىز جانە سۋ قۇبىرى, ءۇش شاقىرىمنان استام نوسەر كارىزى جانە ت. ب. سالىندى.
پارتيانىڭ 2021-2025 جىلدارعا ارنالعان باعدارلاماسىنا سايكەس, تۇرعىن الاپتاردا تاعى 130 كم سۋمەن جابدىقتاۋ جانە سۋ بۇرۋ جەلىلەرى, 85 كم نوسەر كارىزى, 177 كم ەلەكترمەن جابدىقتاۋ جەلىلەرى, 23 كم جىلۋمەن جابدىقتاۋ جەلىلەرى, 6,5 كم تەلەفون جەلىلەرى جانە ت. ب. سالىنادى.
ەكى جىل ىشىندە تۇرعىن الاپتاردا 160-تان استام كوشە, سونىمەن قاتار 400 قوعامدىق كەڭىستىك (ساياباقتار, سكۆەرلەر, بۋلۆارلار) سالىندى. ولاردىڭ ءبىر بولىگى تۇرعىن الاپتاردا ورنالاسقان. مىسالى, «كوكتال-1»-دە (سارىارقا اۋدانى) جاڭا ساياباق اشىلدى (16 گەكتار). وندا سپورتپەن شۇعىلدانۋ مەن بوس ۋاقىتتى وتكىزۋگە ارنالعان ۇلكەن ايماقتاردان باسقا امفيتەاتر مەن روتوندا ورناتىلعان, يتتەردى سەرۋەندەتۋگە ارنالعان ارنايى الاڭ جانە ت. ب. جابدىقتالعان.
«ءوندىرىس», «كوكتال», «يلينكا», «جەلەزنودوروجنىي» سەكىلدى 4 تۇرعىن الاپتا دەنە شىنىقتىرۋ-ساۋىقتىرۋ كەشەندەرى بولادى. «ميچۋرين» ەلدى مەكەنىندە العاش رەت مەكتەپ سالىندى, بۇرىن وقۋشىلار بەيىمدەلگەن بولمەدە ءبىلىم الاتىن ەدى.
2022 جىلى ءتورت ەلدى مەكەندە تاعى ءتورت وقۋ ورنىن سالۋ جوسپارلانۋدا. سونىمەن قاتار 2022 جىلى «ينتەرناتسيونالنىي» تۇرعىن الابىندا العاشقى مەديتسينالىق كومەك ورتالىعى سالىنادى, ال 2024 جىلعا دەيىن تاعى ەكى وتباسىلىق-دەنساۋلىق ورتالىعى «ءوندىرىس» جانە «پرومىشلەننىي» تۇرعىن الابىندا بوي كوتەرەدى.
پارتيانىڭ 2025 جىلعا دەيىنگى باعدارلاماسىنا سايكەس, 2,8 مىڭ قتق كونتەينەرلەرى مەن 200-گە جۋىق كونتەينەرلىك الاڭ ورناتىلادى.
70-كە جۋىق مەكتەپ سالىنادى
سايلاۋالدى باعدارلاماداعى ماڭىزدى باعىتتىڭ ءبىرى – ءبىلىم بەرۋدى دامىتۋ. بۇل ءۇشىن جاڭا مەكتەپ سالۋ, ولاردى بارلىق قاجەتتى زاماناۋي جابدىقتارمەن جاراقتاندىرۋ ماڭىزدى. حالىق سانىنىڭ ءوسۋىن ەسكەرە وتىرىپ, جىل سايىن كەمىندە 10 مەكتەپ سالۋ قاجەت.
2020 جىلى 2019 جىلمەن سالىستىرعاندا ەكى ەسە كوپ مەكتەپ سالىندى. بۇل – 11 وقۋ ورنى, سونىڭ ىشىندە بۇرىن مەكتەپتەر بولماعان تۇرعىن ءۇي الاپتارىنداعى مەكتەپتەر, وندا بالالار بەيىمدەلگەن ءۇي-جايلاردا وقىدى. بۇل ءۇش اۋىسىممەن وقىتاتىن مەكتەپتەر سانىن سەگىزدەن تورتكە دەيىن, ال ارتىق جۇمىس ىستەيتىن مەكتەپتەر سانىن 22-دەن 14-كە دەيىن قىسقارتۋعا مۇمكىندىك بەردى.
2021 جىلى 15 مەكتەپ سالىنىپ, پايدالانۋعا بەرىلدى. سونىڭ ناتيجەسىندە 40 مىڭ جاڭا وقۋشى ورنى اشىلدى. بۇل كورسەتكىش 2020 جىلمەن سالىستىرعاندا ەكى ەسەگە, 2019 جىلمەن سالىستىرعاندا ءتورت ەسەگە كوپ. كەلەسى جىلى 11 مەكتەپ سالۋدى جوسپارلاپ وتىرمىز. 5 جىلدىق كەزەڭگە ارنالعان كەشەندى جوسپار اياسىندا 70-كە جۋىق مەكتەپ سالىنادى. بۇل پروتسەسكە جەكە ينۆەستيتسيالار دا تارتىلادى. وقۋ ورىندارىنىڭ قۇرىلىسىمەن قاتار, قولدانىستاعى وقۋ ورىندارىنا دا ءتيىستى كوڭىل بولىنەدى. 26 ءبىلىم بەرۋ نىسانى (مەكتەپتەر, بالاباقشالار, كوللەدجدەر) جوندەلدى.
كەدەرگىسىز ورتا جانە الەۋمەتتىك قولداۋ
ەرەكشە قاجەتتىلىكتەرى بار بالالارعا قامقورلىق جاساۋ دا پارتيا باسىمدىقتارىنىڭ ءبىرى. بارلىق بالالار بىردەي مۇمكىندىكتەرگە يە بولۋى كەرەك. مۇمكىندىگى شەكتەۋلى جانداردى وڭالتۋ ءۇشىن جۇيەلى نەگىزدە جاعداي جاساۋ ماڭىزدى. وتكەن جىلى ەلوردادا بتسپ, اۋتيزم, داۋن سيندرومى جانە ت. ب. دياگنوزدارى بار بالالاردى وڭالتۋمەن اينالىساتىن بىرقاتار ءىرى وڭالتۋ ورتالىقتارى اشىلدى. مىسالى, «اسىل ميراس» جاڭا اۋتيزم ورتالىعى (ش.ءۋاليحانوۆ كوشەسى) اۋتيستىك سپەكتردىڭ اۋرۋلارى بار بالالاردى 50 پايىزعا كوبىرەك قامتۋعا مۇمكىندىك بەردى. بۇل جوبا بولات وتەمۇراتوۆ قورىمەن بىرگە ىسكە اسىرىلدى. سول ۇيدە تاعى ءبىر وڭالتۋ ورتالىعى بتسپ, اۋتيزم دياگنوزى جانە باسقا دا بىرقاتار اۋرۋلارى بار بالالارمەن اينالىسادى.
№1 قالالىق بالالار اۋرۋحاناسى بازاسىندا تۇڭعىش پرەزيدەنت قورى مەن «سامۇرىق-قازىنا» قولداۋىمەن وتكەن جىلدىڭ كۇزىندە «قامقورلىق» وڭالتۋ ورتالىعى اشىلدى. بۇل بتسپ دياگنوزى بار 600-گە جۋىق بالانى جىل سايىن قوسىمشا تەگىن مەديتسينالىق كومەكپەن قامتۋعا مۇمكىندىك بەرەدى.
بيىل استانا كۇنى قارساڭىندا كورۋ قابىلەتى بۇزىلعان بالالارعا ارنالعان مامانداندىرىلعان بالاباقشا, قالانىڭ ءارتۇرلى اۋداندارىندا «ءۇي جانىنداعى دارىگەر» جوباسى بويىنشا 29 نىسان اشىلدى.
يپپودروم بازاسىندا بالالار يپپوتەراپيامەن اينالىسا الاتىن جابىق مانەجدىڭ قۇرىلىسى جۇرگىزىلىپ جاتىر. جاڭا ۇيلەردىڭ ءبىرىنشى قاباتىندا بالالارعا ارنالعان شاعىن ورتالىقتار, وڭالتۋ ورتالىقتارى, بالاباقشالار, «ۇيدەگى دارىگەر» جانە تاعى باسقالارى اشىلادى. ەلوردا مەكتەپتەرىندە ينكليۋزيۆتىك قولداۋ كابينەتتەرى جۇمىس ىستەيدى.
نۇر-سۇلتان – جايلى قالا
قۇرىلىس سالۋمەن قاتار, قالانى دامىتۋ «نۇر-سۇلتان – جايلى قالا» دامۋ جوسپارى اياسىندا ەكولوگيالىق قاعيدات بويىنشا جۇرگىزىلۋدە. بيىل ەلوردانىڭ «جاسىل» بەلدەۋىندە, قالانىڭ بارلىق اۋداندارىندا 1 ميلليوننان استام جاسىل جەلەك (اعاشتار, بۇتالار, كوشەتتەر جانە ت. ب.) وتىرعىزىلادى. اعاشتار تەك ساياباق اۋماقتارىندا عانا ەمەس, اۋلالاردا, تۇرعىن الاپتاردا دا وتىرعىزىلادى.
سونداي-اق قالاداعى كورىكتى جەرلەردە جاسىل «ارالدار» پايدا بولدى. «استانا وپەرا» ماڭىنداعى اۋماقتا – ەمەن باعى, ترياتلون پاركتە – بورتەگۇل باعى, «استانا بالەت» اۋماعىندا – جاسىل باق. وسىلايشا الداعى ۋاقىتتا بۇكىل قالا بويىنشا جاسىل «ارالدار» كوبەيەدى. جىلدان-جىلعا ەكولوگيالىق تازا ايماقتار قۇرۋ جونىندەگى ءىس-شارالار كوبەيەدى.
تۇرعىنداردىڭ ۋاقىت وتكىزۋىنە قولايلى جاعداي جاساۋ ءۇشىن اۋلالار مەن قوعامدىق كەڭىستىكتەردى اباتتاندىرۋ بويىنشا اۋقىمدى جۇمىستار جۇرگىزىلۋدە. ەلوردادا العاش رەت ءتۇرلى سپورت سەكتسيالارى, كوشە ترەناجەرلەرى, اتكەنشەكتەر, workout-ايماقتار جانە ت. ب. ورناتىلعان كوپىر استى كەڭىستىكتەرى پايدا بولدى.
ەكى جىل ىشىندە 400 اۋلا مەن قوعامدىق كەڭىستىكتەر (ساياباقتار, سكۆەرلەر, بۋلۆارلار) اباتتاندىرىلدى. الداعى ءتورت جىلدا كەمىندە 550 اۋلا مەن قوعامدىق كەڭىستىكتى قوسىمشا اباتتاندىرۋ جوسپارلانۋدا.
«حالىق ۇنىنە قۇلاق اساتىن مەملەكەت»
ازاماتتاردىڭ شاعىمدارى مەن قاجەتتىلىكتەرىنە جەدەل نازار اۋدارۋ ءۇشىن مەملەكەت باسشىسىنىڭ تاپسىرماسى بويىنشا ەلوردادا حالىقپەن كەرى بايلانىس بويىنشا جۇمىس كۇشەيتىلدى. قالا تۇرعىندارىنا الەۋمەتتىك كومەك كورسەتۋ بويىنشا جۇيەلى شارالار قابىلداۋ ءۇشىن ەلوردا اكىمدىگى اپتا سايىن قابىلداۋ جۇرگىزەدى.
تۇرعىندار كوبىنەسە تۇرعىن ءۇي, الەۋمەتتىك كومەك كورسەتۋ, ءبىلىم الۋ, جۇمىسقا ورنالاسۋ, مەديتسينالىق كومەك جانە ت. ب. ماسەلەلەردى كوتەرەدى. ەلوردادا بۇل ماقساتتا بىرقاتار ورتالىقتار اشىلدى.
مىسالى, 2020 جىلدىڭ كۇزىنەن باستاپ تۇرعىن ءۇي سالاسىندا قىزمەت كورسەتۋ بويىنشا بىرىڭعاي ورتالىق جۇمىس ىستەيدى (رەسپۋبليكا داڭعىلى, 32). وندا ءسىز تۇرعىن ءۇي كەزەگىنىڭ ءنومىرى, ءارتۇرلى تۇرعىن ءۇي باعدارلامالارىنىڭ تەتىكتەرى جانە ت. ب. تۋرالى بىلە الاسىز. اشىلعان ساتتەن باستاپ ورتالىققا 53 مىڭنان استام تۇرعىن جۇگىندى.
«جانۇيا» وتباسى ينستيتۋتىن قولداۋ ورتالىعىندا (بەيبىتشىلىك كوشەسى, 14) «ءبىر تەرەزە» قاعيداتى بويىنشا قالا تۇرعىندارىنا 70-تەن استام مەملەكەتتىك قىزمەت كورسەتىلەدى. اعىمداعى جىلدىڭ ءبىرىنشى جارتىجىلدىعىندا 25 مىڭنان استام تۇرعىنعا كومەك پەن كەڭەس بەرىلدى.
سونىمەن قاتار iQala قالالىق قىزمەتتەر ورتالىعى (قوشقارباەۆ, 29) جۇمىس ىستەيدى, وندا تۇرعىن ءۇي-كوممۋنالدىق سەكتورىن «ءبىر تەرەزە» قاعيداتى بويىنشا ۇيىمداستىرۋ قىزمەتتەرىن الۋعا بولادى. بۇرىن قىزمەت كورسەتۋ رەگلامەنتى بولماعان. تۇرعىن بارلىق مونوپوليستەردى اينالىپ ءوتىپ, ارقايسىسىمەن جەكە-جەكە كەلىسىم جاساسىپ, مەزگىل-مەزگىل قوڭىراۋ شالىپ, قۇجاتتاردىڭ دايىن ەكەنىن ءبىلۋى كەرەك ەدى. بۇل 1 ايعا سوزىلدى. قازىر تۇرعىندار iqala.kz سايتىندا ءوتىنىش بەرەدى. 3-5 كۇننىڭ ىشىندە وعان قۇجاتتاردىڭ دايىن ەكەندىگى تۋرالى سمس-حابارلاما كەلەدى.
بيىل جاستارعا قىزمەت كورسەتۋ ورتالىعى اشىلدى (گەتە, 1). مۇندا جاستار ءبىلىم بەرۋ, جۇمىسقا ورنالاسۋ جانە ت. ب. وزەكتى ماسەلەلەر بويىنشا كەڭەس الا الادى. مۇنداي الەۋمەتتىك ورتالىقتار وزدەرىنىڭ تيىمدىلىگى مەن قاجەتتىلىگىن كورسەتتى. جالپى العاندا, تەك وسى جىلى عانا اتالعان ورتالىقتار قالالىقتاردىڭ 150 مىڭعا جۋىق ءوتىنىشىن وڭدەدى.
وسىلايشا Nur Otan پارتياسىنىڭ سايلاۋالدى باعدارلاماسى ەلىمىزدىڭ قازىرگى جاعدايداعى دامۋ ۇردىستەرى مەن پەرسپەكتيۆالارىن كورسەتەدى. Nur Otan – تاۋەلسىز قازاقستاننىڭ قالىپتاسۋىنا بەلسەندى اتسالىسقان ناقتى ىستەردىڭ پارتياسى.
ەلباسى نۇرسۇلتان نازارباەۆ اتاپ وتكەندەي, قازاقستان ءۇشىن بەتبۇرىس بولعان كەزەڭدەردە نۇروتاندىقتار كۇردەلى مىندەتتەردى شەشە وتىرىپ, ارقاشان دا ەڭ جاۋاپتى ۋچاسكەلەردە بولدى. مەملەكەت باسشىسى قاسىم-جومارت توقاەۆ Nur Otan پارتياسى جەتەكشى ساياسي كۇش رەتىندە ەلدى دامىتۋ پروتسەسىندە باستى بىرىكتىرۋشى ءرول اتقاراتىنىن اتاپ ءوتتى.
پارتيانىڭ سايلاۋالدى باعدارلاماسى قازاقستاننىڭ قازىرگى جاعدايداعى دامۋ ۇردىستەرى مەن پەرسپەكتيۆالارىن كورسەتەدى. وندا الداعى بەسجىلدىقتىڭ ساياسي جانە الەۋمەتتىك-ەكونوميكالىق كۇن ءتارتىبى قالىپتاسىپ, ونىڭ ءاربىر جوباسى قارجىلىق جانە ادامي رەسۋرستارمەن كۇشەيتىلگەن.
(«ليتەر» گازەتىنەن الىندى, 19.10.2021 ج.)
