نۇر-سۇلتان قالاسىندا بۇگىن باستالاتىن گرەك-ريم, ەركىن جانە ايەلدەر كۇرەسىنەن وتەتىن الەم چەمپيوناتىن 104 ەلدىڭ جانكۇيەرى تاماشالايتىن بولادى. ەلوردا كىلەمىندە 1300-گە جۋىق بالۋان باق سىناعالى وتىر.
الەم چەمپيوناتىنا ارنالعان ءباسپاسوز ءماسليحاتىندا جارىستى ۇيىمداستىرۋ كوميتەتىنىڭ جەتەكشىسى, قر ەركىن كۇرەس فەدەراتسياسىنىڭ ۆيتسە-پرەزيدەنتى ەرلان قوجاسباي بايراقتى باسەكەنىڭ باستى ەرەكشەلىكتەرى جونىندە ايتىپ بەردى. بىرىنشىدەن, بۇل چەمپيوناتتا 2020 جىلى جاپونيا استاناسى توكيودا وتەتىن جازعى وليمپيادا ويىندارىنا ليتسەنزيا بەرىلەتىن بولادى, ەكىنشىدەن, قاتىسۋشى ەلدەر دە, سپورتشىلارى دا ەڭ كوپ چەمپيونات بولادى, ۇشىنشىدەن, ءداستۇرلى بىرىنشىلىكتىڭ باعدارلاماسىنا العاش رەت كۇرەستىڭ جاڭا ءتۇرى گرەپپلينگ ەنگىزىلىپ وتىر.
الەم چەمپيوناتىندا كوپتەگەن وليمپيادا ويىندارىنىڭ چەمپيوندارى مەن جۇلدەگەرلەرى, سونىمەن قاتار الەم, قۇرلىق چەمپيوندارى قاتىسادى دەپ كۇتىلۋدە.
– بۇل چەمپيوناتتىڭ ماڭىزى وتە جوعارى بولىپ تۇر. ويتكەنى وليمپياداعا جولدامالار ۇلەستىرىلەدى. كۇرەستىڭ 3 تۇرىنەن 10 سالماق دارەجەسىندە چەمپيوندار انىقتالاتىن بولسا, وليمپيادالىق ليتسەنزيا 6 سالماق بويىنشا عانا بەرىلەتىن بولادى. بايراقتى جارىستى وتكىزۋگە دايىندىق جاقسى جۇرگىزىلدى دەۋگە نەگىز بار. ال قانشا جۇلدە, قانشا ليتسەنزيا الامىز, ول جاعىنا ەندى بالۋاندارىمىز بەن باپكەرلەرىمىزگە سەنىم ارتامىز. ءوز ەلىمىزدە ءوتىپ جاتقاندىقتان, جانكۇيەرلەرىمىزدەن دە قىزۋ قولداۋ كۇتەمىز, – دەيدى گرەك-ريم كۇرەسىنەن وليمپيادا ويىندارىنىڭ ەكى دۇركىن جۇلدەگەرى, الەم چەمپيونى, ازيا ءبىرىنشىلىگىنىڭ جەڭىمپازى
داۋلەت تۇرلىحانوۆ.
ايەلدەر كۇرەسىنەن وليمپيادا ويىندارىنىڭ ەكى دۇركىن كۇمىس جانە قولا جۇلدەگەرى, الەم چەمپيونى گيۋزەل مانيۋروۆا وسى چەمپيونات بارىسىندا ەكى-ءۇش ليتسەنزيا الۋدى جوسپارلاپ وتىرعانىن جەتكىزدى. سونىمەن قاتار بىرنەشە جۇلدەگەر شىعۋعا ءتيىس دەپ ءوز شاكىرتتەرىنە سەنىممەن قارايتىنىن ءبىلدىردى.
الەم چەمپيوناتى 14-22 قىركۇيەك ارالىعىندا «بارىس ارەنا» سپورت كەشەنىندە وتەدى. جارىستىڭ ءبىرىنشى بولىگىندە گرەك-ريم كۇرەسى شەبەرلەرى ونەر كورسەتسە, ەكىنشى بولىگىندە ايەلدەر باسەكەسىن كورەتىن بولامىز. چەمپيونات ەركىن كۇرەس بىرىنشىلىگىمەن تۇيىندەلەدى.
