ەلوردانىڭ تۋعان كۇنى قارساڭىندا استانادا دۋاتلوننان ەكىنشى اشىق تۋرنير ۇيىمداستىرىلدى. جارىستىڭ اشىلۋ سالتاناتىنا قر پرەمەر-ءمينيسترى كارىم ءماسىموۆ, قر پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ, قر مادەنيەت جانە سپورت ءمينيسترى ارىستانبەك مۇحامەديۇلى جانە تانىمال ۆەلوشاباندوز, وليمپيادا چەمپيونى الەكساندر ۆينوكۋروۆ قاتىستى.
– استانادا وسىنداي دۋاتلون جارىسىن وتكىزۋ تۋرالى يدەيانى ادىلبەك رىسكەلدىۇلى قالا اكىمى بولىپ وتىرعان كەزدە كوتەرگەن ەدى. مەن دە بۇعان قولداۋ كورسەتۋگە ۋادە ەتكەنمىن. مەنىڭشە, مۇنداي اۋقىمدى شارا – باس شاھاردىڭ تۇرعىندارى ءۇشىن ۇلكەن مەرەكە, – دەدى ۇكىمەت باسشىسى ك.ءماسىموۆ.
ءوز كەزەگىندە پرەزيدەنت اكىمشىلىگىنىڭ باسشىسى ءا.جاقسىبەكوۆ بارشا وتانداستاردى سپورتپەن اينالىسۋعا شاقىردى.
– ەلباسىنىڭ تاپسىرماسىنا سايكەس, ەلىمىزدە, سونىڭ ىشىندە استانادا سپورت پەن مادەنيەتتى دامىتۋعا كوپ كوڭىل بولىنۋدە. جىل سايىن سپورتتىق سايىستار قاتارى ارتىپ كەلەدى. ۇلتىمىز ءۇشىن ەڭ باستى بايلىق – دەنساۋلىق. سوندىقتان ءبارىڭىز دە سپورتپەن شۇعىلدانىڭىزدار, – دەپ اتاپ ءوتتى ءا. جاقسىبەكوۆ.
دۋاتلون جارىسى «بايتەرەك» مونۋمەنتىنىڭ الدىنداعى الاڭنان باستالدى. بايگە شارتى بويىنشا, قاتىسۋشىلار العاشقى 5 شاقىرىمدى جۇگىرىپ, ودان كەيىنگى 15 شاقىرىمدى ۆەلوسيپەدپەن, سوڭعى 5 شاقىرىمدى قايتا جۇگىرىپ وتكەرۋ كەرەك بولدى. ياعني, جولدىڭ جالپى ۇزىندىعى – 25 شاقىرىم. بۇل اراقاشىقتىق كەزدەيسوق تاڭدالعان جوق. جولدىڭ ۇزاقتىعى مەرەيتويلىق داتا – قازاقستان تاۋەلسىزدىگىنىڭ 25 جىلدىعىمەن سايكەس كەلەدى.
سايىسكەرلەر قوناەۆ كوشەسىنىڭ بويىمەن قابانباي باتىر داڭعىلىنا شىعىپ, كەيىن دوستىق جانە ورىنبور كوشەلەرىمەن جۇگىرىپ ءوتتى. مارەدە جاسالعان ارنايى ايماقتا سپورتشىلار ۆەلوسيپەدكە وتىرىپ, جارىستى جالعاستىردى. ۆەلوجارىس تا قوناەۆ كوشەسىنەن باستالىپ, قابانباي باتىر داڭعىلىمەن جالعاستى. دۋاتلونعا قاتىسۋشىلار نازارباەۆ زياتكەرلىك مەكتەبى جانىنان قايتا اينالىپ, كەرەي جانە جانىبەك حاندار كوشەسىنە دەيىن باردى. سودان كەيىن وسى جولمەن ورىنبور كوشەسىنە دەيىن ءجۇرىپ, قوناەۆ كوشەسىنە جەتتى. ەستەرىڭىزگە سالا كەتەيىك, «استانا-دۋاتلون – 2016» اشىق قالالىق تۋرنيرىنە 16 جاستان اسقانداردىڭ ءبارى دە قاتىسا الدى.
دۋاتلونشىلار بەس توپ بويىنشا ماراپاتتالدى. ەرلەر اراسىندا 29 جاستاعى ەۆگەني نەپومنياششني جانە ايەلدەر اراسىندا 16 جاستاعى جانەركە اسان ءابسوليۋتتى چەمپيون اتاندى. ولار سايكەسىنشە 56,10 مينۋت جانە 1 ساعات 13,21 مينۋتتا مارەگە جەتتى. بۇل قاتىسۋشىلار – 16 مەن 30 جاس ارالىعىنداعى جەڭىمپازدار. ياكوۆ كوزلوۆ (1 ساعات 1 مينۋت) جانە ەلەنا پونومارەۆا (1 ساعات 22 مينۋت) 31 مەن 40 جاس ساناتىندا جۇگىرۋدە توپ جاردى. ال 41 پەن 50 جاس ساناتىندا يگور كاراچەۆ (59,43 مينۋت) جانە تاتيانا ميحالەۆا (1 ساعات 24 مينۋت) كوش باستادى. سونداي-اق, 50 جاستان اسقاندار اراسىندا «قازاقستاننىڭ دامۋ بانكى» اكتسيونەرلىك قوعامىنىڭ باسقارما توراعاسى بولات جامىشەۆ ۇزدىك اتاندى. قالادا وتكىزىلەتىن بارلىق سپورتتىق-بۇقارالىق شارالارعا تۇراقتى تۇردە قاتىسىپ جۇرەتىن ول بەلگىلەنگەن قاشىقتىقتى 1 ساعات 9 مينۋتتا باعىندىردى.
جەڭىمپازدار باعالى سىيلىقتارمەن جانە ەلوردالىق سپورتتىق مەكەمەلەرگە ارنالعان ابونەمەنتتەرمەن ماراپاتتالدى. سالتاناتتى ماراپاتتاۋ راسىمىنەن سوڭ دۋاتلونعا قاتىسۋشىلار مەن شارا قوناقتارى ءۇشىن «بايتەرەك» مونۋمەنتىنىڭ الدىنداعى الاڭدا كونتسەرتتىك باعدارلاما, سونداي-اق, لوتەرەيا ۇتىسى ۇيىمداستىرىلدى.
بوتاگوز ماراتقىزى
