بۇگىندە باسپانا ماسەلەسى ءۇيى جوق ازاماتتاردىڭ باس اۋرۋىنا اينالدى. ءاربىر كۇنى جالدامالى شارشى مەتردە ءوتىپ جاتقان قازاقتاردىڭ بار ءۇمىتى «7-20-25» تۇرعىن ءۇي باعدارلاماسىندا ەكەنى بەلگىلى. كۇنى كەشە وسى باعدارلاما ارقىلى العاشقى باسپاناعا يە بولعان ازاماتتاردىڭ اتى-جوندەرى بەلگىلى بولدى.
مويىنداۋ كەرەك, ەلىمىزدە ەكىنشى دەڭگەيلى بانكتەردىڭ يپوتەكالىق نەسيەسىنىڭ مولشەرى ەستەن تاندىرادى. ناقتى دەرەك كەلتىرسەك, ەڭ تومەنگى دەگەن «بانكتسەنتركرەديت» پەن «سبەربانك» حالىققا 15,1-15,5 پايىزبەن نەسيە بەرەدى. ال قالعان بانكتەردىڭ مولشەرى 19 بەن 23 پايىزدىڭ ارالىعىن قۇرايدى. سودان بولار, ناۋرىز ايىندا ەلباسى ۇندەۋىندە ءاربىر قازاقستاندىقتىڭ 7 پايىزدان اسپايتىن مولشەرلەمەمەن باستاپقى كەزدە باسپانا قۇنىنىڭ 20 پايىزىن تولەپ, 25 جىلعا نەسيە الا الاتىنى ايتىلعاندا, ەلدىڭ ءبارى قۋاندى.
ۇلتتىق بانكتىڭ توراعاسى دانيار اقىشەۆتىڭ ەسەبى بويىنشا كوپشىلىككە قولجەتىمدى بولاتىن نەسيەدە تۇرعىن ءۇيدىڭ قۇنى 7 ملن تەڭگە بولعان جاعدايدا, اي سايىنعى تولەم 50 مىڭ تەڭگەدەن اسپايدى. ال 10 ملن تەڭگە بولسا, اي سايىنعى تولەم 70 مىڭ تەڭگەنى قۇرايدى. ەلىمىزدىڭ ءار ايماعىندا پاتەر باعاسى ءارتۇرلى بولعاندىقتان, ءىرى قالالار مەن وڭىرلەر بويىنشا ءۇيدىڭ قۇنىنا قاتىستى الشاقتىق بولاتىنىن دا ەسكەرتتى.
پرەزيدەنتتىڭ ءوزى دە «7-20-25» باعدارلاماسى ءار قازاقستاندىقتىڭ ءۇي الۋىنا مۇمكىندىك بەرەتىن جوبا ەكەنىن العا تارتقانى بەلگىلى. ونىڭ ايتۋىنشا, ءاربىر جۇمىس ىستەيتىن ازامات الداعى ۋاقىتتا ءتيىمدى شارتتارمەن يپوتەكالىق نەسيە الىپ, تۇرعىن ءۇي ماسەلەسىن شەشەتىن بولادى.
سونىمەن, «7-20-25» باعدارلاماسى بويىنشا يپوتەكاعا ءۇي راسىمدەگەندەردىڭ قاتارىندا اقتاۋ قالاسىنىڭ تۇرعىنى يسلام ءۋالي, الماتى قالاسىنان باقىتجان ناربوتا, استانا قالاسىنىڭ ازاماتتارى ايدار سادىبەكوۆ پەن ءمادي تاجىكەنوۆ, ورال قالاسىنان شارا قاليبەكوۆا جانە وسكەمەن قالاسىنىڭ تۇرعىنى گۇلبارشىن امانگەلدىقىزى بار. باسپاناعا يە بولعانداردىڭ ەڭ جاسى 27 جاستا بولسا, ۇلكەنى 47-دە ەكەن.
باسپانا باقىتىنا يە بولعان ەلوردالىق ازاماتتارمەن تىلدەسۋدىڭ ءساتى ءتۇستى. ءماسەلەن, «ەنەرگوينفورم» اق كاسىپورنىندا جۇمىس ىستەيتىن ايدار سادىبەكوۆ اتالمىش باعدارلاما بويىنشا قۇنى 16822400 تەڭگە بولاتىن پاتەردى يەلەنىپ وتىر. ال 27 جاستاعى ءمادي نۇرلانۇلى العان «BI Grوup» كومپانياسىنا تيەسىلى پاتەر 18 ميلليوندى قۇرايدى. قوس ازامات تا باعدارلامانىڭ شارتى ءتيىمدى بولعاندىقتان, قۇجات تاپسىرعاندارىن ايتادى.
