ەلورداداعى «قازاقستان» ورتالىق كونتسەرت زالىندا «قازاق حاندىعى» كينوسەريالىنىڭ ەكىنشى ماۋسىمدىق نۇسقاسى – «التىن تاق» ءفيلمىنىڭ تانىستىرىلىمى بولدى. بۇل تۋىندى مادەنيەت جانە سپورت مينيسترلىگىنىڭ تاپسىرىسى بويىنشا ءتۇسىرىلدى.
جالپى, «قازاق حاندىعى» ءفيلمىنىڭ ستسەناريى كورنەكتى جازۋشى ءىلياس ەسەنبەرليننىڭ «كوشپەندىلەر» تريلوگياسى جەلىسىمەن جازىلعان. اۋقىمدى جوبانىڭ اۆتورى – مەملەكەت باسشىسى نۇرسۇلتان نازارباەۆ.
كوپشىلىككە ۇسىنىلعان فيلمدە ءجانىبەك پەن كەرەي حانداردىڭ ابىلقايىر شايباني ۇرپاقتارى اراسىنداعى سىعاناقتاعى تاق ءۇشىن تالاسى باياندالادى. تاريحتا بۇل قازاق حاندىعىنىڭ باسىنداعى كۇردەلى كەزەڭدەرىنىڭ ءبىرى بولعانى انىق. اتالعان كينو الماتى جانە ءتۇركىستان وبلىستارى مەن تاراز قالاسىندا ءتۇسىرىلدى.
«كوپ سەريالدى فيلمدەر تۋرالى ءتۇرلى پىكىرلەر ايتىلدى. كەيبىر ادامدار جىلى لەبىزدەرىن ءبىلدىردى. دەگەنمەن, جۇرتشىلىق وسى جوبانىڭ جالعاسقانىن قالادى. بۇل بىزگە تىڭ كۇش بەردى. تۋىندى ەلباسىنىڭ «بولاشاققا باعدار: رۋحاني جاڭعىرۋ» جانە «ۇلى دالانىڭ جەتى قىرى» اتتى ماقالالارىندا ايتىلعان ويلارىمەن ۇندەسەدى. ماسەلەن, وسى كينو ارقىلى حالقىمىزدىڭ عاجايىپ مادەنيەتىن كورىپ, ونىڭ تىنىس-تىرشىلىگىنە ۇڭىلۋگە بولادى» دەدى ءفيلمنىڭ رەجيسسەرى رۇستەم ءابدىراش.
تاريحي كينونىڭ ەكىنشى ماۋسىمدىق نۇسقاسىنىڭ ستسەناريىن جازۋعا سماعۇل ەلۋباي, تيمۋر جاقسىلىقوۆ جانە رۇستەم ءابدىراش قاتىسقان.
فيلمدە سىعاناق قالاسى ءۇشىن شايقاس بارىنشا شىنايى بەينەلەنگەن. كەرەي مەن جانىبەك حانداردى ويناعان اكتەرلەر دە ءوز رولدەرىن ءساتتى سومداپ شىققان. ولاردىڭ بويىنداعى تەكتىلىك پەن بەكزاتتىق, باتىرلىق قاسيەتتەر بارىنشا اشىلعان. اقىرى, شايباني ۇرپاقتارى جەڭىلىس تاۋىپ, سىعاناق شاھارى قازاق حاندىعىنىڭ قولىنا ءوتتى.
«ءبىرىنشى ماۋسىممەن سالىستىرعاندا بۇل كينو الدەقايدا قىزىعىراق, ديناميكاسى جاعىنان دا جىلدام. كورەرمەنگە قىزىقتى, تارتىمدى بولادى دەگەن ويدامىز» دەيدى جوبانىڭ پروديۋسەرى ارمان اسەنوۆ.
ايتپاقشى, جاڭا فيلم ناۋرىزدان باستاپ ەل كينوتەاترلارىندا كورسەتىلە باستايدى.
