باس شاھاردىڭ 20 جىلدىق مەرەكەسىندە حاكىم اباي ەسكەرتكىشى الاڭىندا «اباي رۋحى جاڭعىرعان ۇلى دالا استانا!» اتالعان كىتاپ جانە پوەزيا مەرەكەسى ءوتتى.
وسى جىلعى كەش اباي اتامىزدىڭ تۋعانىنا – 173, شاكارىم قۇدايبەردىۇلىنىڭ تۋعانىنا – 160 جانە ماعجان جۇماباەۆتىڭ 125 جىلدىق مەرەيتويىنا ارنالدى.
شارا الدىمەن الىپ اقىننىڭ ەسكەرتكىشىنە گۇل شوعىن قويۋدان باستالدى. جينالعاندار قالالىق قۋىرشاق تەاترىنىڭ «ەل ورداسى – استانا!» اتتى تەاترلاندىرىلعان قويىلىمىن تاماشالادى. سودان كەيىن «مەنىڭ قولتاڭبام» اتتى پوەزيا كەشى بايراعىن كوتەرىپ, وندا ساۋلە دوسجان, داۋلەتكەرەي كاپۇلى, اجار ەربولعان, ايدانا سەگىزباەۆا, ميراس اسان, جادىرا بايبۇلانوۆا, ايجان تاباراك سەكىلدى اقىندار كىندىك قالانىڭ تۋعان كۇنىنە ارناعان ولەڭدەرىن وقىدى.
«بيىل ءبىز بۇل مەرەكەنى 20-رەت اتاپ ءوتىپ وتىرمىز. ياعني استانامەن تۇيدەي قۇرداس. بۇعان بارلىق قالالىق كىتاپحانا ءوز ۇلەسىن قوسۋدا. كەش اياسىندا تۇرعىندارعا «كەل, كىتاپ وقيىق», «كىتاپ – ءومىر ۇستازى» اتتى فلەشموب ۇيىمداستىرىپ, جاڭا جارىق كورگەن كىتاپتاردى جۇرتشىلىققا ناسيحاتتاۋدى ماقسات تۇتتىق» دەدى ورتالىقتاندىرىلعان كىتاپحانالار جۇيەسىنىڭ ديرەكتورى گۇلبادان مادىباەۆا.
سونداي-اق, كەش بارىسىندا «استانا, مەنىڭ شابىتىمسىڭ!» اتتى ەرەسەكتەر مەن بالالارعا ارنالعان بايقاۋدىڭ جۇلدەگەرلەرى ماراپاتتالدى. «استانا, باعى بيىك اسقارىمسىڭ!» دەگەن يلليۋستراتسيالىق كىتاپ كورمەسى ۇيىمداستىرىلدى.
