6 شىلدە كۇنى ەلوردادا استانانىڭ 20 جىلدىق مەرەيتويىنا ارنالعان ءتۇرلى قايىرىمدىلىق شارالار ءوتىپ, جۇرتشىلىققا بىرقاتار مەرەكەلىك مازىرلەر تەگىن ۇسىنىلدى.
تاۋلىكتىڭ ءبىرىنشى جارتىسىندا «بايتەرەك» مونۋمەنتىنىڭ الاڭىنداعى مەرەكەلىك شارانى تاماشالاۋعا كەلگەندەرگە تەگىن بالمۇزداقتار تاراتىلدى. ۇيىمداستىرۋشىلاردىڭ ءبىرى ولەسيا بورودينانىڭ ايتۋىنشا, كەلۋشىلەرگە تەگىن تاراتىلعان «ميلح» جشس قوستاناي ءسۇت زاۋىتى ءونىمىنىڭ كولەمى 50 تەكشە مەتردى قۇرادى.
ال ءتۇس اۋا قازاقستان حالقى اسسامبلەياسى جانە استانا قالاسى اكىمدىگىنىڭ قولداۋىمەن «ستۋدەنتتىك» ساياباعىندا قازاقستان وزبەكتەرى «دۋستليك» قاۋىمداستىعى قازاقستان ستۋدەنتتەر اليانسىمەن بىرلەسىپ, «استانانىڭ 20 جىلدىعىنا ارنالعان 20 قازان پالاۋ» اتتى قايىرىمدىلىق شاراسىن وتكىزدى. ءىس-شارا شەڭبەرىندە 4 مىڭ ادامعا دايارلانعان قازان-قازان پالاۋ قالاداعى بالالار, قارتتار جانە مۇگەدەكتەر ۇيلەرىنە دە جىبەرىلدى.
وسىنداي قايىرىمدىلىق شارا كەشكىسىن «MegaSilkWay» سوو-داعى «Happylon» بالالار ورتالىعىندا دا جالعاسىن تاپتى. وندا كەلۋشىلەر 500 كەلىلىك تورتتان ءدام اۋىز ءتيدى. ورتالىقتىڭ ءباسپاسوز قىزمەتى ماماندارىنىڭ مالىمەتىنشە, مۇنداي تورت وسىمەن ءتورتىنشى جىل ءپىسىرىلىپ وتىر. وتكەن جىلعى ءتاتتى تاعامنىڭ سالماعى 300 كەلىنى قۇراپتى. ءدامى ءتىل ۇيىرەتىن تورتتىڭ تىلىمدەرى بالالار ءۇيىنىڭ تاربيەلەنۋشىلەرىنە دە جونەلتىلدى.
