استانا اكىمى باقىت سۇلتانوۆ قالالىق ءماسليحات دەپۋتاتتارىمەن كەزدەستى. جۇزدەسۋدە ءوتىپ بارا جاتقان جىل قورىتىندىلانىپ, كەلەر جىلدىڭ جوسپارلارى بەلگىلەندى.
«وسى جىلى قالادا اۋقىمدى جۇمىستار اتقارىلدى. استانا ءۇشىن بۇل جىل بار جاعىنان جاقسى جىل بولدى. دالەل رەتىندە 2018 جىلدى جوعارى ەكونوميكالىق كورسەتكىشتەرمەن اياقتاپ وتىرعانىمىزدى ايتساق تا جەتكىلىكتى. جالپى وڭىرلىك ءونىم كولەمى بولجامدىق باعالاۋ بويىنشا 6 ترلن تەڭگەنى قۇرايدى. قالانىڭ ونەركاسىپتىك كاسىپورىندارى مەن قىزمەت كورسەتۋ سالاسى 544 ملرد تەڭگەدەن استام سوماعا ءونىم ءوندىردى. بۇل سالادا ءوسىم وتكەن جىلمەن سالىستىرعاندا 9,6 پايىزعا ارتتى» دەدى استانا اكىمى.
2017 جىلمەن سالىستىرعاندا وڭدەۋشى ونەركاسىپتەگى ءوندىرىس كولەمى دە 12,6%- عا ۇلعايدى. وسى جىلى جۇك تاسىمالداۋ كولەمى جالپى العاندا 9 پايىزعا ءوستى. بولشەك ساۋدا تاۋار اينالىمى كولەمى 1 ترلن تەڭگەدەن اسىپ, وتكەن جىلمەن سالىستىرعاندا 6 پايىزعا ارتقان. مەملەكەتتىك بيۋدجەتكە سالىقتىق تۇسىمدەر 981,9 ملرد تەڭگە كولەمىندە جينالعان. بۇل بىلتىرعى كورسەتكىشتەن 13,9 %-عا جوعارى.
باقىت سۇلتانوۆتىڭ ايتۋىنشا, بۇل كورسەتكىشتەر شاعىن جانە ورتا بيزنەستىڭ ەسەبىنەن قالىپتاسقان, جالپى وڭىرلىك ءونىم قۇرىلىمىندا ونىڭ ۇلەسى 55%-دى قۇرادى. «الدا جۇمىس كوپ. وسى ءۇش ايدا قالا تۇرعىندارىمەن جانە ۇەۇ سەكتورى وكىلدەرىمەن دە كەزدەستىم. الەۋمەتتىك ورتالىقتارعا ءجيى بارۋعا تىرىسۋدامىن. ءوزىمدى شاشىمنان باقايىما دەيىن استانالىقپىن, قالانى جاقسى بىلەم دەپ ويلاعان ەدىم. بىراق قالا اكىمى رەتىندە 10 پايىز كورگەنىمدى بۇرىن بىلمەگەنىمدى ءتۇسىندىم. ماقساتىمىز – استانانى جاھاندىق قالاعا اينالدىرۋ. استانا كرەاتيۆتى ادامداردى, تالانتتى جاستاردى, تۋريستەر مەن شەتەلدىك ينۆەستورلاردى تارتاتىن نەگىزگى ورتالىققا اينالادى. ول ءۇشىن قالا قۇرىلىسىندا زاماناۋي ۋربانيستىك شەشىمدەر, جاڭا تاسىلدەر پايدالانۋ قاجەت. ءبىر سوزبەن ايتقاندا, قالا تۇرعىندارى مەن قوناقتارىنا ىڭعايلى ورتا جانە مۇمكىندىگى شەكتەۋلى جاندارعا كەدەرگىسىز جايلى جاعداي جاساۋىمىز كەرەك» دەدى قالا باسشىسى.
استانا اكىمى دەپۋتاتتارعا ناتيجەلى جانە بىرلەسكەن جۇمىستارى ءۇشىن العىس ايتىپ, ولاردى كەلە جاتقان جاڭا جىل مەرەكەسىمەن قۇتتىقتادى.
