اۋە بومباسىن سىنادى
تۇركيا العاش رەت ءوزى جاساپ شىعارعان مك-84 اۋە بومباسىن سىناقتان وتكىزدى.
Anadolu اگەنتتىگى سالماعى ءبىر توننا بولاتىن بومبانىڭ 1850 شاقىرىم جىلدامدىقپەن قالىڭدىعى ءبىر مەتر بەتوندى تەسىپ وتكەنىن حابارلادى. ال ونى ونەركاسىپ جانە تەحنولوگيا ءمينيسترى مۇستافا ۆارانك باقىلاعان. ماماندار بۇل قۇرىلعىنىڭ جۇمىسىنا 2017 جىلدىڭ ءساۋىر ايىندا كىرىسىپتى.
سىناق كونيا پروۆينتسياسىنىڭ كاراپىنار جەرىندە ورنالاسقان HABRAS بازاسىندا ءوتتى. بۇل ورىن قازان ايىنىڭ سوڭىنا تامان ەل پرەزيدەنتى رەجەپ ەردوعاننىڭ قاتىسۋىمەن اشىلعان. مۇندا تۇركيادا جاسالىپ جاتقان, سونداي-اق وزگە ەلدەردەن جەتكىزىلگەن قارۋ-جاراقتار سىناقتان وتكىزىلىپ تۇرادى.
2019 ەڭ ىستىق جىل بولا ما؟
اقش-تىڭ كاليفورنيا ۋنيۆەرسيتەتىنىڭ عالىمدارى 2019 جىل تاريحتاعى ەڭ ىستىق جىل رەتىندە تىركەلۋى مۇمكىن دەگەن بولجام جاسادى.
عالىم سامانتا ستيۆەنسون كليماتتىڭ وزگەرۋىن تىنىق مۇحيتى سۋىنىڭ بەتكى قاباتىنداعى تەمپەراتۋرانىڭ كۇرت كوتەرىلۋىمەن بايلانىستىرىپ وتىر. ادەتتە مۇنى ەل-نينو قۇبىلىسى دەپ اتايدى. National Geographic باسىلىمى سوڭعى ءتورت جىل تەمپەراتۋرانىڭ جوعارىلىعىمەن ەستە قالعانىن حابارلادى. سەبەبى كومىرتەگى ديوكسيدىنىڭ شىعارىندىلارى رەكوردتى دەڭگەيگە جەتكەن. بۇعان دۇنيەجۇزىلىك مەتەورولوگيا ۇيىمىنىڭ مالىمەتتەرى دە دالەل.
عالىمدار جاھاندىق جىلىنۋدىڭ سوڭى اۋا رايىنىڭ كۇرت وزگەرۋىنە الىپ كەلەتىنىن بىرنەشە مارتە ايتقان.
قىتاي مەن كانادا اراسى ءورشىپ تۇر
قىتاي مەن كانادا اراسىنداعى جاعداي شيەلەنىسىپ بارادى. وعان Huawei كومپانياسىنىڭ قارجى ديرەكتورى مەن ۆانچجوۋدىڭ كانادادا تۇتقىندالۋى سەبەپ بولىپ وتىر.
وسى ىسكە اسپان استى ەلىنىڭ سىرتقى ىستەر مينيسترلىگى مەن كاناداداعى قىتاي ەلشىلىگى نارازىلىعىن ءبىلدىرىپ, قاماۋدان بوساتۋىن تالاپ ەتكەن. بۇل ءىستىڭ انىعى ءالى كۇنگە دەيىن بەلگىسىز. BBC باسىلىمى وعان اتالعان كومپانيا تەحنيكاسىن اقش, اۆستراليا, جاڭا زەلانديا جەرىندە تاراتپاۋ ءىسى سەبەپ بولعانىن جازادى. ال ديرەكتوردى قاماۋ اقش تاراپىنىڭ وتىنىشىمەن جاسالعان كورىنەدى. سەبەبى بۇل ەل مەن ۆانچجوۋدى ەكستراداتسيالاۋعا تالپىنىپ وتىر.
ءوز كەزەگىندە قىتاي تاراپى دا قاراپ قالماي كانادانىڭ ەكى ازاماتىن تۇتقىنعا الىپ, ولارعا ەلدە تۇرۋ زاڭىن بۇزعانى, تىڭشىلىققا ارەكەتكە بارعانى تۋرالى ايىپ تاعىلدى.
