تاۋلىك بويى قىزمەت ەتەتىن ماماندىق يەلەرىنىڭ جىل اۋىسار ءتۇنى دە جۇمىسى توقتامايدى.
استانا قالاسىنىڭ توتەنشە جاعدايلار دەپارتامەنتىنە قاراستى ءورت ءسوندىرۋ قىزمەتى ءبولىمىنىڭ باسشىسى سايات قاجىموۆتىڭ ايتۋىنشا, جەلتوقساننىڭ 18-ىنەن باستاپ قاڭتاردىڭ 4-ىنە دەيىن قۇتقارۋشىلار كۇشەيتىلگەن تارتىپتە جۇمىس ىستەيدى ەكەن. ويتكەنى مەيرام قارساڭىندا وتشاشۋدىڭ كەسىرىنەن ابايسىزدا ءورت شىعىپ كەتۋ قاۋپى جوعارى. ءبىز جاڭا جىل ءتۇنىن جىپ-جىلى ۇيدە قارسى الىپ جاتقانىمىزدا, 300-دەي ءورت ءسوندىرۋشى ەلوردانىڭ بۇرىش-بۇرىشىنداعى قاۋىپسىزدىكتى كۇزەتەدى. كەنەتتەن توتەنشە جاعداي بولا قالعان كەزدە ونىڭ بەتىن قايتارۋعا 56 تەحنيكا دايىن تۇر. «وسىنداي ازىرلىكتىڭ ارقاسىندا استانادا سوڭعى جىلدارى جاڭا جىل تۇنىندە ايتارلىقتاي وقىس وقيعا بولمادى. تەك بىلتىر الدەبىر تۇرعىننىڭ وتشاشۋدى دۇرىس پايدالانباعانى كەسىرىنەن ونىڭ شوقتارى بالكونىنا ءتۇسىپ, ابىگەرگە سالعان بولاتىن. قۋانىشىمىزعا وراي, قاۋىپتىڭ بەتىن تەز قايتاردىق. سوندىقتان مۇنداي ءىس-ارەكەتتەردەن اۋلاق بولۋعا شاقىرامىن» دەيدى س.قاجىموۆ.
مەرەكە ۋاقىتىندا قاربالاسى كۇشەيەتىن مامانداردىڭ ءبىرى – پوليتسەيلەر. سوزىمىزگە ەلورداداعى ەسىل اۋدانىنىڭ ىشكى ىستەر باسقارماسىنا قارايتىن جەرگىلىكتى پوليتسيا قىزمەتى ۋچاسكەلىك ينسپەكتورى, پوليتسيا كاپيتانى جالعاسباي اقمىرزانىڭ كەلتىرگەن دەرەكتەرى دالەل. «ادەتتە, كۇن سايىن بىزگە ون شاقتى وقيعاعا قاتىستى شاعىم تۇسەتىن بولسا, جاڭا جىل تۇنىندە بۇل كورسەتكىش 2-3 ەسە وسەدى. ونىڭ كوبى ادامداردىڭ الكوگولدى ءىشىمدىك ىشكەنىنىڭ كەسىرىنەن بولادى. كەيبىرەۋى اراققا تويىپ الىپ مەيرامحانادا توبەلەس شىعارادى, ەندى ءبىرى ماس كۇيىندە وتباسىنىڭ شىرقىن بۇزادى. وكىنىشكە قاراي, بۇل قۇبىلىس جىلدا قايتالانادى» دەيدى ول.
ال پەرزەنتحاناداعى قىزمەتكەرلەر ءۇشىن جاڭا جىل ءتۇنى, كەرىسىنشە, ءسۇيىنشى حابارلارعا قارق بولاتىن شاق. ماسەلەن, قالاداعى №2 پەرزەنتحانانىڭ مەدبيكەسى بالجان باقىتقىزى ايى-كۇنى جەتكەن جۇكتى كەلىنشەكتەردىڭ كوبىسىنىڭ تولعاعى ءدال 31 جەلتوقساننان 1 قاڭتارعا قاراعان تۇنگە سايكەس كەلەتىنىن ايتادى. مۇنىڭ سەبەبى ايەلدەردىڭ مەيرام الدىندا جانۇشىرا سالات تۋراپ, داستارقان جاساپ, كوپ كۇيبەڭدەۋىمەن بايلانىستى كورىنەدى. «ءتىپتى كەيبىر كەلىنشەكتەر تولعاقتىڭ العاشقى بەلگىلەرى ەرتەرەك بايقالسا دا, بالا-شاعاسىن كيىندىرىپ, كۇيەۋىنىڭ تاماعىن بەرىپ, ۇيىنە كەلگەن قوناقتارىن كۇتىپ, بارىنە ۇلگەرىپ قالۋعا تىرىسادى» دەپ كۇلەدى بالجان.
جاڭا جىلدى جولدا ءجۇرىپ قارسى الاتىن تاكسيستەر ءۇشىن دە 31 جەلتوقساننىڭ ءتۇنى – ەرەكشە جايتتارعا كۋا بولاتىن كەز. «Yandex Taxi» جۇرگىزۋشىسى ايبولات كەڭشىلىكتىڭ ايتۋىنشا, بۇل ءتۇنى ءبىرىن-ءبىرى قۇتتىقتاپ, قوناققا بارۋعا اسىققان ادامدار تاكسيدىڭ باعاسىن دا ونشا ەلەڭ قىلمايدى. «بىلتىر مەنى ءبىر جىگىت جولدان توقتاتىپ, قاراعاندىعا اپارىپ كەلىڭىزشى دەپ ءوتىنىش ايتادى. ءدال مەرەكە كەزىندە قايدا باراسىڭ دەپ كۇلسەم, سۇيىكتىسىمەن رەنجىسىپ قالىپ, سودان كەشىرىم سۇراۋعا بارا جاتقان بەتى ەكەن. ءىشىڭدى جىلىتاتىن وسىنداي وقيعالار جاڭا جىل قارساڭىندا ءجيى بولادى» دەيدى ايبولات.
ءبىر قىزىعى, مەرەكە كەزىندە ادامدارعا عانا ەمەس, جان-جانۋارلارعا دا قىزمەت كورسەتەتىن مامانداردىڭ دا جۇمىسى ارتادى ەكەن. مىسالى, استاناداعى «اقتابان» ۆەتەرينارلىق كلينيكاسىنىڭ دارىگەرى زاۋىربەك اقبەرگەنوۆ يت-مىسىقتاردىڭ اۋرۋحاناعا ءجيى تۇسەتىن شاعى جاڭا جىل ۋاعى ەكەنىن ايتادى. «بۇل ءتۇنى ءۇي جانۋارلارى دا ادامدار سەكىلدى ادەتتەگىدەن كوپ تاماقتانىپ قويادى. دۇكەن تاعامىن جەپ ۇيرەنىپ قالعان مىسىقتارعا يەلەرى سالاتتىڭ ءتۇر-ءتۇرىن بەرە بەرەدى دە, الگى مىسىقتار ونى كوتەرە الماي, اۋىرىپ قالادى. ولار شىرشاعا ىلىنگەن جىلتىراقتاردى دا قىزىق كورىپ, جەپ قويۋى مۇمكىن. تاۋلىك بويى جۇمىس ىستەيتىن مەكەمە بولعاندىقتان, ونداي كەزدە تۇرعىندار دەرەۋ بىزگە حابارلاسادى. كەيدە كوشەدە وتشاشۋ-پەتاردادان جاراقات العان جانۋارلاردى دا اكەلىپ جاتادى. جالپى, بالالار مەن جاسوسپىرىمدەردى اتا-انالارى سونداي قاتىگەزدىك جاساۋدان تىيىپ وتىرۋى كەرەك» دەيدى زاۋىربەك.
