استانا اكىمى باقىت سۇلتانوۆ جاڭا جىل قارساڭىندا قارتتارعا جانە مۇگەدەكتەرگە ارنالعان مەديتسينالىق-الەۋمەتتىك مەكەمەگە, بالالار ءۇيى مەن مامانداندىرىلعان بالالار ۇيىنە باردى.
قارتتار مەن بالالاردى جاڭا جىلمەن قۇتتىقتاعان قالا باسشىسى «شاراپات» الەۋمەتتىك قىزمەت كورسەتۋ ورتالىعىنا سىيلىق رەتىندە 700 مىڭ تەڭگەلىك سەرتيفيكاتتى تاپسىرىپ, بالالارعا كومپيۋتەر مەن باسقا دا باعالى سىيلىقتاردى, ءتۇرلى تاتتىلەرگە تولى سەبەتتى سىيعا تارتتى.
بالالار ۇيىندە 4 پەن 18 جاس ارالىعىنداعى 80 بالا تاربيەلەنىپ جاتىر. جىل بويى بالالار ءۇيىن بالالاردى قولداۋ ورتالىعىنا اينالدىرۋ جۇمىستارى جۇرگىزىلگەن. بۇل قاناتقاقتى جوبا بالالاردى بەيىمدەۋ, دامىتۋ, وتباسىنا ورنالاستىرۋ جانە وتباسىن قولداۋ سياقتى ءتورت ورتالىقتىڭ باسىن قوسادى.
مامانداندىرىلعان بالالار ۇيىندە ب.سۇلتانوۆ مەكەمەنىڭ ۇجىمىمەن, تاربيەلەنۋشىلەرمەن كەزدەسىپ, مەرەكەلىك شاراعا قاتىستى. كەزدەسۋ بارىسىندا استانا اكىمى قارجىلىق قامتاماسىز ەتۋ, الەۋمەتتىك پەداگوگتاردىڭ جالاقىسى مەن تۇرعىن ۇيمەن قامتاماسىز ەتۋ ءماسەلەلەرىن تالقىلادى. «7-20-25» باعدارلاماسى اياسىندا 100 تۇرعىن ءۇي سەرتيفيكاتى بولىنگەنىن بىلەسىزدەر. ءبىز ونى الەۋمەتتىك سەكتورداعى ماماندارعا بولەمىز. بۇل – ءبىلىم, دەنساۋلىق ساقتاۋ سالالارىنىڭ, الەۋمەتتىك سالالاردىڭ ماماندارى, پوليتسيا قىزمەتكەرلەرى. وسىلايشا, سىزدەرگە قولداۋ كورسەتپەكپىز. الداعى ۋاقىتتا ارنايى باعدارلاما ازىرلەنەتىن بولادى. بۇل ماسەلە كەشەندى شارالاردى تالاپ ەتەدى» دەگەن ب.سۇلتانوۆ جاڭا جىلدا شىدام, دەنساۋلىق, جاڭا جەڭىستەر مەن جەتىستىكتەر, يگىلىكتەر تىلەدى.
