استاناداعى ساكەن سەيفۋللين مۇراجايىندا سەمەيدەگى ابايدىڭ «جيدەباي-ءبورىلى» مەملەكەتتىك تاريحي-مادەني جانە ادەبي مەموريالدىق قورىق-مۇراجايىنىڭ كورمەسى اشىلدى. «ابايتانۋدىڭ اسقان بىلگىرى» اتالاتىن كورمە قازاقتىڭ كورنەكتى عالىمى, ابايتانۋشى, ۇستاز, قازسسر-ءنىڭ تۇڭعىش ءانۇرانىنىڭ اۆتورى, قر مەملەكەتتىك سىيلىعىنىڭ يەگەرى قايىم مۇحامەدحانۇلىنىڭ 100 جىلدىعىنا ارنالعان.
شارانى اباي مۇراجايىنىڭ ديرەكتورى بولات جۇنىسبەكۇلى مەن س.سەيفۋللين مۇراجايىنىڭ ديرەكتورى, مەملەكەتتىك سىيلىقتىڭ يەگەرى نەسىپبەك ايتۇلى اشىپ بەرگەن سوڭ, ساياسي عىلىمنىڭ دوكتورى, پروفەسسور ءناۋبات قاليەۆ, جازۋشى-عالىم تۇرسىن جۇرتباي, اقىن باقىتجان توباياقوۆ, ەربول ىرگەباي سىندى ق.مۇحامەدحانوۆتىڭ شاكىرتتەرى كورنەكتى قايراتكەر تۋرالى پاراساتتى ءسوز قوزعادى. كورمەنىڭ اشىلۋ سالتاناتىنا جينالعان اعا بۋىن وكىلدەرى جاستارعا قايىم مۇحامەدحانوۆتىڭ عىلىمداعى ۇلەسى, كۇرەسكەرلىگى مەن قايسارلىق ونەگەسى تۋراسىندا ەستەلىكتەر ايتىپ, عالىم تۇلعاسىنا جان-جاقتى توقتالدى.
س.سەيفۋللين مۇراجايىندا ءبىر اي بويى وتەتىن كورمەنىڭ قىسقاشا تانىستىرىلىمى ءوتىپ, قويىلعان قۇجاتتار ارقىلى ابايتانۋشى عالىم, قايىم مۇحامەدحانۇلىنىڭ مۇراسى, ونىڭ ءومىرى مەن شىعارماشىلىعى, قوعامدىق قىزمەتى, ابايتانۋ عىلىمىنىڭ قالىپتاسۋى مەن دامۋىنا قوسقان ۇلەسى, ابايدىڭ اقىن شاكىرتتەرى مۇرالارىن جيناقتاپ, عىلىمي اينالىمعا ەنگىزۋدەگى عالىمنىڭ وزىندىك ۇستانىمدارى, ابايدىڭ ادەبي-مەموريالدىق قورىق-مۇراجايىنىڭ ۇيىمداستىرىلۋ, قالىپتاسۋ ىسىنە بەلسەنە ارالاسۋى جونىندە باياندالدى.
ق.مۇحامەدحانۇلىنىڭ وسكەن ورتاسى, بالالىق شاعى, ءتالىم-تاربيە العان باستاۋلارى, قوعامدىق, ۇستازدىق قىزمەتى كەڭ ارنادا سيپاتتالدى. سونىمەن قاتار اباي قورىق-مۇراجايىنىڭ عىلىمي-زەرتتەۋ, ناسيحاتتاۋ سالاسىنداعى مالىمەتتەر جۇرتشىلىق نازارىنا ۇسىنىلدى.
امانعالي قالجانوۆ
