استاناداعى ۇلتتىق اكادەميالىق كىتاپحانادا مەملەكەتتىك سىيلىقتىڭ لاۋرەاتى, جازۋشى دۇكەنباي دوسجاننىڭ شىعارماشىلىعىنا ارنالعان «تارلانبوز» جانە ساۋلە دوسجاننىڭ «مەنىڭ جالعىز سەرگىم» اتتى كىتاپتارىنىڭ تۇساۋكەسەرى ءوتتى. سونداي-اق, كورنەكتى قالامگەرگە ارناپ كىتاپحانادا «جازۋشى زالى» اشىلدى.
دۇكەنباي اعامىز قازاق ادەبيەتىنىڭ كورنەكتى وكىلدەرىنىڭ بىرەگەيى سانالادى. نەبارى 15 جاسىندا «كوكپار» دەپ اتالاتىن كلاسسيكالىق اڭگىمەسىمەن ەلدى ەلەڭ ەتكىزىپ, الدىڭعى بۋىن اعالارىنىڭ باتاسىن الدى. جيىرما جاسىنان اسا بەرە «وتىرار» پوۆەسىن جازىپ, تاريحي شىعارماعا العاش تۇرەن سالعان جازۋشىلاردىڭ ءبىرى بولدى. «جىبەك جولى» رومانى ءوز ۋاقىتىندا وقىرمانداردىڭ ەڭ كوپ وقىعان كىتابىنا اينالدى. ونىڭ شىعارمالارى الەمنىڭ 20 تىلىنە اۋدارىلىپ, 3,7 ميلليون تيراجبەن جارىق كوردى.
ادەبيەت زەرتتەۋشىلەرى جازۋشى شىعارمالارىن ءۇش سالاعا بولەدى. ءبىرىنشىسى – كونە عاسىر قويناۋىنان ەر تۇرىك ارۋاعىن كوتەرگەن 60-شى جىلدار باسىنداعى تاريحي كىتاپتارى. ەكىنشىسى – بوداندىق بۇعاۋ مەن شەنەۋنىكتەر شارپىسۋىنان ۇلتتىق رۋحىن جوعالتىپ, مىنەز ەكولوگياسىنا ۇشىراعان ءومىرزايا ۇرپاقتار وبرازىنىڭ گالەرەياسى. ءۇشىنشىسى – عاجايىپ ادامدار عۇمىرىن كوركەم تىلمەن سويلەتكەن روماندارى.
يگى شارادا ومىردە بىرتوعا, ارتىق سوزگە جوق قالامگەردىڭ ەڭبەكقورلىعى تۋرالى ەستەلىكتەر كوپ ايتىلدى. ونىڭ شىعارماشىلىعىنا ارنالعان دەرەكتى فيلم كورسەتىلدى.
كورنەكتى قالامگەردىڭ ارتىندا قالعان مۇرالارىن قىزعىشتاي قورعاپ, وقىرماندارعا جەتكىزۋگە جارعاق قۇلاعى جاستىققا تيمەي ىزگىلىكتى ءىس ءبىتىرىپ جۇرگەن جازۋشىنىڭ جۇبايى ساۋلە دوسجاننىڭ ەڭبەگى وتە زور. كىتاپحانادان اشىلعان «جازۋشى» زالى دا ادەمى كوركەمدەلگەن. وعان قالامگەردىڭ كىتاپتارى, ماراپاتتارى, جازۋ ۇستەلى مەن شىعارماشىلىعىندا تۇتىنعان زاتتارى, ەستەلىك سۋرەتتەرى قويىلعان.
ازامات ەسەنجول
