قر ۇلتتىق مۋزەيىندە قازاقستان حالقى اسسامبلەياسى جانە كوپ ەتنوستى قازاقستان كورمە زالىندا ەلىمىزدە تۇرىپ جاتقان ەتنوستارعا قاتىستى ءتۇرلى جادىگەرلەر قويىلعان. شامامەن 500-دەن استام ەكسپونات ەلىمىزدەگى ءتۇرلى ۇلت تاريحىنان سىر شەرتەدى.
كورمە زالىندا ءتۇرلى حالىقتاردىڭ كونە, تۇرمىستىق زاتتارى مەن مۋزىكالىق اسپاپتارى دا بار. ۇنەمى قوزعالىپ تۇراتىن فارفور مۇسىندەرگە كيگىزىلگەن باعزى زامانداعى ۇلتتىق كيىمدەر سول ءداۋىردىڭ تىنىسىن كوز الدىڭا اكەلگەندەي بولادى. ەرلەر مەن ايەلدەردىڭ ۇلتتىق كيىمىن كيگەن مۇسىندەردىڭ كولەمى – 70 سم شاماسىندا. بۇل – سونداعى ەكسپوزيتسيالاردىڭ ءبىر ەرەكشەلىگى.
وسى زالعا كىرگەندەر الدىمەن «قونىس اۋدارۋ» اتتى ۇلكەن ديوراما دەرەكتەرىمەن تانىسادى. مۇندا قازاق حالقىنىڭ قوناقجايلىلىعى مەن كىشىپەيىلدىلىگىن بەينەلەيتىن ءتۇرلى دۇنيەلەر قويىلعان. سونداي-اق, وسى زالدا العاشقى قونىس اۋدارۋشىلاردىڭ سول كەزدەگى تۇتىنعان بۇيىمدارىن, قۇرال-سايماندارى مەن تۇرمىستىق زاتتارىن تاماشالاۋعا بولادى. جالپى العاندا كورمەدە 39 ەتنوستىڭ ەكسپوزيتسيالارى كەلۋشىلەر نازارىنا ۇسىنىلعان.
– مۇندا قازاقستان حالقى ەتنوستارىنىڭ قونىس اۋدارۋ حرونولوگياسى كورسەتىلگەن. مىسالى, ءبىرىنشى بولىپ ءىح عاسىردىڭ 70-80 جىلدارى ورىستار, ۋكرايندار كوشىپ كەلگەن. سودان كەيىن ۇيعىرلار, دۇنگەندەر, كارىستەر كەلە باستاعان. كورمەنىڭ ەكسپوزيتسيالىق قاتارى دا وسى كەزەككە سايكەس قۇرىلعان. ەكسپوزيتسيالاردىڭ باسىم بولىگى قر ۇلتتىق مۋزەيىنىڭ قورىنان الىنعان, مۋزەيلىك ماڭىزى بار زاتتاردى ۇسىنۋعا «كەلىسىم» بىرلەستىگى دە نيەت ءبىلدىردى, سونداي-اق, ەلشىلىكتەرمەن, مادەني ورتالىقتارمەن دە بىرلەسكەن كەلىسىمدەر جاسالدى, – دەيدى قر ۇلتتىق مۋزەيى ەكسپوزيتسيالىق-كورمە جۇمىسى قىزمەتىنىڭ جەتەكشىسى توعجان ادىلبەكوۆا.
سونداي-اق, وسى زالدا الەمنىڭ ءتۇرلى مەملەكەتتەرىنىڭ پرەزيدەنتتەرى مەن دەلەگاتسيالارى قۇرمەت پەن ريزاشىلىقتىڭ بەلگىسى رەتىندە مەملەكەت باسشىسىنا جانە ەلورداعا تارتۋ ەتكەن سىيلىقتارعا جەكە ورىن بولىنگەن.
مەڭدوللا نۇرىمۇلى
