تاۋەلسىزدىكتىڭ 30 جىلدىعى اياسىنداعى ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ ەلورداعا گاسترولدىك ساپارى انشلاگپەن ءوتتى. الماتىلىق بايىرعى ونەر ۇجىمى بالالارعا بازارلىق رەتىندە «جەتى لاق» ورىس حالىق ەرتەگىسى جەلىسىمەن ساحنالانعان «تۋعان كۇن» سپەكتاكلىن, ءىلياس جانسۇگىروۆتىڭ «قۇلاگەر» ساۋندراماسىن, سايىن مۇراتبەكوۆتىڭ «جۋسان ءيىسى» جانە ءازىلحان نۇرشايىقوۆتىڭ «ماحاببات, قىزىق مول جىلدار» قويىلىمدارىن ۇسىندى.
«تۋعان كۇندى» قازاق تىلىنە اۋدارىپ, ينستسەنيروۆكاسىن جاساعان – ۇلان بولاتبەك. ال قويۋشى رەجيسسەرى – شاعۋان ۇمبەتقاليەۆ. ال «قۇلاگەردى» جاس رەجيسسەر فارحات مولداعالي ساحنالادى.
قازاق ادەبيەتىن تەاتر ساحناسىنا كوشىرۋ كەرەك. بۇل وي كوپتەن بەرى ايتىلىپ ءجۇر. «جۋسان ءيىسى» دراماسى وسى ويدى بەكىتە تۇسەدى. بيىل تۋعانىنا 85 جىل تولىپ وتىرعان كلاسسيك قالامگەر سايىن مۇراتبەكوۆتىڭ «جۋسان ءيىسى» جانە «جابايى الما» پوۆەستەرىنىڭ سينتەزىنەن تۋعان سپەكتاكل وتە اسەرلى شىققان. ءتىپتى, جازۋشىنىڭ قوس تۋىندىسىن وقىماعان ادام سپەكتاكلدەگى وقيعا ءبىر شىعارمادان الىنعان دەپ ويلاپ قالۋى مۇمكىن. بۇل تۇرعىدان درامانىڭ قويۋشى رەجيسسەرى جۇلدىزبەك جۇمانبايدىڭ ەڭبەگىن ەرەكشە اتاپ ءوتۋ كەرەك. «جۋسان ءيىسى» مەن «جابايى الماداعى» وقيعالاردى ول ادەمى قابىستىرعان.
ال قازاق ادەبيەتىن ساحناعا كوشىرۋدە ورىس تەاترلارىنان ۇيرەنۋ كەرەك. ولاردى بۇل – قالىپتاسقان ءداستۇر. دالەل رەتىندە ەلورداداعى م. گوركي اتىنداعى مەملەكەتتىك اكادەميالىق ورىس دراما تەاترى رەپەرتۋارىنداعى ۆاسيلي شۋكشيننىڭ اڭگىمەلەرىنەن قۇرالعان «جارقىن ويلار» سپەكتاكلىن الۋعا بولادى. تەك قازاق تەاترى رەجيسسەرلەرىنە «قازىر دراماتۋرگيا جوق» دەپ اۋىزدى قۋ شوپپەن سۇرتپەي, اۋدارما سپەكتاكلدەرگە اۋەس بولا بەرمەي, ءتول ادەبيەتىمىزگە بەت بۇرۋ كەرەك, ىزدەنىس كەرەك.
ءازىلحان نۇرشايىقوۆ – باقىتتى جازۋشى. «ماحاببات, قىزىق مول جىلدار» رومانى حح عاسىردىڭ شيرەگىندەگى جاستاردىڭ عانا ەمەس, ءححى عاسىر ۇرپاقتارىنىڭ دا سۇيىكتى شىعارماسىنا اينالىپ كەلە جاتىر. بۇعان تۋىندىنىڭ ەكراندالۋى, تەاتر ساحناسىنا شىعارىلۋى ۇلكەن سەبەپ بولىپ وتىر.
ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا بەلگىلى قالامگەردىڭ ايگىلى شىعارماسى جەلىسىمەن قويىلعان سپەكتاكلدىڭ پرەمەراسى بيىلعى جازدا عانا ءوتتى. وسى قويىلىممەن تەاتردىڭ ەلورداداعى گاسترولدىك ساپارى تۇيىندەلدى.
سپەكتاكلدىڭ قويۋشى رەجيسسەرى فارحاد مولداعالي قويىلىمدى زاماناۋي نۇسقادا ۇسىنىپ, وسى زامانعا تىم جاقىنداتىپ جىبەرگەندەي. بۇل, ءبىر جاعىنان, زامان اعىمىنان قالماۋدىڭ امالى بولسا, ەكىنشىدەن, قازىرگى جاستاردى قىزىقتىرۋ ءۇشىن جاسالعانىن تۇسىنەمىز. الايدا اعا بۋىننىڭ تالعامى مۇلدە ەسكەرىلمەگەن سياقتى.
كەيبىر كورىنىستەردى ءوزىمىز دە قابىلداي المادىق. ماسەلەن, ەربولدىڭ سوعىستان ورالىپ, وقۋعا قايتا كەلگەندەگى كۋرستاس قىزدارىنىڭ ءبيى ەرسى كورىندى. راسىمەن, جيىرماسىنشى عاسىردىڭ قىرقىنشى جىلدارداعى جاستار بۇلاي بيلەمەدى.
سپەكتاكلدە پاۋزا دا كوپ. قويىلىمدا شىرقالاتىن اندەر دە جاستاردى بولماسا, ۇلكەندەردى قىزىقتىرمايدى. اكتەرلەردىڭ ويىنى دا ءالى شيكى, ەش اسەرلەندىرمەيدى. پرەمەرا تاياۋدا عانا بولعاننان كەيىن كەلە-كەلە ىسىلاتىن شىعار.
ءوز باسىمىز, مۇسىرەپوۆ تەاترىن ەمەس, ەلورداداعى «جاستار» تەاترىنىڭ سپەكتاكلىن تاماشالاپ وتىرعانداي بولدىق. فارحاد مولداعالي پلاستيكاعا ءبىراز كوڭىل بولگەن ەكەن. ول بىزگە تاڭسىق ەمەس, نۇرقانات جاقىپبايدىڭ قولتاڭباسىنان تانىسپىز. رەجيسسەرگە سپەكتاكلدى ءالى دە جەتىلدىرۋ كەرەك سياقتى.
