كەشە «قازاقستان» ورتالىق كونتسەرت زالىندا ەلوردالىق جوعارى وقۋ ورىندارى ستۋدەنتتەرى اراسىندا وتكىزىلگەن «Jastar jalyny – 2021» فەستيۆالىنىڭ جەڭىمپازدارى ماراپاتتالدى. ءبىر جۇما بويى 10 نوميناتسيا ۇزدىك انىقتالعان بايقاۋ نۇر-سۇلتان قالاسىنىڭ جاستار ساياساتى ماسەلەلەرى باسقارماسىنىڭ قولداۋىمەن قازاقستان جاستار فراكتسياسى وتكىزدى. فەستيۆالدە قالاداعى 15 ۋنيۆەرسيتەتتىڭ ستۋدەنتتەرى بار ونەرىن سالدى.
شاراعا قالا اكىمىنىڭ ورىنباسارى اسحات ورالوۆ, قر پارلامەنتى ءماجىلىسىنىڭ دەپۋتاتى ەلنۇر بەيسەنباەۆ پەن ءبىر توپ رۋحانيات پەن مادەنيەت سالاسىنىڭ وكىلدەرى دە بولدى.
العاش بولىپ قر جازۋشىلار وداعىنىڭ نۇر-سۇلتان قالالىق فيليالىنىڭ توراعاسى داۋلەتكەرەي كاپۇلى «پوەزيا» نوميناتسياسى بويىنشا ۇزدىك اتانعان ستۋدەنتتەردى ماراپاتتادى. بۇل اتالىمدا باس جۇلدە ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى الي بەكمۇحامەدوۆكە بۇيىردى. ال «مەديا» اتالىمى بويىنشا قازاق ۇلتتىق حورەوگرافيا اكادەمياسىنىڭ ستۋدەنتى عۇمار سۇلتانبەكتىڭ تۋىندىسى ۇزدىك دەپ تانىلدى. بي ارقىلى قوعامداعى ەڭ وزەكتى الەۋمەتتىك ماسەلەنى كوتەرىپ كوپتىڭ كوڭىلىنەن شىققان تالاپتى جاسقا جۇلدەسىن «قازاقستان كۆن وداعى» رەسپۋبليكالىق قوعامدىق بىرلەستىگىنىڭ توراعاسى ەسەن ەلەۋكەن تاپسىردى.
كىل جۇيرىكتەن, شىن جۇيرىكتى انىقتاعان «ايتىس» اتالىمى بويىنشا قازاق ۇلتتىق ونەر ۋنيۆەرسيتەتىنىڭ ستۋدەنتى اقبوتا ماناربەكتىڭ جۇلدىزى جاندى. ءسوز دوداسىنان وزا شاپقان جاس اقىندى فيلولوگيا عىلىمدارىنىڭ كانديداتى سەرىكزات دۇيسەنعازى ماراپاتتادى.
«ۇلتتىڭ بي» نوميناتسياسى بويىنشا ساكەن سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ ونەرپازدارىنان قۇرالعان «شاتتىق» بيشىلەر توبى ۇزدىك اتانسا, جاس سۋرەتشىلەر اراسىنداعى سايىستا ارۋاي تاسماعامبەتوۆانىڭ ونەرى جوعارى باعالاندى.
«جاستار قۋاتى» اتالىمى بويىنشا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرىنەن قۇرالعان «سامۇرىق» توبى مىڭنان تۇلپار, جۇزدەن جۇيرىك شىقتى. ولاردىڭ جۇلدەسىن قر پارلامەنتى ءماجىلىسىنىڭ دەپۋتاتى ەلنۇر بەيسەنباەۆ تابىس ەتتى.
«مۋزىكالىق اسپاپتار» نوميناتسياسىندا دا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرىنەن قۇرالعان شىعارماشىلىق ۇجىمنىڭ باعى جاندى. سايكەسىنشە ولار جۇلدەنى نۇر-سۇلتان قالالىق مەملەكەتتىك فيلارمونياسىنىڭ قازاق حالىق اسپاپتارى وركەسترىنىڭ كوركەمدىك جەتەكشىسى باس ديريجەرى ايتقالي جايىموۆتىڭ قولىنان الدى.
«تەاتر» نوميناتسياسى بويىنشا قازاق ۇلتتىق حورەوگرافيا اكادەمياسىنىڭ ستۋدەنتتەرى باس جۇلدەنى جەڭىپ الدى. «زاماناۋي بي» جانە «ەسترادا» اتالىمدارىندا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ءبيشى ستۋدەنتتەرى جەڭىس تۇعىرىنان كورىندى.
شارا سوڭى فەستيۆال جەڭىمپازدارىنىڭ گالا-كونتسەرتىنە ۇلاستى. سونىمەن بىرگە ەلوردالىق ونەرپاز جاستاردىڭ قۋانىشىمەن بولىسۋگە رينات مالتساگوۆ, جانار دۇعالوۆا سىندى ەسترادا جۇلدىزدارى كەلىپ, اننەن شاشۋ شاشتى.
