«كوكتەم كەلدى كوڭىلىمنىڭ قۇستارى قيقۋلاماي ناعىپ ۇيىقتاپ جاتسىڭدار» دەپ اقىن جىرلاعانداي, سول كوكتەممەن بىرگە ءبىر قولىمەن بەسىكتى, ەكىنشى قولىمەن الەمدى الديلەگەن اياۋلى انالار مەن ارۋلاردىڭ مەرەكەسى دە كەلىپ جەتتى. ولار – قانداي قۇرمەت پەن ىزەتكە دە, ماراپات پەن ماداققا دا لايىق جاندار. سوندىقتان وسى كۇنى كوكتەمنىڭ شۋاقتى كۇنىندەي جادىراپ, جايناعان قىزمەتتەگى قىز-كەلىنشەكتەر تۋرالى قالام تەربەۋدىڭ ءوزى – ءبىر مارتەبە.
وسىنداي جاننىڭ ءبىرى – استانا قالاسى پروكۋرورىنىڭ اعا كومەكشىسى ايجان ايماعانوۆا. بۇگىنگى كۇننىڭ تالابى – ءوز ءىسىن جەتە بىلەتىن ءبىلىمدى دە بىلىكتى جاستار دەيتىن بولساق, ايجان وسى تۇجىرىمعا تولىق جاۋاپ بەرەتىن ىزدەنىمپاز قازاق قىزى.
ول بۇل قيىندىعى مەن قىزىعى قاتار جۇرەتىن وتە جاۋاپتى ماماندىقتى كەزدەيسوق تاڭداي قالعان جوق. وعان اسەر ەتكەن, ىقپال جاساعان ومىرلىك تاجىريبەسى مول جاندار بولدى.
– مەن زاڭ ماماندىعىن سانالى تۇردە تاڭدادىم. مەكتەپتە وقىپ جۇرگەندە العاشقى اسكەري دايىندىق ساباعىنان بەرەتىن الەكساندر ۆيكتوروۆيچ سوبول دەگەن مۇعالىمىمىز بولدى. سول كىسى ۇنەمى «ايجان, سەنىڭ جاۋاپكەرشىلىگىڭ مول, تاپسىرىلعان ءىستى جان-تانىڭمەن بەرىلە ورىندايسىڭ. سەنەن جاقسى زاڭگەر مامانى شىعادى» دەپ تاۋداي تالابىمدى قاناتتاندىرىپ جۇرەتىن» دەيدى ول.
ارمانىنا قانات بايلاعان وسى ءسوز ونى مەكتەپ بىتىرگەسىن ماناش قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ زاڭ فاكۋلتەتىنە الىپ كەلدى. كەيىن استانا قالاسىنداعى قازاقستان – رەسەي ۋنيۆەرسيتەتىن ءبىتىردى.
ەڭبەك جولىن سولتۇستىك قازاقستان وبلىستىق قىلمىستىق ىستەر جونىندەگى سوتىنىڭ باس مامانى بولىپ باستادى. ارينە, سالانىڭ ءوز قيىندىعى, جۇمىسىنىڭ قىرى مەن سىرى بولادى. العاشقى كەزدە تاپسىرىلعان ءىستى ناقتى ءتۇسىنىپ, مەڭگەرىپ كەتكەنشە قيىندىقتار بولعانىن ايجان دا جاسىرمايدى. الايدا تاڭداعان ماماندىعىنا دەگەن سۇيىسپەنشىلىك, بويىنداعى جاستىققا ءتان كۇش-جىگەر مەن توزىمدىلىك ونى بۇل قيىندىقتاردان لەزدە الىپ شىعادى.
ءسويتىپ ول اراعا جىلدار سالىپ, جەتىلىپ, تاجىريبە جيناپ, استانا قالاسى پروكۋراتۋراسىنا قىزمەتكە كەلدى. قالا پروكۋرورىنىڭ اعا كومەكشىسى, كىشى ادىلەت كومەكشىسى لاۋازىمىندا وزىنە جۇكتەلگەن مىندەتتەردى ابىرويمەن اتقارىپ ءجۇر.
«قازىرگى قىزمەتىم وزىمە ۇنايدى. مەنىڭ باستى مىندەتىم – زاڭنىڭ ورىندالۋىن قاداعالاۋ. ومىردە ادامداردىڭ ءبىلىپ-بىلمەي ىستەگەن شالىس قادامدارى بولىپ جاتادى. وسى تۇرعىدا اداسقانعا دۇرىس جول سىلتەپ, ادىلەتتىلىكتىڭ سالتانات قۇرۋىنا بارىنشا اتسالىسۋدى ءوزىمنىڭ ازاماتتىق تا, ادامدىق تا پارىزىم دەپ سانايمىن» دەيدى ءبىزدىڭ كەيىپكەرىمىز.
سونىمەن قاتار ايجان تالعاتقىزى – وتاعاسى ەكەۋى ءۇش بالا تاربيەلەپ وتىرعان ۇلگىلى وتباسى. بوس ۋاقىتىندا كوبىنە پەرزەنتتەرىمەن تابيعات اياسىنا شىعىپ سەرۋەندەگەندى, سپورتپەن اينالىسقاندى جانى قالايتىن كورىنەدى. «ءوزىم دوپ ويناعاندى جاقسى كورەمىن. ۆولەيبولدان كوماندالىق جارىستاردا جۇلدەلى ورىندارعا يە بولىپ, قۇقىق قورعاۋ ورگاندارى اكادەمياسى رەكتورىنىڭ قولىنان «ۇزدىك ليبەرو» ديپلومىن دا الدىم» دەدى.
سونداي-اق ايجان تالعاتقىزى پروكۋراتۋرا سالاسىنداعى قىزمەتىندە «پروكۋراتۋرا ۇزدىگى» توسبەلگىسى مەن 3-دارەجەلى «ءمىنسىز قىزمەتى ءۇشىن» مەدالىمەن جانە قازاقستان رەسپۋبليكاسىنداعى ۇزدىك مەملەكەتتىك ايىپتاۋشىنىڭ ءبىرى رەتىندە قر باس پروكۋرورىنىڭ قولىنان باعالى سىيلىق پەن ديپلوم دا العان. ال پروكۋراتۋرا باسشىلىعى بەرگەن العىس حاتتارىنىڭ ءوزى – ءبىر توبە.
«مەن بۇگىندە ءبىر كەزدە العا قويعان ماقساتىما جەتكەندەيمىن. مەنىڭ وسىنداي جەتىستىككە جەتۋىمە وزىمە ءبىر كەزدەرى باسشى بولعان ەرلان وتەگەنوۆتىڭ, بولات ميزانباەۆ پەن ارمان قوزباەۆتىڭ قوسقان ۇلەسى مول دەپ سانايمىن.
بىراق قول جەتكەنگە توقمەيىلسۋگە استە بولمايدى. ونىڭ ۇستىنە ءبىزدىڭ جۇمىس – ۇنەمى ىزدەنىستى, تەرەڭ ويلانىپ-تولعانۋدى قاجەت ەتەتىن كۇردەلى سالا. ءالى دە ۇيرەنە ءتۇسىپ,
قىزمەتىمنىڭ قىرى مەن سىرىن
مەڭگەرە تۇسسەم دەگەن وي-مۇراتىم بار» دەدى ادىلەت جولىنداعى ارۋ.
