قوعامدا كەيىنگى كەزدە پوليتسەي قىزدارعا دەگەن قۇرمەت ارتا ءتۇستى. ونىڭ سەبەبى دە بار. بىرىنشىدەن, ايرىقشا ءتوزىم مەن كۇش-جىگەردى قاجەت ەتەتىن, ەر-ازاماتتارعا ءتان بۇل ماماندىقتى تاڭداۋ ەكىنىڭ ءبىرىنىڭ قولىنان كەلە بەرمەيدى. ەكىنشىدەن, بۇعان تەك وزىنە-ءوزى سەنگەن ءارى وسى سالاعا بۇكىل ءومىرىن ارناعان جاندار عانا كەلەتىندىكتەن بولسا كەرەك. استانا قالاسى پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ ينسپەكتورى, پوليتسيا مايورى نايرا ەلەمەسوۆا – وسىنداي جان.
ونىڭ اكەسى ەلەمەس نۇراحمەتوۆ تە ءومىر بويى ىشكى ىستەر سالاسىندا قىزمەت ىستەپ, زەينەت دەمالىسىنا شىققان ارداگەر پوليتسەي. «ۇيادا نە كورسەڭ, ۇشقاندا سونى ىلەسىڭ» دەگەندەي, شاڭىراقتا جيناقىلىق پەن تارتىپكە, شەكسىز مەيىرىمگە قانىعىپ وسكەن ونىڭ ارمانىنا قانات سەرمەپ, ماماندىق تاڭداۋعا كەلگەندە ويلانباستان اكە جولىن جالعاستىرعىسى كەلگەنى سوندىقتان.
شىعىس قازاقستان وبلىسى ۇلان اۋدانىنىڭ بوزانباي اۋىلىندا دۇنيەگە كەلگەن نايرا ەلەمەسقىزى قاسىم قايسەنوۆ اتىنداعى ورتا مەكتەپتى ويداعىداي اياقتاعاننان كەيىن, سەمەي قالاسىنداعى زاڭ كوللەدجىنە وقۋعا ءتۇستى. وتباسىنداعى كوزىنىڭ قاراشىعىنداي جالعىز قىزى وسىنداي ادامدارمەن ەتەنە ارالاسىپ جۇمىس ىستەۋدى تالاپ ەتەتىن جاۋاپتى دا قۇرمەتتى ماماندىقتى تاڭداپ تۇرسا, اتا-اناسى وعان قالاي قارسى تۇرسىن؟! ەكەۋى دە قىزىنا اق باتاسىن بەرەدى.
ىشكى ىستەر مينيسترلىگىنىڭ زاڭ كوللەدجىن ءتامامداعاننان كەيىن نايرا ءبىلىمىن شىعىس قازاقستان ايماقتىق ۋنيۆەرسيتەتىندە جالعاستىرىپ, جوعارى ءبىلىمدى «زاڭگەر» ماماندىعىن الىپ شىقتى.
بويىنا ءبىلىم ءنارىن ءسىڭىرىپ, ومىرگە العاش قادام باسقان قارشاداي قىز ەڭبەك جولىن 2009 جىلدىڭ شىلدە ايىندا ۇلان اۋدانى ىشكى ىستەر باسقارماسىندا كامەلەتكە تولماعاندار ءىسى جونىندەگى ايماقتىق ۋچاسكەلىك ينسپەكتورى بولىپ باستادى. سودان بەرى قۇقىق قورعاۋ ورگانىنىڭ ىستىعى مەن سۋىعىنا ءتوزىپ, انتىنا ادال بولىپ ەڭبەك ەتىپ كەلەدى. ول ءوزىنىڭ اشىق تا جايدارى, كوپشىلىكپەن تەز ءتىل تابىساتىن مىنەزىمەن ارىپتەستەرىنىڭ قۇرمەتىنە بولەنىپ ءجۇر.
– استانا قالاسىنداعى قىزمەتىمە 2022 جىلى كەلدىم. ءبىزدىڭ ۇجىمدا ىنتىماعى جاراسقان تاتۋ قىزمەتكەرلەر جۇمىس ىستەيدى. جۇمىسىم وزىمە ۇنايدى. وزىڭە جۇكتەلگەن مىندەتتەردى نەعۇرلىم تياناقتى اتقارساڭ, ادامداردىڭ دا ساعان دەگەن سەنىمى سوعۇرلىم ارتا تۇسەتىنىنە كوزىم جەتتى. قازىر اتقارىپ جۇرگەن شارۋامىز قاراپايىم ادامدارمەن تىكەلەي بايلانىستى بولعاندىقتان, ولاردىڭ سەنىمىن اقتاۋ – باستى پارىزىم, – دەيدى نايرا ەلەمەسقىزى.
ول بوس ۋاقىتىن كوبىنە جەلكىلدەپ ءوسىپ كەلە جاتقان ءبۇلدىرشىن قىزىنىڭ تاربيەسىنە ارناعاندى قالايدى ەكەن.
«قىزىم مۇنار قالاداعى №32 مەكتەپتىڭ 5-سىنىبىندا وقيدى. وقۋ ۇلگەرىمى جاقسى. قىزىمنىڭ بولاشاعىنان ۇلكەن ءۇمىت كۇتەمىن. ەكەۋمىز كوبىنە تابيعات اياسىنا شىعىپ سەرۋەندەگەندى, كىتاپ وقىعاندى, ءدامدى تاعامدار دايىنداعاندى ۇناتامىز. ەڭ سۇيىكتى تاعامىمىز – مانتى مەن ەت قوسىلعان ءبالىش» دەپ اعىنان جارىلدى پوليتسيا مايورى.
كۇندەلىكتى قىزمەتىندە تاڭ اتقاننان ءتۇن جارىمعا دەيىن بولاتىن نازىك جاندى نايرا پوليتسيا قىزمەتىن تاڭداعانىنا ەش وكىنبەيدى. اۋلەتىندە اكەسىنەن جالعاسقان ماماندىقتىڭ جاۋاپكەرشىلىگىن جاقسى سەزىنىپ, ونى ادال اتقارۋعا بەل بۋعان.
مىنە, تاعى دا نۇرىن شاشىپ تاڭ اتتى. الدا جاڭا كۇن, جاڭا تاپسىرما. ۋاقىتپەن ساناسپاي, ەلگە قىزمەت ەتۋگە اسىعىپ بارا جاتقان پوگون تاققان ارۋ بيىك بەلەسىنىڭ الدا ەكەنىن جاقسى سەزەدى.
