قاراعاندى وبلىسىندا ورنالاسقان «سپاسسك» پوليگونىندا VIII رەسپۋبليكالىق «ايبىن» اسكەري-پاتريوتتىق جاستار جيىنىنىڭ تۋى كوتەرىلدى. وعان ەلىمىزدىڭ بارلىق وڭىرىنەن, نۇر-سۇلتان, الماتى جانە شىمكەنت قالالارىنان 40 كوماندا كەلدى. جيىنعا, نەگىزىنەن, 14 پەن 18 جاس ارالىعىنداعى 600-گە جۋىق ءجاسوسپىرىم قاتىسۋدا. جارىستار 24 ماۋسىمعا دەيىن جالعاسادى.
ەرتەڭگى كۇنى ەل قورعاۋعا دايىن بولۋ ءۇشىن ءاربىر جاس ازامات قارۋ-جاراق پەن اسكەري تەحنيكانىڭ «ءتىلىن» بىلگەنى ءجون. وسى تۇرعىدان العاندا, قازىردىڭ وزىندە 240 مىڭ مۇشەسى بار «جاس سارباز» اسكەري-پاتريوتتىق قوزعالىسىنا جاستاردى بارىنشا تارتۋ ەرەكشە ماڭىزعا يە. قر قورعانىس مينيسترلىگىنىڭ حابارلاۋىنشا, جيىن باعدارلاماسىندا اسكەري-قولدانبالى جانە اسكەري-سپورتتىق جارىستان تۇراتىن 11 سايىس ءتۇرى جوسپارلانعان.
جاس پاتريوتتار ۆينتوۆكادان وق اتۋ, اۆتوماتتى بولشەكتەپ-جيناۋ, گازدان قورعانۋ بويىنشا جارىسقا تۇسەدى. ارقان تارتۋ جانە اسكەريلەندىرىلگەن ەستافەتا بارىسىندا قاتىسۋشىلاردىڭ دەنە دايىندىعى, توزىمدىلىگى مەن جىلدامدىعى باعالانادى.
«ايبىن دارىنى» ويىنىندا ولار وزدەرىنىڭ زياتكەرلىك قابىلەتىن كورسەتەدى. «ايبىن جۇلدىزى» شىعارماشىلىق بايقاۋى مەن «جاس سارباز – جاس تىلشىلەر» بايقاۋىندا سان قىرلى تالانتىن پاش ەتپەك. «Smart sarbaz» ونەرتاپقىشتار سايىسىندا جاس باعدارلاماشىلار قازىلار القاسىنا IT-ازىرلەمەلەرى مەن تەحنيكالىق شەشىمدەرىن ۇسىنادى. اقتىق سىندا «كۇشىمىز – بىرلىكتە» دەگەن اتپەن اسكەري-دالالىق تاكتيكالىق ويىنى وتەدى. وندا بولاشاق وتان قورعاۋشىلار اسكەري قىزمەتپەن بايلانىستى ناقتى تاپسىرمالاردى ورىندايدى, كوماندامەن بىرلەسىپ جۇمىس ىستەۋ تاجىريبەسىن مەڭگەرەدى, مورالدىق تۇرعىدان وزدەرىنىڭ تۇراقتىلىعىن تەكسەرەدى. بيىلعى ءىس-شارا بالالار جىلىنا جانە قازاقستان قارۋلى كۇشتەرىنىڭ 30 جىلدىعىنا ارنالىپ وتىر.
ابۋباكىر سمايىلوۆ
