ادال ەڭبەك, وزىق ءبىلىم جانە ۇزدىك تاجىريبە جاستارعا قاشاندا قاجەت. مىنە, وسى ورايدا بايقوڭىر اۋدانىنداعى «بەلسەندى ۇزاق ءومىر ءسۇرۋ» ورتالىعىنا قاراستى «ينتەللەكتۋالدى دامىتۋ» كلۋبى ءبىرشاما جۇمىس اتقارۋدا. وسى كلۋبتى ۇيىمداستىرۋ يدەياسىنىڭ اۆتورى ءوزىنىڭ وتباسىلىق كىتاپحانا قورىن «بەلسەندى ۇزاق ءومىر ءسۇرۋ» ورتالىعىنا سىيعا تارتقان قازاقستان رەسپۋبليكاسى ءبىلىم بەرۋ ءىسىنىڭ ۇزدىگى, «ۇزدىك وقىتۋشى» مەدالىنىڭ يەگەرى ءارى «ۇزدىك وقىتۋشى» نوميناتسياسىنىڭ جەڭىمپازى, عالىم-ۇستاز, پرفەسسور مارجان پىرىمبەتوۆا 2 مىڭنان استام كىتاپ قورىن وسى ورتالىققا سىيعا تارتتى. ءبىز سول ءراسىمنىڭ تۇساۋكەسەرىنە قاتىسىپ, جاقسى جاڭالىقتىڭ جارشىسى بولدىق.
مارجان بەكتۇرسىنقىزى وسى كلۋبتا, مادەني, رۋحاني ءىس-شارامەن قاتار, ۇرپاق تاربيەسىنە, كىتاپ وقۋ مادەنيەتىنە, اباي وقۋلارى مەن مەملەكەتتىك تىلگە بايلانىستى, ادەبي, مادەني ءومىر مەن ۇلتتىق سالت-ءداستۇر جانە قايىرىمدىلىق تاقىرىبىنا بايلانىستى كەزدەسۋ-كەش وتكىزۋدى جوسپارىنا ەنگىزگەن ەكەن. ال بۇل كەزدەسۋ-كەشتىڭ تاقىرىبى مارجان پىرىمبەتوۆانىڭ ورتالىققا تاپسىرعان كىتاپتارىنا بايلانىستى بولدى.
تۇساۋكەسەر راسىمىندە العاشقى ءسوز العان نۇر-سۇلتان قالاسى اكىمدىگى ورتالىقتاندىرىلعان كىتاپحانالار جۇيەسىنىڭ ديرەكتورى گۇلبادان ساقتاپقىزى «ءبىر كىتاپ – ءبىر الەم» تاقىرىبىندا ءسوز الىپ, ورتالىققا مىڭنان استام كىتاپ سىيلاپ وتىرعان ارداگەر-زەينەتكەر, پروفەسسور, ۇلاعاتتى ۇستاز مارجان پىرىمبەتوۆاعا العىس ايتىپ, ونىڭ ونەگەلى ىسىنە ريزاشىلىعىن ءبىلدىردى.
شىنىندا دا, مارجان پىرىمبەتوۆانىڭ بۇل جاساپ وتىرعان يگى ءىسى – كوپشىلىككە وي تاستار جاقسى باستاما. ەگەر بۇل كىتاپتار ونىڭ ۇيىندە تۇرسا بالالارى عانا وقيدى, ال ەگەر كىتاپحاناعا تاپسىرسا قانشاما قالىڭ وقىرمان ءبىلىم نارىنەن سۋسىندايدى. سوندىقتان ول – ەل قامىن ويلاعان ابزال ادام, جانى قايىرىمدىلىققا تولى مەيىرىمدى جان.
عاليا بالتاباي,
قازاقستاننىڭ قۇرمەتتى ءجۋرناليسى, نۇر-سۇلتان قالالىق ارداگەرلەر كەڭەسى مەدياتوبى جەتەكشىسىنىڭ ورىنباسارى
